މަސްދަރު ހާމަކުރުން ލާޒިމުކުރެވޭގޮތަށް ތަސްދީގުކޮށްފައިވާ ހެއްކާއި ބެހޭ ގާނޫނަށް ސަރުކާރުގެ ފަރާތުން އަލުން ހުށައަޅާ އިސްލާހުތައް ރައީސް އޮފީހަށް ފޮނުވައިފިއެވެ. 

ހެއްކާއި ބެހޭ ބިލުގައި އޮތް ބައެއް މާއްދާތަކާއި ގުޅިގެން ނޫސްވެރިކަމުގެ ގާނޫނީ ހައްގަށް ހުރަސްއެޅޭކަން ފާހަގަކޮށް އެ ބިލު ތަސްދީގުކުރުން ފަސްކުރުމަށް ނޫސްވެރިން އެދިފައިވަނިކޮށް ޖުލައިމަހުގެ 18 ގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ އެ ބިލު ތަސްދީގު ކުރައްވާފައެވެ. 

އެފަހުންވެސް ނޫސްވެރިންވަނީ އެ ގާނޫނާއި ގުޅިގެން ބޮޑެތި ކަންބޮޑުވުންތަކެއް ފާޅުކޮށްފައެވެ. 

ނޫސްވެރިންގެ އެންމެ ބޮޑު ކަންބޮޑުމެއް އޮތީ ހެއްކާއި ބެހޭ ގާނޫނުގެ 136 ވަނަ މާއްދާ އެކުލަވާލާފައިވާ ގޮތާއި ގުޅިގެންނެވެ. އެ ޤާނޫނުގެ 136 ވަނަ މާއްދާގެ (ހ) ގައި ބުނެފައި އޮތީ މަސްދަރު ހާމަކުރުމުގެ ސަބަބުން، އެ މީހާ އަށް ނުވަތަ އެހެން ފަރާތަަކަށް ވެސް ވެދާނެ ގެއްލުމަށް ވުރެ، މަސްދަަރު ހާމަކުރުމުގެ އާއްމު މަސްލަހަތު ބޮޑުވާ ހާލަތުގައި މަސްދަރު ހާމަކުރަން މަޖުބޫރުކުރެވިދާނެ ކަމަށެވެ.

އެ ކަމާއި ކަންބޮޑުވުން ފާޅުކުރާ ނޫސްވެރިން ބުނަމުން ދަނީ އެއީ ނޫސްވެރިކަމުގެ ހައްގަށް ހުރަސްއެޅޭ، އަދި ހެކި ހިމާޔަތްކުރުމަށްވެސް ގޮންޖެހުންތަކާއި ކުރިމަތިވެގެންދާނެ ކަމެއް ކަމަށެވެ. 

ނޫސްވެރިންގެ ހުރި ކަންބޮޑުވުންތަކާއެކު، އަލުން އެ ގާނޫނު އިސްލާހުކުރުމަށް މަޖިލީހަށް ފޮނުވުމުގެ މަސައްކަތް މިހާރު ކުރަމުންދާކަމަށް ބަންޑާރަނައިބުގެ އޮފީހުން މައުލޫމާތުދެއްވައެވެ. 

ބަންޑާރަނައިބުގެ އޮފީހުގެ ކޮމިއުނިކޭޝަންސް ޑިރެކްޓާ ޙަސަން ޙުސައިން ވިދާޅުވެފައިވަނީ ރައީސް އޮފީހަށް އެ މާއްދާ އިސްލާހުކުރާ ބިލު ފޮނުވާފައިވަނީ ފާއިތުވި ބުރާސްފަތި ދުވަހުގައި ކަމަށެވެ. 

ބިލަށް ގެންނަ ބައެއް އިސްލާހުތަކުގެ ތެރޭގައި މިހާރު މަސްދަރު ހާމަކުރުން ލާޒިމުކުރާ ޙާލަތްތައް ކަމުގައި ބަޔާންކޮށްފައިވާ، ޤައުމީ ސަލާމަތާ ގުޅުންހުރި ކުށްތަކާއި، ޓެރަރިޒަމްގެ ކުށްތައް ބިލުގައި އިތުރަށް ސާފުވާނެ ފަދައިން ޤާނޫނުގައި މާނަކޮށްދިނުން ހިމެނޭކަމަށް ބަންޑާރަނައިބުގެ އޮފީހުން ވަނީ ބުނެފައެވެ. 

އޭގެ އިތުރުން ނޫސްވެރިންގެ މަސްދަރު ހާމަކުރުން ލާޒިމުކުރެވޭނީ ޕްރޮސެކިއުޓާ ޖެނެރަލް ހުށަހަޅުއްވައިގެން، ހައިކޯޓުން ކުރާ އަމުރަކުން ކަމުގައި ކަނޑައެޅުމާއި އެފަދަ އަމުރެއް ނެރުމުގައި ކޯޓުން ރިއާޔަތްކޮށް ބަލަންޖެހޭ ކަންކަން ޤާނޫނުގައި ކަނޑައަޅައި ބަޔާންކުރުމަކީވެސް އިސްލާހުގެ ބައެއްކަމަށް އޭޖީ އޮފީހުން ވަނީ ބުނެފައެވެ.