ގެދޮރިވެރިކަމުގެ ޕޯޓަލް މެދުވެރިކޮށް 35000އަށް ވުރެ ގިނަ މީހުން ބޯހިޔާވަހިކަމަށް އެދި އެޕްލިކޭޝަން ހުށައަޅާފައިވާކަމަށް ޕްލޭނިން މިނިސްޓްރީގެ ސްޓޭޓް މިނިސްޓަރު އަކުރަމް ކަމާލުއްދީން ވިދާޅުވެއްޖެއެވެ. 

"ގެދޮރުވެރިކަމުގެ ޕޯޓަލް" އަކީ ކިއުގައި ނުޖެހި ބޯހިޔާވަހިކަމަށް އެދި ހުށައަޅާ ފޯމުތައް ހުށައެޅުމުގެ ފުރުސަތު ފަހިކޮށްދިނުމަށް މި ސަރުކާރުން ތައާރަފްކުރި އޮންލައިން ޕްލެޓްފޯމެކެވެ. 

އެގޮތުން ސްޓޭޓް މިނިސްޓަރު އަކުރަމް ކަމާލުއްދީން ކުރެއްވި ޓްވީޓެއްގައި ވިދާޅުވީ ކިއޫގައި ނުޖެހި ބޯހިޔާވަހިކަމަށް އެދޭނެ ނިޒާމެއް ގާއިމްކޮށްދިނުމަށް ރައީސުލްޖުމްހޫރިއްޔާ އިބުރާހިމް މުހައްމަދު ސޯލިހު ވެ ވަޑައިގެންނެވި ވައުދުފުޅުގެ ދަށުން ފަރުމާކުރެވުނު "ގެދޮރިވެރިން ޕޯޓަލް" އަށް ތަކުލީފާއި ނުލާ ފޯމު ހުށައެޅުމަަށް ހުޅުވާލި ފުރުސަތުގެ ސުންގަނޑި ހަމަވިއިރު، 35861 އެޕްލިކޭޝަން ހުށައަޅާފައިވާކަމަށެވެ. 

Advertisement

އޭގެ ތެރޭގައި ހިމެނެނީ ބިންވެރިޔާ ސްކީމަށް ހުށައެޅި 15164 ފޯމާއި، ގެދޮރުވެރިޔާ ސްކީމުގެ 3 ކޮޓަރީގެ އެޕާޓުމަންޓަށް ހުށައެޅި 14489 ފޯމުގެ އިތުރުން، ގެދޮރުވެރިޔާ ސްކީމުގެ 2 ކޮޓަރީގެ އެޕާޓުމަންޓަށް ހުށައެޅި 6208 ފޯމެވެ. 

މިއީ މިފަދަ ޕޯޓަލްއެއް މެދުވެރިކޮށް ބޯހިޔާވަހިކަމަށް އެދި ހުށައަޅާ ފުރަތަމަ ފަހަރުކަން ފާހަގަކޮށްލެވެއެވެ. މީގެ ކުރިން މިފަދަ ސްކީމުތަކުގައި ބައިވެރިވުމަށް، ފޯމު ހުށައަޅަން ޖެހެނީ ކިއުގައި ޖެހިގެންނެވެ. 

އެހެން ނަމަވެސް އޮންލައިން ޕްލެޓްފޯމެއް ތައާރަފްކުރުމާއެކު، ކިއުގައި ޖެހިގެން ފޯމު ހުށައަޅަން ޖެހޭ މައްސަލައަށް މިވަނީ ހައްލެއް ލިބިގެން ގޮސްފައެވެ.