ސަރުކާރުން އުޅެނީ ރޭޓިންގ އެޖެންސީތަކަށް ފިލައިގެން: ޝިޔާމް

ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް-- ފޮޓޯ: މަޖިލިސް

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރުން އުޅެނީ ރޭޓިންގ އެޖެންސީތަކަށް ފިލައިގެން ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވެއްޖެއެވެ. 

ސަރުކާރުގެ ފަރާތުން، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް ވެލިދޫ ދާއިރާގެ މެންބަރު މުޙައްމަދު ޝަފީޤް ހުށަހަޅުއްވާފައިވާ، އިޞްލާޙަށް ބަހުސް ކުރައްވަމުން ޝިޔާމް ވަނީ، ލާމަރުކަޒީ ނިޒާމް އަކީ އެމްޑީޕީ ބަނޑު އަޅައި ވިހޭ ދަރި ކަމަށް ދައުވާ ކުރާއިރު، އެ ނިޒާމް އެ ޕާޓީއާއި ހަވާލުކުރުމުން އެ ބަލަހައްޓާނެ ގޮތެއް އެމްޑީޕީއަށް ނޭނގުނު ކަމަށެވެ. އަދި އެ ނިޒާމުގެ ތެރެއިން ކަންކަން ހިނގާނެ ގޮތާއި ބެހޭގޮތުން ބައިނަލްއަގުވާމީ އެކިއެކި މާލީ އިދާރާތަކުން ދޭ އެއްވެސް ޚިޔާލަކާއި މަޝްވަރާއެއް ވެސް އަދުގެ ސަރުކާރުން އަޑު ނާހާ ކަމަށް ޝިޔާމް ވިދާޅުވި އެވެ. 
"ދިވެހިރާއްޖެއަށް ދުނިޔޭގެ މާލީ އިދާރާތަކުން އަންގާފައިވާ އެންގުންތައް ވެސް އަޑުއަހަނީކީ ނޫން، ބޮޑެތި ސިންގާހާ މާލީ އިދާރާތަކުން، ވޯލްޑް ބޭންކު، ބޮޑެތި ބޭންކުތަކުން ވަކިގޮތަކަށް އަމަލުކުރަން އިރުޝާދު ދިނީމަ އެ ބުނަނީ އެއީ އެތަނުގެ ފޮޅާ ސާފު ކުރާ މީހާ ބުނި އެއްޗެކޭ. އެއީ އެތަނުގެ ބަޔާނެެއް ނޫނޭ. ޖޭޕީ މޯގަންގެ ބަޔާނެއް ނޫނޭ. ވޯލްޑް ބޭންކުގެ ސްޓޭޓްމަންޓެއް ނޫނޭ. އެއީ އެތަނުގެ މަސައްކަތު މީހެއް ބުނެފައި އޮތް ވާހަކަ އެކޭ." ޝިޔާމް ވިދާޅުވިއެެވެ.

މިއާއެކު ޝިޔާމް ވަނީ، ދައުލަތުގެ ދަރަނި މިހާރު 108 ބިލިއަނަށް އަރާފައިވައިރު، ދައުލަތުގެ ޚަރަދު ކުޑަކުރަން ކުރީ ކޮން ކަމެއްތޯ ސުވާލު ކުރައްވާފައެވެ. އަދި ސަރުކާރު ރޭޓިންއެޖެންސީތަކަށް ފިލައިފިކަމަށާއި ރޭޓިން އެޖެންސީތަކުގެ ރޭޓިން މިހާރު ނުފެންނަ ކަން ފާހަގަކުރައްވައި ޝިޔާމް އިތުރަށް ވިދާޅުވީ، މި ސަރުކާރަށް ލޯނު ދޭ ފަރާތްތަކާއި ލޯނު ދޭ ބޭންކުތަކާއި އެކި އިދާރާތަކަށްވެސް ސަރުކާރު އުޅެނީ ފިލައިގެން ކަމަށެވެ. 

"ރޭޓިން އެޖެންސީތަކަށް ވެސް މި ސަރުކާރު ފިލައިގެން އުޅޭކަން އަޅުގަނޑުމެންނަށް މި އެގެނީ ރޭޓިން އެޖެންސީތަކުގެ ރޭޓިން ފެނިއްޖެތޯ، މިއިން ދުވަހަކު ނުފެނޭ ނޫންތޯ؟ މިހާރު ފިލައިގެންނޭ އުޅެނީ. އެއީ ދައުލަތް އޮރިޔާންވެފައި އޮތްވަރު ސޯޓް ފައިބާފައި އޮތްވަރު އެނގޭތީ މިހާރު ރޭޓިން އެޖެންސީއެއް ކައިރިއަށް ވެސް މިހާރު ނުދޭ." ޝިޔާމް ވިދާޅުވިއެވެ.

Advertisement

ކޮމެންޓް