ޓޫރިޒަމް ޖީއެސްޓީ އާއި ތިމާވެށި ހިމާޔަތް ކުރަން ނަގަން ފެށި ޓެކްސް، ގްރީން ޓެކުހުގެ ގޮތުގައި ނުލިބި ހުރި ފައިސާ، އެއް ބިލިއަން ރުފިޔާ އަށް އަރާ ކަމަށް ހާމަވެއްޖެއެވެ.

ޓެކްސްތަކާ ގުޅޭ ގޮތުން މާފަންނު މެދު ދާއިރާގެ މެންބަރު އިބްރާހިމް ރަޝީދު ފިނޭންސް މިނިސްޓަރު އިބްރާހިމް އަމީރާ ކުރެއްވި ސުވާލަށް މިނިސްޓަރު ލިޔުމުން ދެއްވި ޖަވާބު މަޖިލީހުގެ މިއަދުގެ ޖަލްސާގައި ވަނީ އިއްވާފައިވާއިރު، އަމީރު ފޮނުއްވި ޖަވާބުގައި އޭނާ ވަނީ، ރިސޯޓުތަކާއި ހޮޓާތަކާއި ގެސްޓްހައުސްތަކާއި ސަފާރީ އުޅަނދުތަކުން އެ ތަންތަނުގައި ތިބޭ ފަތުރުވެރިންގެ އަތުން ނެގުމަށް ފަހު ދައުލަތަށް ދައްކަން ޖެހޭ އެ ދެ ޓެކްސް އިން ނުލިބި ހުރި ފައިސާގެ މިންވަރު ހާމަކުރައްވާފަ އެވެ.

އެގޮތުން، މިދިޔަ އޮގަސްޓް 22 ގެ ނިޔަލަށް ނުލިބި ހުރި ފައިސާގެ އަދަދު އެއް ބިލިއަން ރުފިޔާއަށް އަރާ ކަމަށް މިނިސްޓަރުގެ ޖަވާބުން ހާމަވެއެވެ. 

ޓީޖީއެސްޓީ : 636 މިލިއަން

ޖޫރިމަނާ : 240 މިލިއަން

ޓީޖީއެސްޓީގެ ޖުމުލަ : 872 މިލިއަން

ގްރީން ޓެކްސް : 85 މިލިއަން

ޖޫރިމަނާ : 42 މިލިއަން

ގްރީން ޓެކުހުގެ ޖުމްލަ : 128 މިލިއަން

ރިސޯޓް ކުއްޔާއި އެ ފައިސާ ނުދައްކައިގެން އަރާފައިވާ ޖޫރިމަނާގެ ގޮތުގައި ދައުލަތަށް ގާތްގަނޑަކަށް 17 ބިލިއަން ރުފިޔާ ލިބެން ޖެހޭ ކަމަށް މީރާގެ 2020ގެ އޮޑިޓް ރިޕޯޓަކުން ވަނީ ހާމަވެފަ އެވެ.

އެއީ ދައުލަތަށް ނުލިބި ހުރި ފައިސާގެ %78 ކަމަށް އެ ރިޕޯޓްގައި ފާހަގަކޮށް، އެެ ފައިސާ ހޯދަން އަވަސް ފިޔަވަޅުތަކެއް އެޅުމަށް އޮޑިޓް އޮފީހުން ވަނީ ލަފާ ދީފަ އެވެ. 

އޮޑިޓް އޮފީހުން އެފަދައިން ލަފާދީފައިވާއިރު، ޓެކްސް ނުދައްކާ ރާއްޖޭގައި ގިނަ ތިބި ވިޔަފާރިތަކަށް ފިޔަވަޅު އަޅަން މީރާ އިން ވަނީ މަސައްކަތް ފަށާފަ އެވެ. އެގޮތުން އެފަރާތްތައް ހާމަކޮށް ޖުމުލަ 394 ނަމެއް މީރާ އިން ވަނީ އާއްމުކޮށްފަ އެވެ. އަދި މެއި މަހުގެ ނިޔަލަށް ބިމު ކުލި ނުދައްކާ 12 ރިސޯޓާއި ހަތަރު ކުންފުންޏެއްގެ ނަން ވެސް ވަނީ އާއްމު ކޮށްފަ އެވެ.