ޑިމޮކްރަސީގެ ދުވަސް ފާހަގަކޮށް، ޑިމޮކްރަސީ އާއި ގުޅިގެން ވާހަކަދެކެވޭއިރު، ދިވެހިރާއްޖޭގައި ޑިމޮކްރަސީ އަށްޓަކައި ތެދުވި މީހުންނަށް ލިބުނު އަނިޔާތަކާއި ލިބުނު ގެއްލުންތަކުގެ ހަނދާން އައު ކުރަންޖެހޭ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ. 

ބައިނަލްއަގުވާމީ ޑިމޮކްރަސީ ގެ ދުވަސް ފާހަގަކުރުމަށް ރައްޔިތުންގެ މަޖިލީހުން ކުރިއަށް ގެންދިޔަ މަޒުމޫނު ލިޔުމާއި ކުރެހުމުގެ މުބާރާތުގެ ނަތީޖާ ފައުޅުކުރުމަަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ނަޝީދު ވިދާޅުވީ، ދިވެހިންގެ ތެރެއިން ގިނަ މީހުންގެ ހިތްތަކުގައި މިހާރު ބިންވަޅު ނެގިފައިވަނީ ރާއްޖޭގައި މިހާރު ޢަމަލުކުރެވެމުންދާ ޤާނޫނު އަސާސީ ޑިމޮކްރަސީ އަށް ޖާގަދޭ ފުޅާ މިންވަރު ކަމަށެވެ. 

"ޚިޔާލު ފައުޅުކުރުމުގެ މިނިވަންކަން، އެއްވެ އުޅުމުގެ މިނިވަންކަން، ސުލްހަވެރި ސިޔާސީ ހަރަކާތް ހިންގުމުގެ މިނިވަންކަން، އަސާސީ އިންސާނީ ހައްގުތައް ރައްކާތެރިވެފައި އޮތުން، ވޯޓުގެ ޒަރީއާއިން ނޫނީ، އަދި ދެފުށް ފެންނަ މިނިވަން އިންތިހާބަކުން ނޫނީ ވެރިކަން ފޮރޮޅިގެން ނުދިޔުން. އެއް އަތުން އަނެއް އަތަށް ބަދަލު ނުވުން. ވެރިކަމެއް އުފެދިގެން އަންނަނީ ރައްޔިތުންގެ އުއްމީދުތަކާއި ރައްޔިތުންގެ އެދުންތައް، ރައްޔިތުންގެ އިހްސާސްތައް ހިމެނޭ ސިޔާސަތު ތަކެއް ތަންފީޒު ކުރުމަށް އެކުލަވާލެވޭ ސަރުކާރެއް މެދުވެރި ވެގެންކަން،" މިހާރުގެ ގާނޫނު އަސާސީން ރައްޔިތުންނަށް ލިބިދީފައިވާ ސިފަތަކުގެ ތެރެއިން ބައެއް ކަންކަން ފާހަގަކުރައްވަމުން ރައީސް ނަޝީދު ވިދާޅުވިއެވެ. 

Advertisement

މިއާއެކު ރައީސް ނަޝީދު ވިދާޅުވީ، ލާ މަރުކަޒީ ނިޒާމާއި، އެ ނިޒާމުގެ ތެރެއިން ރަށްރަށުގެ ތަރައްގީއަށް އަތޮޅު ކައުންސިލް ތަކާއި، ސިޓީ ކައުންސިލްތަކަށް ބައިވެވެން އޮތް މިންވަރު، މީގެ ކުރިއާއި އަޅާބަލާއިރު ހާސްބައި ފަރަގު ކަމަށެވެ. 

ރައީސް ނަޝީދު ވިދާޅުވީ މީގެ ކުރިން 1940 އިން ފެށިގެން 1980 އަހަރުތަކުގައިވެސް ރާއްޖޭގެ ރައްޔިތުން ޑިމޮކްރަސީއަށްޓަކައި އުފުލަމުން ގެންދިޔަ ވޭން މިއަދުގެ ބައެއް ޒުވާނުންނަށް ނޭނގިދާނެ ކަމަށެވެ. އަދި މިފަދަ ދުވަހެއްގައި، ޑިމޮކްރަސީ އަށްޓަކައި ތެދުވި ކޮންމެ މީހަކަށް ލިބުނު އަނިޔާ އާއި ގެއްލުން ހަނދާން ކުރަންޖެހޭ ކަމަށްވެސް ރައީސް ނަޝީދު ވިދާޅުވިއެވެ. 

ރައީސް ނަޝީދު އިތުރަށް ވިދާޅުވީ، ކުރިއަަށް އޮތް 2023 ވަނަ އަހަރުގެ އިންތިޚާބު، މިނިވަން އިންތިހާބަކަށް ވުމަކީ ނުހަނު ބޭނުންތެރި ކަމެއް ކަމަށާ، އެއީ ދެފުށް ފެންނަ ސުލްހަވެރި އިންތިހާބަކަށް ވާންޖެހޭ ކަމަށެވެ. އަދި ރާއްޖޭގެ ގާނޫނު ތަންފޭ އެންމެނަށް އެ އިންތިހާބުގައި ބައިވެރި ވެވޭނެ ކަމަށާ، ރާއްޖޭގެ ހުރިހާ ރައްޔިތުންނަށް ވެސް އެ މީހަކު ބޭނުން ގޮތަކަށް އިންތިހާބުގައި ވޯޓުލެވޭނެ ކަމަށް ނަޝީދު ވިދާޅުވިއެވެ. އަދި ރާއްޖޭގެ ޑިމޮކްރަޓިކް ނިޒާމް ދާނީ ދުވަހެއް ދުވަހަކަށް ފައްކާވެ ކުރިއަރަމުން ކަމަށްވެސް އެމަނިކުފާނު ވިދާޅުވިއެވެ.