ކޮންމެ އަހަރަކުވެސް ދިވެހިރާއްޖެއަށް ލިބޭ ހައްޖު ކޯޓާއަށްވުރެ އިތުރަށް  ކޯޓާ ހޯދުމަށްޓަކައި ރައީސުލް ޖުމްހޫރިއްޔާގެ އޮފީހުން ސައުދީ ސަރުކާރަށް ފޮނުއްވި ސިޓީގެ ޖަވާބު ލިބިލައްވާފައިވޭތޯ އިސްލާމިކް މިނިސްޓްރީއިން ފުރަތަމަ ބައްލަވާފައިވެސް ވަނީ ސިޓީ ފޮނުއްވިތާ 2 އަހަރުފަހުންކަން ހާމަވެއްޖެއެވެ. 

އެކަން ހާމަވެފައިވަނީ ރައްޔިތުންގެ މަޖިލީހުގެ ތިން ވަނަ ދައުރުގެ 23 ވަނަ ޖަލްސާގައި މަޖިލީހުގެ މާފަންނު މެދުދާއިރާގެ މެމްބަރު އިބުރާހިމް ރަޝީރު (ބޮންޑެ) މިނިސްޓަރ އޮފް އިސްލާމިކް އެފެއާޒް ޑރ އަހުމަދު ޒާހިރުއާއި ލިޔުމުން ޖަވާބު ހޯއްދެވުމަށް ކުރެއްވި ސުވާލުގެ ޖަވާބު މަޖިލީހުގައި އިއްވެވުމުންނެވެ. 

ބޮންޑެ ވަނީ ކޮންމެ އަހަރަކުވެސް ރާއްޖެއަށް ނިސްބަތުން ލިބޭ ކޯޓާއަށްވުރެ އިތުރަށް ރާއްޖެއަށް އާ ކޯޓާ ލިބެމުންދިޔަ ނަމަވެސް  1443 ވަނަ އަހަރުގެ ހައްޖު ދަތުރާއި ގުޅިގެން އާ ކޯޓާ ރާއްޖެއަށް ލިބިފައި ނުވާކަން ފާހަގަކުރައްވާ، ހައްޖަށް މީހުން ގެންދިއުމަށް ރާއްޖެއަށް ނިސްބަތުން ލިބުނު ކޯޓާގެ މިންވަރު އިތުުރުކުރުމަށް ކުރެވުނު މަސައްކަަތަކީ ކޮބައިތޯއާއި، އަދި އިތުރު ކޯޓާ ނުލިބުނު ސަބަބަކީ ކޮބައިތޯ އައްސަވާ އިސްލާމިކް މިނިސްޓަރު އަރިހުން ސުވާލުކުރައްވާފައެވެ. 

އެ ސުވާލުގެ ގަބާދު ލިޔުމުން މިނިސްޓަރު ހުށައަޅާފައިވާއިރު، ވިދާޅުވެފައިވަނީ ދިވެހިރާއްޖެއަށް ލިބޭ ރަސްމީ ކޯޓާގެ އަަދަދުގެ އިތުރުން 1500 ކޯޓާ އިތުރުކޮށް މުޅި ޖުމްލަ 2500 ކޯޓާ ރާއްޖެއަށް ހަމަޖައްސާދެއްވުމަށް އެދި 16 ޖެނުއަރީ 2020 ގައި ރައީސުލްޖުމްހޫރިއްޔާ އިބުރާހިމް މުހައްމަދު ސޯލިހު ސައުދިއަރަބިއްޔާގެ ރަސްގެފާނަށް އަރަބި ބަހުން ސިޓީފުޅެއް ފޮނުއްވާފައިވާކަމަށެވެ. 

އެ ސިޓީފުޅާއި ގުޅިގެން ސައުދީ ސަރުކާރުން އެއްވެސް ޖަވާބެއް ދެއްވާފައި ވޭތޯ ބެލުމަށް 8 ފެބުރުއަރީ 2022 ގައި އިސްލާމިކް މިނިސްޓްރީއިން ރައީސް އޮފީހަށް ސިޓީ ފޮނުވާފައިވާނެކަމަށް މިނިސްޓަރު ޒާހިރު ވިދާޅުވިއެވެ. އަދި އޭގެ އިތުރުންވެސް އެކަމާއި ގުޅޭގޮތުން މައުލޫމާތެއް ލިބިފައިވޭތޯ ބެލުމަށް އެކިފަހަރުމަތިން މިނިސްޓްރީއޮފް ފޮރިން އެފެއާޒްއާއި މުއާމަލާތުތައް ކުރެވިފައިވާނެކަމަށް މިނިސްޓަރު ވިދާޅުވިއެވެ. 

އެހެން ނަމަވެސް ކުރެވުނު މަސައްކަތުން އެއްވެސް ޖަވާބެއް ލިބިފައިވާކަމެއް ނުވަތަ ނޫންކަމެއް މިނިސްޓަރު އެ ޖަވާބުގައި ބަޔާންކޮށްފައެއް ނުވެއެވެ. 

ހަމައެހެންމެ ރަސްމީކޮށް ރާއްޖެއަށް ކަނޑައަޅާފައިވާ ކޯޓާގެ އިތުުރުން އާންމު ކޯޓާ ނުލިބުނު ސަބަބާއި ގުޅިގެން މެމްބަރު އެއްސެވި ސުވާލަށް އިސްލާމިކް މިނިސްޓަރު އެއްވެސް ޖަވާބެއް އަރުވާފައެއް ނުވެއެވެ. 

އެ ޖަވާބުން ފާހަގަވާން އޮތީ، ހައްޖު ކޯޓާ އިތުރުކުރުމަށް ރައީސް އޮފީހުން ފޮނުވި ސިޓީއެއްގެ ޖަވާބު ހޯދުމަށް އޭގެ ދެ އަހަރުފަހުން އިސްލާމިކް މިނިސްޓްރީއިން މަސައްކަތްކޮށްފައިވާކަން އެކަންޏެވެ.