ރައްޔިތުންގެ މަޖިލީހުގައި ހިމެނޭ އެމްޑީޕީގެ މެންބަރުންގެ ތެރެއިން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ތާއީދުކުރައްވާ މެންބަރުން ވޯޓް ދެއްވީ ގޮތް ނޭނގޭ މަރުތައް ގިނަވާތީ މަޖިލީހަށް ހުށަހެޅި ކުއްލި މައްސަލަ ބަލައިނުގަންނަން ކަން ހާމަވެއްޖެއެވެ. 

ގޮތް ނޭނގޭ މަރުތައް ގިނަވަމުންދާ މައްސަލައާ ގުޅިގެން އިދިކޮޅު ޕީއެންސީގެ ޕާލިމަންޓަރީ ގުރޫޕުގެ ލީޑަރު އަދި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފު އުމަރު ވަނީ މިއަދު އޮތް ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅުއްވާފައެވެ. 

މި މައްސަލާގައި އާދަމް ޝަރީފު ވިދާޅުވެފައިވަނީ ފާއިތުވި ސެޕްޓެންބަރު މަހުގެ 18 ވަނަ ދުވަހުގައި ހުޅުމާލޭ ދެވަނަ ފިޔަވަހިން އުމުރުން 27 އަހަރުގެ އަޙްމަދު އަޛުހާން ގެއްލިފައިވާއިރު އޭނާގެ ހަށިގަނޑު ކަމަށް ބެލެވޭ ހަށިގަނޑެއް މި މަހުގެ ދެވަނަ ދުވަހުގައި ހުޅުމާލޭ ސްކޭޓް ޕާކު ސަރަހައްދުގެ ގަސްތަކުގެ ތެރެއިން ފެނިފައިވާ ކަމަށެވެ. އަދި އެ ހަށިގަނޑު ފެނުނުއިރު ގިނަ ދުވަސްވެ ވަރަށް ބޮޑަށް ކުނިވެފައިވާކަން ފުލުހުން ހާމަކޮށްފައިވާ ކަމަށެވެ.

އާދަމް ޝަރީފު އިތުރަށް ވިދާޅުވީ އަޛުހާނުގެ ހަށިގަނޑު ފެނުނީ އޭނާ ދިރިހުއްޓައި އެންމެ ފަހުން ފެނުނު ސަރަހައްދާ ވަރަށް ކައިރި ސަރަހައްދަކުން ކަމަށެވެ. އަދި އަޛްހާން ހޯދުމުގެ މަސައްކަތް ފުލުހުން ކުރި ގޮތާމެދު ގިނަ ކަންބޮޑުވުންތަކެއް އާންމުން ފާހަގަކުރާ ކަމަށެވެ. އަދި އަޛުހާނު ގެއްލިގެން 14 ދުވަސް ފާއިތުވިއިރު އޭނާ ވީތަނަކާއި އޭނާއަށް ވީ ގޮތެއް ހޯދިފައިނުވާތީ ކަންބޮޑުވާ ކަމަށެވެ. އަދި އޭނާގެ މަރުގައި ޝައްކުވާ ބަޔަކު ނެތްކަމަށް ފުލުހުން ބުނާކަމަން އާދަމް ޝަރީފު ފާހަގަކުރެއްވިއެވެ.

އިތުރަށް އޭނާ ވިދާޅުވީ ފަހަކަށް އައިސް ރާއްޖޭގައި ގޮތް ނޭނގޭ މިފަދަ އެތައް މަރުތަކެއް ހިނގާއިރު އެކަންކަމާ ގުޅޭ އެކަށީގެންވާ މައުލޫމާތު އާންމުނުކުރާ ކަމަށާއި، އާންމުންނަށް ރައްކާތެރިކަން ކަށަވަރުކޮށްދިނުމުގައި ފުލުހުންނާއި ހޯމް މިނިސްޓްރީގެ ދައުރު ފުޅާކޮށް އެފަދަ މައްސަލަ ހައްލުކުރުމަށް ފުލުހުންގެ އިދާރާގެ ހުރިހާ ވަސީލަތެއް ބޭނުންކުރުމަށާއި، މިފަދަ ކަންކަން އިތުރުވާ ސަބަބުތައް ދެނެގަނެ އެ މައްސަލަތައް ހައްލުކުރުމަށް ސަރުކާރަށް ގޮވައިލައްވާ ކަމަށެވެ.

މެންބަރު އާދަމް ޝަރީފް ހުށަހެޅުއްވި މި ޚައްސާސް މައްސަލަ، މަޖިލީހަށް ހާޒިރުވި 53 މެންބަރުންގެ ތެރެއިން 25 މެންބަރުންގެ ތާއީދާއެކު މަޖިލީހަށް ބަލައިގެންފައިވާއިރު, އެ މައްސަލަ ބަލައިގަންނަން ނުފެންނަ ކަމަށް 11 މެންބަރުން ވަނީ ވޯޓު ދީފައެވެ. 

1- ހެންވޭރު ދެކުނު ދާއިރާގެ މެންބަރު ހުސައިން ޝަމީމް (އަނދުން ހުސައިން)

2- އިހަވަންދޫ ދާއިރާގެ މެންބަރު މުހައްމަދު ޝިފާއު

3- ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ

4- ވައިކަރަދޫ ދާއިރާގެ މެންބަރު ހުސައިން ޒިޔާދު

5- ކުޅުދުއްފުށީ އުތުރު ދާއިރާގެ މެންބަރު ޔާސިރު ޢަބްދުއްލަޠީފް

6- ކޮމަންޑޫ ދާއިރާގެ މެންބަރު މުހައްމަދު ރާޝިދު

7- އަލިފުށި ދާއިރާގެ މެންބަރު މުހައްމަދު ރަޝީދު ހުސައިން

8- ގަމު ދާއިރާގެ މެންބަރު މުހައްމަދު ވިސާމް

9- ފުވައްމުލަކު މެދު ދާއިރާގެ މެންބަރު ހުސައިން މުހައްމަދު ދީދީ

10- މަރަދޫ ދާއިރާގެ މެންބަރު އިބްރާހީމް ޝަރީފް

11- ހިތަދޫ އުތުރު ދާއިރާގެ މެންބަރު މުހައްމަދު އަސްލަމް