މިދިޔަ ޖޫންމަހު ހިންގި މާރާމާރީއެއްގައި މަރާލި އުމުރުން 21 އަހަރުގެ މުހައްމަދު ޒަޔާން މޫސާ މަރާލާފައިވަނީ ބަދަލުހިފުމުގެ ރޫހެއްގައިކަން ފުލުހުން ހާމަކޮށްފިއެވެ. 

ފުލުހުން މިފަދައިން ހާމަކުރައްވާފައިވަނީ ޒަޔާން މަރާއި ގުޅޭގޮތް މައުލޫމާތު ދިނުމަށް ބޭއްވި ޕްރެސް ކޮންފަރެންސްއެއްގައެވެ. 

އެ ޕްރެސްގައި ވާހަކަދައްކަވަމުން ފުލުހުންގެ ޑެތް އެންޑް ހޮމިސައިޑް އިންވެސްޓިގޭޝަން ޔުނިޓްގެ ހެޑް، އިންސްޕެކްޓަރ އޮފް ޕޮލިސް މުޙައްމަދު ސާމިހް ވިދާޅުވީ ޒަޔާނަށް ހަމަލާދިންވަގުތު އޭނާ ހުރީ، އޭނާގެ ގޭގައިކަމަށާ، އެގެއަށް ފުލުހުން ދިޔައިރު ޒަހަމްތަކާއެކު ޒަޔާން އޮތް ކަމަށެވެ.

އެވަގުތު ޒަޔާންއަށް ވާހަކަދެކެވޭ ކަމަށާއި، ކަން ހިނގައިދިޔަ ގޮތާއި ޒަޔާން ފުލުހުންނާއި ގިނަ ކަންތައްތަކެއް ހިއްސާކޮށްފައިވާކަން ފުލުހުން ފާހަގަކުރެއްވިއެވެ. އެގޮތުން ޒަޔާންއަށް ހަމަލާދިން ގޮތާއި ހަމަލާދިން މީހުންނާއި ގުޅޭ ވާހަކަތައް އެވަގުތު ކިޔައިދިންކަމަށް ސާމިހް ވިދާޅުވިއެވެ. 

ސާމިހް ވިދާޅުވީ މި މާރާމާރީއަކީ އައްޑޫ ސިޓީގެ ފޭދޫގައި ޖަމާއަތް ހަދައިގެން ކުށް ކުރަމުން އަންނަ ދެ ބައެއްގެ ތެރޭގައި ހިންގި ސިލްސިލާ މާރާމާރީއެއް ކަމަށެވެ. އަދި ޒަޔާން މަރާލީ ބަދަލު ހިފުމުގެ މާރާމާރީއެއްގެ ތެރެއިން ކަމަށްވެސް އޭނާ ވިދާޅުވިއެވެ.

ފުލުހުން އިތުރަށް ބުނީ ޒަޔާންއަށް ހަމަލާދިނުމަށް ބޭނުންކުރި ބައެއް ތަކެތި ނައްތާލުމަށް ހުޅުގަނޑެއް ޖަހައި މަސައްކަތްކޮށްފައިވާކަމަށެވެ. 

ޒަމަލާދިނުމަށްފަހު ފިލަން ދިޔަ މަންޒަރާއި ހެކިނައްތާލަން މަސައްކަތްކުރަމުންދިޔަ މަންޒަރު ފެނިގެންދާ ސީސީޓީވީ ފުޓޭޖުތައް ފުލުހުންނަށް ލިބިފައިވާކަންވެސް ސާމިހު ފާހަގަކުރެއްވިއެވެ. 

ސާމިހް ވިދާޅުވީ މި ހަމަލާ ދިނުމުގަޔާއި ހެކި ނައްތާލުމުގައި ހަރަކާތްތެރިވެފައި ވަނީ ހަ މީހެއް ކަމަށެވެ. އެއީ 15 އަހަރާއި 19 އަހަރާ ދެމެދުގެ ބައެއް ކަމަށް ވެސް އޭނާ ވިދާޅުވިއެވެ.

މިދިޔަ ޖޫން މަހު މާރާމާރީ ހިންގައި މަރާލާފައިވާ ސ. ފޭދޫ، ސޮލިޑް، އުމުރުން 21 އަހަރުގެ މުޙައްމަދު ޒަޔާން މޫސާ މަރާލިކަމުގެ ތުހުމަތުގައި ހަތަރު ކުޑަ ކުދިން ހިމެނޭހެން ޖުމުލަ 11 މީހުން ވަނީ ހައްޔަރު ކޮށްފައެވެ. މީގެ ތެރޭގައި 15 އަހަރުގެ 2 ކުދިންނާއި 16 އަހަރުގެ ކުއްޖަކާއި 17 އަހަރުގެ ކުއްޖެއް ހިމެނެއެވެ.