އިނގިރޭސިވިލާތުގެ ބޮޑުވަޒީރު ލިޒް ޓްރަސް މަގާމުން އިސްތިއުފާދެއްވައިފިއެވެ.

ލިޒް އިސްތިއުފާދެއްވާފައިވަނީ މެންޑޭޓުގައި ހިމެނޭ ކަންތައްތައް ފުރިހަމަނުކުރެއްވޭކަމަށް ވިދާޅުވަމުންނެވެ. 

އެކަމަނާ މަގާމާ ހަވާލުވެވަޑައިގެންނެވިއިރު، ގައުމަށް މިވަގުތު ދިމާވެފައިވާ ބޮޑެތި މައްސަލަތައް ހައްލުކުރެއްވުމަށް އަވަސް ފިޔަވަޅުތަކެއް އަޅުއްވަން ފައްޓަވާނެކަމަށް ވިދާޅުވިއެވެ.

އެގޮތުން ރިސެޝަންއާއި، އިންފްލޭޝަން މަތިވަމުންދާ މައްސަލަ ހައްލުކުރެއްވުމަށް މަސައްކަތް ފައްޓަވާނެކަމަށް ވަނީ ވިދާޅުވެފައެވެ.

އޭގެ އިތުރުން އެނަރޖީ ބިލްގެ މައްސަލަ ހައްކުރެއްވުމަށާއި، އަންނަން އޮތް ދުވަސްތަކަށް ފިއުލް ސަޕްލައި ޔަގީން ކުރެއްވުމަށް ހަފުތާއެއްހާ ދުވަހުގެ ތެރޭ ޕްލޭނެއް އެކުލަވާލައްވާނެ ކަމަށްވެސް ވަނީ ވިދާޅުވެފައެވެ.

އެހެން ނަމަވެސް އެކަމަނާ އިސްތިއުފާދެއްވާފައިވަނީ ގާތް ގަނޑަކަށް 6 މަސް ދުވަހު މަސައްކަތްޕުޅު ކުރެއްވުމަށްފަހު އެދެވޭ ނަތީޖާތަކެއް ނެރެދެއްވިފައި ނުވާކަން ގަބޫލުފުޅުކުރެއްވުމަށް ފަހުގައެވެ. 

އުމުރުފުޅުން 47 އަހަރުގެ ލިޒް ޓްރަސް މީގެކުރިން ހުންނެވީ (ބޮޑުވަޒީރު ބޮރިސް ޖޯންސަންގެ ސަރުކާރުގައި) ޚާރިޖީ ވަޒީރުގެ މަގާމުގައެވެ.

ކޮންޒަރވޭޓިވް ޕާޓީގެ ލީޑަރު ހޮވުމަށް ޕާޓީގެ މެމްބަރުގެ މެދުގައި ނެގި ވޯޓު ލިޒް ޓްރަސް ކާމިޔާބުކުރެއްވީ ވޯޓުގެ 57 އިންސައްތަ އިންނެވެ. އޭނާއާ ވާދަކުރެއްވި ރިޝީ ސުނަކްއަށް ލިބިވަޑައިގެންނެވީ 43 އިންސައްތަ ވޯޓެވެ.

ލިޒް ޓްރަސްއަކީ އިނގިރޭސި ވިލާތުގެ ތިންވަނަ އަންހެން ބޮޑުވަޒީރެވެ.

މިއީ އިނގިރޭސިވިލާތުގެ ތާރީޚުގައިވެސް ބޮޑުވަޒީރަކު މިހާ ކުރު މުއްދަތެއްގައި މަގާމުން އިސްތިއުފާދެއްވި ފުރަތަމަ ފަހަރުކަންވެސް ފާހަގަކޮށްލެވެއެވެ.