1443 ވަނަ އަހަރުގެ ހައްޖުގައި ހައްޖު ކޯޕަރޭޝަނުން ހާޖީންނަށް ކޮފީ އާއި ޕެނަޑޯލް ވިއްކާފައިވާ ކަމަށް އިސްލާމިކް މިނިސްޓަރު ޑރ އަހުމަދު ޒާހިރު ވިދާޅުވެއްޖެއެވެ.

މިނިސްޓަރު މިފަދައިން ވިދާޅުވީ މިއަދު އޮތް ރައްޔިތުންގެ މަޖިލީހުގެ ޖަލްސާގައި މާފަންނު މެދު ދާއިރާގެ މެމްބަރު އިބްރާޙިމް ރަޝީދު (ބޮންޑެ) އިސްލާމިކް މިނިސްޓަރު ޑރ އަލީ ޒާހިރު އާއި ކުރެއްވި ސުވާލަަށް ލިޔުމުން ފޮނުވި ޖަވާބުގައެވެ. 

އެގޮތުން ބޮންޑެ ކުރެއްވި ސުވާލުގައި ވަނީ, ހާޖީންނަށް ބޭނުންވާ ކެއުމާއި ބޭސްފަރުވާގެ ކަންކަން އެހެނިހެން ޖަމާއަތްތަކުން ކޮށްދެނީ ހިލޭ ކަމަށެވެ. އެހެން ނަމަވެސް، 1443 ވަނަ އަހަރު ހައްޖު ކޯޕަރޭޝަންގެ ފަރާތުން ހައްޖަށް ދިޔަ ހާޖީންނަށް ކޮފީ ވިއްކި ކަމާއި ހާޖީންނަށް ޕެނަޑޯލް ގުޅައެއް ދެ ރިޔާލަށް ވިއްކި ކަމުގެ ޝަކުވާ އިސްލާމިކް މިނިސްޓްރީ އަށް ހުށައެޅި ހައްލުކޮށް ނުދެވިފައިވާ ކަމަަށް ހާޖީންގެ ފަރާތުން މައުލޫމާތު ލިބޭކަމަށެވެ.  އެކަން ހައްލުކުރުމަށް އިސްލާމިކް މިނިސްޓަރު މަސައްކަތް ކުރެއްވި ނަމަ އެކަމުގެ ތަފްސީލަށް އެ ސިޓީގައި އެދިފައިވެއެވެ.

Advertisement

މެމްބަރު އިބްރާޙިމް ރަޝީދުގެ ޖަވާބުގައި ޑރ އަހުމަދު ޒާހިރު ވިދާޅުވީ ހައްޖު ކޯޕަރޭޝަންގެ ފަރާތުން 1443 ވަނަ އަހަރުގެ ހައްޖުގައި ކޮފީ ވިއްކާ ކަމުގެ ޝަކުވާ ބައެއް ހައްޖުވެރިންގެ ފަރާތުން ލިބުމުން އެއީ ކިހިނެތް ހިނގާ ކަމެއްތޯ ބެލިއިރު ހައްޖު ދަތުރުގައި ހާޖީންނަށް ދެވޭ ތިންއިރު ކެއުމާއި ހަވީރު ސައިގެ އިތުރުން އެހެނިހެން ވަގުތު ތަކުގައި އިތުރު ހިދުމަތެއްގެ ގޮތުގައި ލޮބީގައި ކޮފީ ސޮޕެއް ހުޅުވައި ކޮފީ ގަންނަން ބޭނުންވި ފަރާތްތަކަށް އެހިދުމަތް ފޯރުކޮށްދިނުމަށްޓަކައި ކޮފީ ޝޮޕްގައި ކޮފީ ވިއްކާފައިވާ ކަމަށެވެ. 

އަދި ހައްޖުވެރިންނަށް ޕެނަޑޯލް ވިއްކި ކަމުގެ ޝަކުވާ މިނިސްޓްރީއަށް ލިބިފައި ނުވާ ކަމަށާ، އެހެން ނަމަވެސް، ޕެނަޑޯލް ގަންނަން ބޭނުންވި ފަރާތްތަކަށް ޕެނަޑޯލް ވިއްކާފައިވާ ކަމަށްވެސް އެ ސިޓީގައި ބުނެފައި ވެއެވެ.