ރާއްޖޭގެ އިގްތިސާދީ ހާލަތު ބަޔާންކުރެއްވުމަށް ފިނޭންސް މިނިސްޓަރު އިބްރާހިމް އަމީރު ބައިވެރިވެވަޑައިގެން ބޭއްވި ނޫސްވެރިންގެ ބައްދަލުުވުމަށް ކުރީގެ އިކޮނޮމިކް މިނިސްޓަރު އަދި މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ފާޑުވިދާޅުވެއްޖެއެވެ. 

ސައީދު މިނިސްޓަރު އަމީރަށް ފާޑުކިޔުންތައް އަމާޒުކުރައްވާފައިވަނީ ޕްރެސް ކޮންފަރެންސްގައި މިނިސްޓަރު ދެއްކެވި ބައެއް ވާހަކަތަކަށް އަލިއަޅުވާލާ ކުރެއްވި ޓްވީޓެއްގައެވެ. 

އެ ޓްވީޓުގައި އެންމެ ފުރަތަމަވެސް ސައީދު ވިދާޅުވެފައިވަނީ މުޅި ޕްރެސް ކޮންފަރެންސްގައި ފިނޭންސް މިނިސްޓަރު އާ ވާހަކަފުޅެއް ވިދާޅުވެފައި ނުވާކަމަށެވެ. އަދި މިނިސްޓަރު ކުރެއްވިހާވެސް ކަމަކީ ޓުއަރިމް އޮކިއުޕެންސީގެ ފުރަގަހުގައި ހުންނަވާ ތަސައްވަރު އޮޅުވާލުންކަމަށް ސައީދު ވިދާޅުވިއެވެ.

Advertisement

މިއަދުގެ ޕްރެސް ކޮންފަރެންސްގައި ފިނޭންސް މިނިސްޓަރު އަމީރު ވިދާޅުވީ 2022 ވަނަ އަހަރު ރާއްޖެއަށް އަންނާނެކަމަށް އަންދާޒާކުރި ވަރަށް، ނުވަތަ އެ ޓާގެޓު ހާސިލްކުރެވޭނެކަމުގެ ފުރިހަމަ ޔަގީންކަން އޮތްކަމަށެވެ. އެކަމާއި ގުޅޭ ތަފްސީލުތައްވެސް މިނިސްޓަރު ވަނީ ހާމަކުރައްވާފައެވެ.

އެގޮތުން ވިދާޅުވީ 2022 ވަނަ އަހަރު ދިވެހިރާއްޖެއަށް ފަތުރުވެރިން ޒިޔާރަތްކުރި މިންވަރު ހުރީ 2019 ވަނަ އަހަރާއި ދާދި އެއް ހިސާބެއްގައިކަމަށެވެ. 2022 ވަނަ އަހަރު ދުވާލަކު އެއްވްރެޖުކޮށް 4582 ފަތުުރުވެރިން ރާއްޖެއަށް ޒިޔާރަތްކޮށްފައިވާއިރު، މިއަހަރުގެ މިހާތަނަށް ލިބިފައިވާ ހިސާބުތަކަށް ބަލާއިރު އެވްރެޖުކޮށް ދުވާލަކު 4372 ފަތުރުވެރިން ރާއްޖެއަށް ޒިޔާރަތްކުރަމުން އަންނަކަމަށް މިނިސްޓަރު ވިދާޅުވިއެވެ. އަދި ވިދާޅުވީ 2023 ވަނަ އަހަރު ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ކޯވިޑްގެ ކުރިން ޒިޔާރަތްކުރަމުންދިޔަ މިންވަރަށް އިތުރުވާނެކަމަށް ލަފާކުރެވޭކަމަށެވެ. އަދި އޭގެ ސަބަބުން ރާއްޖޭގެ އިގްތިސާދުވެސް ކުރިއަރާނެކަމަށް ބެލެނޭކަމަށެވެ. 

މިނިސްޓަރުގެ އެ ވާހަކަތަކާއި ގުޅިގެން ސައީދު ވިދާޅުވީ، ޕްރެސްކޮންފަރެންސްގައި މިނިސްޓަރު ކުރެއްވިހާވެސް ކަމަކީ ޓުއަރިޒަމް އޮކިއުޕަންސީގެ ފަހަތުގައި ހުންނަވާ ތަސައްވަރު އޮޅުވާލެއްވުންކަމަށެވެ. 

މެދުރާސްތާގެ ޕްލޭނެއްކަމަށް ވިދާޅުވި ޕްލޭނަކީވެސް 2023 ގެ ފަސް ކަމަށާއި، އެއީ ކަންކަމުން ރެކެން ވިދާޅުވާއެއްޗެއްކަމަށް ސައީދު ވިދާޅުވިއެވެ. އަދި 2023 އަކީ ރިޔާސީ އިންތިޚާބު އޮންނަ އަހަރުކަންވެސް ސައީދު ފާހަގަކުރައްވާފައިވެއެވެ. 

ސައީދު ވިދާޅުވީ މިނިސްޓަރު އަމީރު ފާހަގަނުކުރެއްވި ނަމަވެސް މިހާރު ރާއްޖޭގެ އިގްތިސާދަށް މިދާވެގެން އުޅޭ ހަގީގީ މައްސަލައަކީ ދަރަނި އިތުރުކޮށް މަތިބަރު ސަރުކާރެއް ހިންގަން މަސައްކަތް ކުރުންކަމަށެވެ. އެގޮތުން ހާލަތާއި ނުބައްދަލު އެތައް ޚަރަދެއްކުރަމުންދާއިރު، ސަރުކާރުގެ ކުންފުނިތަކުގެ ޕޭރޯލް، ސިޔާސީ ދަރަނީގެ ހާއްޔަކަށް ހަދާފައިވާކަމަށް އޭނާ ވިދާޅުވިއެވެ.

ސޮވެރިން ޑިވެލޮޕްމަންޓު ފަންޑުގައިހުރި ޑޮލަރުކޮޅު ހުސްކޮށްލުމުގެ އިތުރަށް ޔޫޒަބަލްރިޒާވު އިންތިހާޔަށް ދިއުމަކީވެސް ރާއްޖޭގެ އިގްތިސާދަށް ދިމާވެފައިވާ ބޮޑު ގޮންޖެހުމެއްކަން ސައީދުގެ ޓްވީޓުގއި ފާހަގަކުރެއްވިއެވެ. 

އެއާއެކު ސައީދު އިތުރަށް ވިދާޅުވީ ސަރުކާރުން ނަގާ ދަރަނި ބޭނުންކުރަމުންދަނީ އާމްދަނީ އިތުރު ކުރުމުގެ ބަދަލުގައި ސަރުކާރު ހިންގުމަށްކަމަށް ފިޗްގެ ރިޕޯޓުގައި ބުނެފައިވާކަމަށެވެ. އަދި ރާއްޖެއަށް ލޯނު ދޫކުރާ ފަރާތްތަކުން ބުނާ ގޮތް ސަރުކާރުން ހަދަންޖެހޭނެކަމަށް ރިޕޯޓުގައި ބަޔާންކޮށްފައިވާކަމަށް ސައީދު ވިދާޅުވިއެވެ. އަދި އެއީ އިދިކޮޅުންވެސް ބުނަމުންދާ ވާހަކައެއްކަމަށް ވިދާޅުވިއެވެ. 

އެކަންކަން ފާހަގަކުރައްވާ ސައީދު ވިދާޅުވީ ކަންކަން އިސްލާހުކުރުމުގެ ވިސްނުން ހަގީގަތުގައި ސަރުކާރުން ނުގެންގުޅޭކަމަށެވެ. އަދި ކަންކަން އިސްލާހު ކުރުމުގެ އެއްވެސް ހެޔޮ ނިޔަތެއް ސަރުކާރުގެ އޮތް ނަމަ ރަދަށް ޒިއްމާވުމުގެ ޤާނޫނު ސަސްޕެންޑްކޮއްފަ ފައިސާޗާޕްކުރުމުގެ އިތުރަށް ޓެކްސްބޮޑުކުރަން ހުށަނާޅާނެކަމަށް ސައީދުގެ ޓްވީޓުގައި ވަނީ ވިދާޅުވެފައެވެ.