މަސްތުވާތަކެތީގެ ބޮޑެތި ޝިޕްމަންޓްތަކުގައި ރަހުނުކޮށް، ގެރަންޓާއެއްގެ ގޮތުގައި ގެންގުޅުމުގެ ތެރެއިން ޕާކިސްތާނުގައި ހިފަހައްޓައިގެން ގެންގުޅުނު ޒުވާނަކު އެނބުރި ރާއްޖެ އައުމުން ހައްޔަރުކޮށްފި އެވެ.

މަސްތުވާތަކެތީގެ މައްސަލައެއްގައި ފުލުހުން ހައްޔަރުކޮށްގެން އުޅޭ މީހަކު އިއްޔެ ބަންދާއިމެދު ގޮތެއް ނިންމަން ކޯޓަށް ހާޒިރުކުރުމުން ކޯޓުގައި ވާހަކަދައްކަމުން އުމުރުން 22 އަހަރުގެ ޒުވާނާ ބުނި ގޮތުގައި އޭނާ ޕާކިސްތާނަށް ފޮނުވާފައި ވަނީ ބަޔަކު އޭނާއަށް އޮޅުވާލައިގެންނެވެ. އަދި ޕާކިސްތާނަށް ދިއުމާ އެކު އެ ގައުމުގައި ތިބި ޑްރަގް ވިޔަފާރީގެ ގްރޫޕުން އޭނާ ހައްޔަރުކޮށްގެން ގެންގުޅެފައިވާ ކަމަށް ބުންޏެވެ. 

މި މައްސަލައިގާ ފުލުހުން ހައްޔަރުކޮށްފައިވަނީ ބ. ގޮއިދޫ، އަތިރީގޭ، ހުސެއިން ޝަރުހާން އެވެ. އޭނާގެ މައްޗަށް ފުލުހުން ކުރަނީ މަސްތުވާތަކެތި ރާއްޖެ އެތެރެ ކުރުމުގެ ކުށުގެ ދައުވާއާއި އެތަކެތި ރާއްޖެ އެތެރެކުރުމަށް އެހީވެދިނުމުގެ ކުށުގެ ދައުވާއެވެ.

Advertisement

މި މައްސަލައާއި ގުޅިގެން ޝަރުހާން ކޯޓުގައި ދެއްކި ވާހަކައިން އޭނާއާއި މިފަދަ މައްސަލަތަކާއި ގުޅުން އޮންނަކަން ހާމަވާ ކަމަށް ގާޒީ ފާހަގަކުރެއްވިއެވެ. އަދި، ފުލުހުން ހުށަހަޅާފައިވާ ހެއްކާއި ގަރީނާގެ މައްޗަށް ރިއާޔަތްކޮށް ވަނީ ޝަރުހާންގެ ބަންދަށް އިތުރު ދިހަ ދުވަސް ޖަހާފައެވެ.