ފުލުހުން ބަލަމުންދާ ބައެއް މައްސަލަ ތަކުގެ ތަހުގީގު އޮޅުވާލަން ބައެއް ފުލުހުން މަސައްކަތް ކުރާ ކަމަށް ބަންޑާރަ ނާއިބު އިބްރާހިމް ރިފްއަތު ވިދާޅުވި ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިފަދައިން ވިދާޅުވީ، ހުޅުމާލޭ ދެވަނަ ފިޔަވަހިން ގެއްލުނު މުހައްމަދު އަޒުހާން ހޯދުމުގައި ހުރި ކަންބޮޑުވުންތައް ފާޅުކޮށް މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު ހުށައެޅުއްވި ކުއްލި މައްސަލަ ބަހުސް ކުރައްވަމުން އެމްޑީޕީގެ ކުރީގެ ޗެއާޕާސަން އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ދެއްކެވި ވާހަކަފުޅާއި ގުޅިގެންނެވެ. 

އެގޮތުން އާދަމް ޝަރީފުގެ އެ މައްސަލަ އަށް ތާއީދު ކުރައްވައި ވާހަކަ ދައްކަވަމުން ހަސަން ލަތީފް ވިދާޅުވީ، މަޖިލީހަށް ހުށައެޅި އެ މައްސަލައަކީ ދިވެހި ޒުވާނެއް ގެއްލިގެން 14 ދުވަސް ވިއިރު އޭނާ ނުފެނި، އޭނާ ހޯދަން ކުރި މަސައްކަތުގެ މައުލޫމާތެއް މަޖިލީހަށް ނޭގި އޮތް އޮތުމުގެ ވާހަކަކަމަށެވެ. 

Advertisement

އަދި ހުޅުމާލެއިން ގެއްލުނު ޒުވާނާ ހޯދުމުގެ މަސައްކަތް އެކަށީގެންވާ ވަރަށް ކޮށްފައިވާކަމަށް ފުލުހުން ބުނެފައިވީ ނަމަވެސް އެކަން ގަބޫލުނުކުރައްވާކަން ފާހަގަކުރައްވައި ހަސަން ލަތީފް ވަނީ އެ މައްސަލާގައި އިހުމާލު ވާ ފަރާތްތަކާއި މެދު ފިޔަވަޅު އަޅަން ޖެހޭކަމަށް ވިދާޅުވެފައެވެ.

"އޭނާ ގެއްލިގެން 14 ދުވަސް ވީއިރު ފުލުހުން އޭނާ ހޯދަމުންދާ ކަމަށް ބުނި ކަމުގައިވީ ނަމަވެސް އެކަށީގެންވާ ގޮތެއްގައި އެކަން ކުރެވިފައި އޮތްކަމަކަށް ހަމަގައިމުވެސް އަޅުގަނޑު ގަބޫލެއް ނުކުރަން. އެއީ އޭނާގެ ހަށިގަނޑު ފެނުނު ސަރަހައްދުގެ ގޮތުންނާ އެކީގައި. އެކަން ފުލުހުން ރަނގަޅަށް ކުރިނަމަ އެއަށްވުރެ މާކުރިން އޮންނާނީ ފެނިފަ،" ހަސަން ލަތީފް ވިދާޅުވި އެވެ.

މީގެ އިތުރުން ހަސަން ލަތީފް ވިދާޅުވީ އެކަމާ ގުޅޭގޮތުން މަޖިލީހުގައި ކުރެވޭނެ ކަންކަމަކީ ކޮބައިތޯ ބަލައި ސަލާމަތީ ހިދުމަތްތަކާ ބެހޭ ކޮމިޓީންވެސް ކުރެވެންހުރި ކަންކަން ކުރަންޖެހޭ ކަމަށެވެ.
"މި މައްސަލަ ދިވެހި ސަރުކާރަށް ނުބެލޭނެ ކަމަށް ވަންޏާ އެއީ ވަރަށް ހިތާމަހުރި ކަމެއް. ރާއްޖޭގައި ކުރިން ހިނގާފައިހުރި މަރުގެ މައްސަލަތަކާއި، އަދި ގެއްލުވާލާފައިވާ މީހުންގެ މައްސަލަތައް ނުބެލި ދިއުމުގެ ސަަބަބުން ސަރުކާރާ ދޭތެރޭގައި އޮތް އިތުބާރު ދަނީ ގެއްލެމުން،" މަރުގެ މައްސަލަތަކުގައި ފަރުވާ ކުޑަކުރާތީ ކަންބޮޑުވުން ފާޅުކޮށް ހަސަން ލަތީފް ވިދާޅުވި އެވެ.

ހަސަން ލަތީފުގެ މި ވާހަކަތަކާއި ގުޅިގެން ރައީސް ނަޝީދު ރީޔާސަތުގައި އިންނަވައި ވިދާޅުވީ، ބައެއް ބާވަތުގެ ކަންކަމުގައި ތަހުގީގު ހިނގަމުންދާއިރު، ފުލުހުންގެ ތެރެއިން ބައެއް ބޭފުޅުން، ކަންކަން އޮޅުވާލައި، މައްސަލައިގެ މިސްރާބު އޮޅުވާލުމަށް މަސައްކަތް ކޮށްފައިވާކަން ފާހަގަވާކަމަސް ބަންޑާރަ ނާއިބު މަޖިލީހުގައި ވިދާޅުވެފައިވާ ކަމަށެވެ. 

ވުމާއެކު ފުލުހުންގެ ތަހުގީގާއި ގުޅުންހުރި އެފަދަ ކަންކަމާއި ގުޅިގެން މަޖިލީހުގެ މެންބަރުންގެ ހުރި ކަންބޮޑުވުންތައް އެމަނިކުފާނަަށް ގަބޫލުކުރެވޭ ކަމަށްވެސް ރައީސް ނަޝީދު ވިދާޅުވިއެވެ.