ނަފްސާނީ ބަލިތަކަށް އިތުރު އިސްކަމެއްދީ، އެފަދަ ބަލިމީހުންނަށް ޚިދުމަތް ދިނުމަށް އެކަށީގެންވާ ބަޖެޓެއް ކަނޑައެޅުމަށް މޯލްޑިވްސް ރިފޯމް މޫވްމަންޓް (އެމްއާރްއެމް) އިން ގޮވާލައިފިއެވެ.
މިއަދު ފާހަގަ ކުރާ ބައިނަލްއަގުވާމީ ނަފްސާނީ ދުޅަހެޔޮކަމުގެ ދުވަހާއި ގުޅިގެން އެމްއާރްއެމް އިން ނެރުނު ބަޔާނެއްގައި ބުނީ، ނަފްސާނީ ބަލިތައް ތަހައްމަލު ކުރަމުންދާ މީހުންގެ އަދަދު ދުނިޔޭގެ ނިސްބަތުން ބެލިކަމުގައިވިޔަސް ދުވަހުން ދުވަހަކަށް އަންނަނީ އިތުރު ވަމުން ކަމަށެވެ.
އަދި މިފަދަ ބަލިތަކަށް ރާއްޖޭގައި ފަރުވާ ދިނުމަށް 2019ވަނަ އަހަރު އިންދިރާ ގާންދީ މެމޯރިއަލް ހޮސްޕިޓަލު (އައި.ޖީ.އެމް.އެޗް) ގައި "މެންޓަލް ހެލްތު" ކްލިނިކެއް ހުޅުވާފައިވާއިރު، ރިކޯޑުތަކުން ދައްކާ ގޮތުގައި 2019ވަނަ އަހަރު އެ ކްލިނިކަށް 7249 ބަލި މީހުން، 2020ވަނަ އަހަރު 17،708 މީހުން، 2021 ވަނަ އަހަރު 16،936 މީހުން އަދި 2022ވަނަ އަހަރުގެ ސެޕްޓެމްބަރ މަހާ ހަމައަށް 9746 މީހުން ނަފްސާނީ އެކިއެކި މައްސަލަތަކުގައި އެ ކްލިނިކުން ފަރުވާ ހޯދާފައިވާ ކަން އެ ބަޔާނުގައި ފާހަގަކޮށްފައިވެއެވެ.
ނަފްސާނީ ބަލިތަކުގެ ޝިކާރައަކަށް ވެފައިވާ މީހުންގެ އަދަދު މިހާ ބޮޑަށް އިތުރުވަމުން ދިޔަ ނަމަވެސް، އެ ބައްޔަށް ފަރުވާ ދިނުމަށް ބޭނުންވާ ކަމާބެހޭ މާހިރުން ވަރަށް ބޮޑަށް މަދުކަމަށް އެ ޕާޓީން ބުނެފައިވެއެވެ. އަދި އެފަދަ ފަރާތްތަކަށް ދޭ އިނާޔަތްތަކާއި، ފަރުވާ ދިނުމަށް ބޭނުން ކުރެވޭނެ ވަސީލަތްތަކުގެ އިތުރުން ނަފްސާނީ ބަލިތަކަށް އެޑުމިޓު ކޮށްގެން ފަރުވާ ދިނުމަށް ހުރި ވަސީލަތްތައް ވެސް އިންތިހާއަށް މަދުކަން ފާހަގަކޮށްފައިވެއެވެ.
ކޮވިޑް-19ގެ ހާލަތާ ގުޅިގެން ރާއްޖޭގައި ވެސް ނަފްސާނީ ބަލިތަކަށް ހުށަހެޅޭ މީހުންގެ އަދަދު ވަރަށް ގިނަވަމުން ދާތީ ނަފްސާނީ ބަލިތަކަށް ފަރުވާ ދިނުމަކީ މުޅި ދައުލަތުން ވެސް ނުހަނު އިސްކަމެއް ދޭންޖެހޭ ކަމެއްކަން ފާހަގަކޮށް އެބަޔާނުގައި ވަނީ، އެކަމަކީ އާއިލާތަކުގެ ދުޅަހެޔޮކަމަށާއި މުޖުތަމައުގެ ކުރިއެރުމާއި ހަމަ ޖެހުމަށް ވެސް ނުހަނު މުހިންމު ކަމެއް ކަމަށްވެސް ބުނެފައެވެ.
"އެހެންކަމުން މިފަދަ ބަލިތައް ތަހައްމަލު ކުރަމުންދާ ފަރާތްތަކަށް ފަރުވާ ދިނުމަށް ދައުލަތުގެ ބަޖެޓަށް އިތުރު ކޮށްގެން ނަމަވެސް، ކަމަށް ބޭނުންވާ އިންސާނީ ވަސީލަތްތަކާއި އެނޫންވެސް ވަސީލަތްތައް ގާއިމް ކުރުމަކީ ކޮންމެހެން ކުރަންޖެހޭ ކަމެއް ކަމުގައި މިޕާޓީން ދެކެމެވެ. އެގޮތުން ބަނދަރުތައް ހެދުމާއި މަގުތައް ހެދުންފަދަ ބައެއް ކަންކަމަށް ކަނޑައަޅާ ބަޖެޓު ކުޑަކޮށްފައި ނަމަވެސް ނަފްސާނީ ބަލިތައް ތަޙައްމަލު ކުރަމުންގެންދާ މީހުންނަށް ބޭނުންވާ ސިއްޙީ ޚިދުމަތްތައް ލިބޭނެ ގޮތްހެދުން މާ މުހިންމު ކަމަށް މި ޕާޓީއިން ދެކޭތީ، މިދާއިރާއަށް އެކަށީގެންވާ ބަޖެޓެއް ކަނޑައެޅުމަށް ކަމާބެހޭ މުއައްސަސާތަކަށް ގޮވާލަމެވެ." އެމްއާރްއެމްގެ ބަޔާނުގައިވެއެވެ.
މީގެއިތުރުން، ނަފްސާނީ ބައްޔަކީ ބައްޔެއް ނޫން ކަމަށް ބަލައި އެފަދަ މީހުންނަށް ފުރައްސާރަ ކުރުން ހުއްޓާލައި އެމީހުންނަށް ބޭނުންވާ އޯގާތެރިކަމާއި އަޅާލުން އިތުރު ކުރުމަށް މުޅި މުޖުތަމަޢުއަށް ވެސް އެ ޕާޓީން ވަނީ އިލްތިމާސް ކޮށްފައެވެ.
Advertisement
This content is created and paid for by advertisers and does not involve Voice Journalists
