ބޭންކް އޮފް މޯލްޑިވްސްގެ އެކި ދާއިރާތަކުގައި މަސައްކަތް ކުރާ އެންމެ ރަނގަޅު މުވައްޒަފުން ފާހަގަކޮށް އެ ފަރާތްތަކުގެ އަގުވަޒަން ކުރުމުގެ ގޮތުން ބީއެމްއެލްއިން ޚާއްސަ އެވޯޑެއް ދީފިއެވެ. 

މި އެވޯޑުތައް އެ ކުންފުނިން ދީފައިވަނީ ބީއެމްއެލްގެ އަހަރީ އެ ވޯޑު ދިނުމަށް ސޯސަލް ސެންޓަރުގައި ބޭއްވު ޚާއްސަ ހަފްލާއެއްގައެވެ. 

ބީއެމްއެލް އަށް ފާހަގަކޮށްލެވޭ ހިދުމަތް ކޮށްފައިވާ މުވައްޒަފުންނާއި ޓީމުތަކުގެ އަގުވަޒަންކުރުމަށް އެވޯޑު ދިން ދާއިރާތަކުގެ ތެރޭގައި އަތޮޅުތެރެއިން އެންމެ ރަނގަޅު ބްރާންޗް، އެންމެ ރަނގަޅު ޓީމް، އަތޮޅުތެރެއިން އެންމެ ރަނގަޅު މުވައްޒަފު، ކަސްޓަމަރ ސާވިސް ސްޓާ އަދި އެވޯޑް ފޯ އިނޮވޭޝަން އެވޯޑް ހިމެނެ އެވެ.

ރޭގެ ހަފްލާގައި މުވައްޒަފުންނަށް އެވޯޑުތައް ހަވާލުކޮށްދެއްވާފައިވަނީ ބީއެމްއެލްގެ ވަގުތީ މެނޭޖިން ޑިރެކްޓަރު އައިޝަތު ނޫރައްދީނާއި ބޭންކުގެ ބޯޑު ޑިރެކްޓަރުންނާއި އެގްޒެކެޓިވް ކޮމިޓީގެ މެންބަރުންނެވެ.

ބީއެމްއެލްގެ ޚާއްސަ އެވޯޑު މި އަހަރު ދެ ފަރާތަކަށް ވަނީ ލިބިފައެވެ. މި އެވޯޑް ލިބުނީ ބީއެމްއެލްގެ ނޯތު ކްލަސްޓަ މެނޭޖަރު ހަސަން އަގްލީމް އާއި ހެޑް އޮފް ޕީޕަލް ޑިވެލޮޕްމެންޓް މުހައްމަދު އަޝްރަފަށެވެ.

އޭގެ އިތުރުން، އެންމެ ފާހަގަކޮށްލެވޭ ކާމިޔާބީ ހޯދި، ސީއީއޯ ދެއްވާ އެވޯޑު، "ސީއީއޯ އެވޯޑް ފޯ އައުޓްސްޓޭންޑިން އެޗީވްމެންޓް" ހާސިލްކޮށްފައި ވަނީ ހެޑް އޮފް ކާޑްސް އެންޑް ޕޭމަންޓް ގަވަނެންސް ފާތިމަތު ފާރިހަތު ވަހީދު އާއި ސީނިއާ މެނޭޖަރު، ޕްރިމިއަމް ބޭންކިން އަބްދުﷲ ސޮބާހު އަދި ބީއެމްއެލް މޯބައިލް އެޕް ޓީމުގެ މުވައްޒަފުންނަށެވެ.

އެންމެ ރަނގަޅު ލީޑަރަށް ދޭ އެވޯޑު ޕަބްލިކް ރިލޭޝަން މެނޭޖަރު މުހައްމަދު ސައީދު ހޯދާފައިވާއިރު، އެންމެ ރަނގަޅު މެނޭޖަރުގެ އެވޯޑު ހާސިލްކޮށްފައި ވަނީ ބީއެމްއެލްގެ ކޮމްޕްލައެންސް މެނޭޖަރު ޒައިދު މުހައްމަދެވެ.

ބީއެމްއެލުން ފާހަގަކުރާ ގޮތުގައި، ބޭންކް އޮފް މޯލްޑިވްސްގެ ޚިދުމަތްތައް ރައްޔިތުންނަށް ފޯރުކޮށްދިނުމަށް މުވައްޒަފުން ކުރައްވާ މަސައްކަތް ފާހަގަކޮށް ދޭ ޚާއްސަ އެވޯޑަކީ އެ ކުންފުނީގެ ހިއުމަން ރިސޯސް ސްޓްރެޓެޖީގެ މުހިންމު ބައެއް ކަމަށެވެ.