ސަރުކާރުގެ ވެރިކަން ކުރާ މައި ޕާޓީ، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން އިންސާނީ ހައްގުތައް ރައްކާކުރާ މިންވަރު މިއަދު ފެންނަމުންދާ ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެންބަރު މުހައްމަދު ސައީދު ވިދާޅުވެއްޖެއެވެ. 

ގޮތް ނޭނގޭ މަރުތައް ގިނަވަމުންދާ މައްސަލައާ ގުޅިގެން އިދިކޮޅު ޕީއެންސީގެ ޕާލިމަންޓަރީ ގުރޫޕުގެ ލީޑަރު އަދި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފު އުމަރު ވަނީ މިއަދު އޮތް ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅުއްވާފައެވެ. 

އެމައްސަލަ މަޖިލީހުން ބޭރު ކުރަން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ތާއީދުކުރައްވާ ބައެއް މެންބަރުން ވޯޓު ދެއްވި އިރު، އަނެއްބައި މެންބަރުން ވަކި ގޮތަކަށް ވޯޓެއް ނުދެއްވައެވެ.

Advertisement

އެގޮތުން ވަކި ގޮތަކަށް ވޯޓު ނުދެއްވާ މެންބަރުންގެ ތެރޭގައި ރައްޔިތުންގެ މަޖިލީހުގެ ހިންނަވަރު ދާއިރާގެ މެންބަރު އަދި ރައްޔިތުންގެ މަޖިލީހުގެ ހިޔުމަން ރައިޓްސް ކޮމިޓީގެ ރައީސް ޖީހާން މުހައްމަދު ވެސް ހިމެނިވަޑައިގަންނަވައެވެ. 

މިކަމަށް ފާޑުވިދާޅުވެ ސައީދު ކުރެއްވި ޓްވީޓެއްގައި ވިދާޅުވީ، މިއިން ހާމަވެގެންދަނީ އެމްޑީޕީން އިންސާނީ ހައްގުތައް ރައްކާކުރާ މިންވަރު ކަމަށެވެ. އަދި އިންސާނީ ހައްގުތަކަށް ވަކާލާތުކުރާ ކޮމިޓީގެ ރައީސް އާއި ސަރުކާރަށް ތާއީދުކުރައްވާ މެންބަރުން އެފަދަ ޚައްސާސް މައްސަލައެއްގައި ވޯޓު ނުދެއްވަން ނިންމެވީ ކޮންސަބަބަކާއި މެދުތޯ ސުވާލު އުފެދޭ ކަމަށްވެސް ސައީދު ވިދާޅުވިއެވެ. އަދި އެއީ ހަމަ އިންސާފުތޯވެސް ސައީދު ވަނީ ސުވާލު ކުރައްވާފައެވެ. 

ގޮތް ނޭނގޭ މަރުތައް ގިނަވަމުންދާ މައްސަލައާ ގުޅިގެން ހުށަހެޅި މައްސަލާގައި އާދަމް ޝަރީފު ވިދާޅުވެފައިވަނީ ފާއިތުވި ސެޕްޓެންބަރު މަހުގެ 18 ވަނަ ދުވަހުގައި ހުޅުމާލޭ ދެވަނަ ފިޔަވަހިން އުމުރުން 27 އަހަރުގެ އަޙްމަދު އަޛުހާން ގެއްލިފައިވާއިރު އޭނާގެ ހަށިގަނޑު ކަމަށް ބެލެވޭ ހަށިގަނޑެއް މި މަހުގެ ދެވަނަ ދުވަހުގައި ހުޅުމާލޭ ސްކޭޓް ޕާކު ސަރަހައްދުގެ ގަސްތަކުގެ ތެރެއިން ފެނިފައިވާ ކަމަށެވެ. އަދި އެ ހަށިގަނޑު ފެނުނުއިރު ގިނަ ދުވަސްވެ ވަރަށް ބޮޑަށް ކުނިވެފައިވާކަން ފުލުހުން ހާމަކޮށްފައިވާ ކަމަށެވެ.

އާދަމް ޝަރީފު އިތުރަށް ވިދާޅުވީ އަޛުހާނުގެ ހަށިގަނޑު ފެނުނީ އޭނާ ދިރިހުއްޓައި އެންމެ ފަހުން ފެނުނު ސަރަހައްދާ ވަރަށް ކައިރި ސަރަހައްދަކުން ކަމަށެވެ. އަދި އަޛްހާން ހޯދުމުގެ މަސައްކަތް ފުލުހުން ކުރި ގޮތާމެދު ގިނަ ކަންބޮޑުވުންތަކެއް އާންމުން ފާހަގަކުރާ ކަމަށެވެ. އަދި އަޛުހާނު ގެއްލިގެން 14 ދުވަސް ފާއިތުވިއިރު އޭނާ ވީތަނަކާއި އޭނާއަށް ވީ ގޮތެއް ހޯދިފައިނުވާތީ ކަންބޮޑުވާ ކަމަށެވެ. އަދި އޭނާގެ މަރުގައި ޝައްކުވާ ބަޔަކު ނެތްކަމަށް ފުލުހުން ބުނާކަމަން އާދަމް ޝަރީފު ފާހަގަކުރެއްވިއެވެ.

އިތުރަށް އޭނާ ވިދާޅުވީ ފަހަކަށް އައިސް ރާއްޖޭގައި ގޮތް ނޭނގޭ މިފަދަ އެތައް މަރުތަކެއް ހިނގާއިރު އެކަންކަމާ ގުޅޭ އެކަށީގެންވާ މައުލޫމާތު އާންމުނުކުރާ ކަމަށާއި، އާންމުންނަށް ރައްކާތެރިކަން ކަށަވަރުކޮށްދިނުމުގައި ފުލުހުންނާއި ހޯމް މިނިސްޓްރީގެ ދައުރު ފުޅާކޮށް އެފަދަ މައްސަލަ ހައްލުކުރުމަށް ފުލުހުންގެ އިދާރާގެ ހުރިހާ ވަސީލަތެއް ބޭނުންކުރުމަށާއި، މިފަދަ ކަންކަން އިތުރުވާ ސަބަބުތައް ދެނެގަނެ އެ މައްސަލަތައް ހައްލުކުރުމަށް ސަރުކާރަށް ގޮވައިލައްވާ ކަމަށެވެ.

މެންބަރު އާދަމް ޝަރީފް ހުށަހެޅުއްވި މި ޚައްސާސް މައްސަލަ، މަޖިލީހަށް ހާޒިރުވި 53 މެންބަރުންގެ ތެރެއިން 25 މެންބަރުންގެ ތާއީދާއެކު މަޖިލީހަށް ބަލައިގެންފައިވާއިރު, އެ މައްސަލަ ބަލައިގަންނަން ނުފެންނަ ކަމަށް 11 މެންބަރުން ވަނީ ވޯޓު ދީފައެވެ.