1443 ވަނަ އަހަރުގެ ހައްޖުވެރިން ސައޫދީއަށް ފުރުމުގެ ކުރިން ހަދަން ޖެހުނު ޕީސީއާރް ޓެސްޓް މެޑިފްލެކްސް ލެބޯޓަރީން ހަދަން ހަވާލުކުރީ އައިޖީއެމްއެޗްގެ އައިޖީއެމްއެޗް އަށްވުރެ އެތަން އަގު ހެޔޮވީމާ ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު މިއަދު ވިދާޅުވެއްޖެ އެވެ.

މިނިސްޓަރު މިފަދައިން ވިދާޅުވީ، ސަރުކާރުން ހިންގާ ހޮސްޕިޓަލްތަކުން ހައްޖުވެރިންނަށް ކޮވިޑް ޓެސްޓު ހެދޭނެ ގޮތް ހަމަޖެހިފައި ވަނިކޮށް ހައްޖު ކޯޕަރޭޝަނުން އެއްވެސް އަމިއްލަ ކްލިނިކަކަށް ފައިސާ ދައްކައިގެން ކޮވިޑް ޓެސްޓު ހައްދަވާފައިވާނެތޯ އާއި، ހަދާފައި ވާނަމަ އެއީ ކޮށް ތަނެއްތޯ އާއި އަދި އެތަނުން ޓެސްޓު ހެދީ ކިތައް ރުފިޔާ އަށްތޯ މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ކުރެއްވި ސުވާލަކަށް ލިޔުމުން ފޮނުވި ޖަވާބުގައެވެ.

މިނިސްޓަރު ގެ ޖަވާބު މިއަދު މަޖިލީގައި އިއްވާފައިވާއިރު، އޭގައި މިނިސްޓަރު ވިދާޅުވީ، ހައްޖުވެރިންގެ ޕީސީއާރް ޓެސްޓް ހަދައިދޭނެ ބަޔަކު ހޯދަން އިއުލާންކުރީ ހައްޖު ކޯޕަރޭޝަންގެ ޕްރޮކިއުމަންޓް ޕޮލިސީގެ ދަށުން ކަމަށެވެ.

Advertisement

އަދި އެގޮތުން ކުރި ޢިއުލާނާއި ގުޅިގެން އެންމެ ހެޔޮ އަގެއް ހުށަހަޅާފައި ވަނީ މެޑިފްލެކްސް އިން ކަމަށާއި އެ ކުންފުނިން ޕީސީއާރް ޓެސްޓުތައް ހަދާފައި ވަނީ ބޮލަކަށް 200ރ. ގެ ރޭޓުން ކަމަށް މިނިސްޓަރު ވިދާޅުވި އެވެ. އަދި އައިޖީއެމްއެޗުން އެ ހިދުމަތް ދެނީ ބޮލަކަށް 700ރ. ގެ ރޭޓުން ކަމަށް ވެސް މިނިސްޓަރު ވިދާޅުވެފައިވެ އެވެ.

އޭގެ އިތުރުން ފުލުހުން މެދުވެރިކޮށް ޕީސީއާރް ޓެސްޓުތައް ހަދަން ވެސް މަސައްކަތް ކުރެއްވި ކަމަށާ އެހެން ނަމަވެސް އެކަމަށް ބޭނުންވާ ކެމިކަލް ފުލުހުންގެ އަތުގައި ނެތް ކަމަށް ފުލުހުން ބުނެފައިވާ ކަމަށް މިނިސްޓަރު ވިދާޅުވިއެވެ. އަދި އެ ކެމިކަލް ހޯދަން ހެލްތު ޕްރޮޓެކްޝަން އެޖަންސީ (އެޗްޕީއޭ) އާ އެކީ ކުރި މަސައްކަތް ކާމިޔާބު ނުވި ކަމަށާ، ފުލުހުން އިދާރާއިން އެ ޓެސްޓް ނުހެދުނީ އެ ސަބަބާ ހުރެ ކަމަށް މިނިސްޓަރު ވިދާޅުވެފައި ވެ އެވެ.

މީގެ އިތުރުން ބޮންޑެ ވަނީ ހައްޖުވެރިންގެ އެހީތެރިންގެ ގޮތުގައި އަދާލަތު ޕާޓީގެ ބައެއް މެމްބަރުންނާއި މިނިސްޓްރީގެ ވަކިވަކި މުއައްޒަފުންތަކަކަށް ފުރުސަތު ދިންތޯ ވެސް ސުވާލުކުރައްވާފައެވެ.

އެ ސުވާލުގެ ޖަވާބުގައި ޑރ.ޒާހިރު ފޮނުއްވި ސިޓީގައި ވިދާޅުވެފައި ވަނީ އެހީތެރިން ހޮވާފައި ވަނީ ހައްޖު ކޯޕަރޭޝަންގެ ފޮލިސީގައި ވާގޮތުން އާންމުކޮށް އިއުލާންކޮށް އިންޓަވިއުކޮށް އެންމެ މަތިން މާކްސް ލިބުނު މީހުންނަށް ބަލައިގެން ކަމަށެވެ. ހައްޖު ދަތުރުގެ އެހީތެރިއެއް ގޮތުގައި މިނސްޓްރީގެ އެދުމަށް މިނިސްޓްރީގެ އެއް މުއައްޒަފަކު ބައިވެރިކޮށްފައިވާ ކަމަށް ވެސް ޒާހިރު ވިދާޅުވި އެވެ.