ގަތަރުގައި ބާއްވާ ފީފާ ވޯލްޑްކަޕް ފެށެން ދުވަސްތައް ކުޑަތަންވަމުން އަންނައިރު މުބާރާތަށް އެ ގައުމުން ވަނީ ވަރަށް ފުރިހަމައަށް ތައްޔާރުވެފައެވެ. ހޮޓާތަކާއި ރެސްޓޯރަންޓުތަކުގެ އިތުރުން ގެސްޓް ހައުސްތަކުން މި މުބާރާތަށް އަންނަ މެހެމާނުންނަށް ހިދުމަތްދޭން ވަނީ ދުރާލާ ބޮޑެތި އިންވެސްޓުމަންޓް ތަކެއް ކޮށްފައެވެ. 

މީގެ ހަތަރު އަހަރުކުރިން ގަތަރުން މުބާރާތަށް ތައްޔާރުވާން ފެށިއިރު ދާދިފަހުން އެ ގައުމުން ވަނީ ހޮޓާތަކާއި ގެސްޓްހައުސްތަކުގެ އިތުރުން އާންމުން އެއްވެ ޓީވީ ބަލާ ސަރަހައްދުތަކުން މެޗުބަލަން ފީއެއް ނަގަން ނިންމާފައެވެ. 

މި ތަންތަނުގެ ވެރިން ވަނީ މި ނިންމުމާއި ގުޅިގެން ވަރަށް ބޮޑަށް ހިތްހަމަނުޖެހުން ފާޅުކޮށްފައެވެ. އެއީ މުބާރާތް ފެށެން މަހަކާއި ގާތްވުމުން މިވަރުގެ ނިންމުމެއް ނިންމުމާއި ގުޅިގެންނެވެ. 

Advertisement

ގަތަރުގައި ވޯލްޑް ކަޕް ދެއްކުމުގެ ރައިޓްސް ނެގި ބީން ސްޕޯޓްސްއިން ވަނީ ހޮޓާތަކުގައި ވޯލްޑް ކަޕް ދައްކާނަމަ އިތުރު ފީއެއް ނަގަން ޖެހޭނެ ކަމަށް ބުނެފައެވެ. އަދި މިގޮތަށް ކަންކަން ނުކޮށްފި ނަމަ ފިޔަވަޅު އަޅާނެކަމަށް ބުނެ އިންޒާރުވެސް ވަނީ ދީފައެވެ.

ބީން ސްޕޯޓްސް އިން މައުލޫމާތުދޭ ގޮތުގައި ހޮޓާ، ރެސްޓޯރަންޓް އަދި ބާ އާއި ރޫމުތަކުގައި މެޗު ދައްކަން ބޭނުންނަމަ 100،000 ގަތަރު ރިޔާލް ޑޮލަރުންނަމަ 27،463 ޑޮލަރުގެ ފީއެއް ދައްކަން ޖެހޭނެއެވެ.

މި ފީ ނުދައްކައިފި ނަމަ މެޗު ކުޅޭ ކޮންމެ ދުވަހަކަށް 452 ޑޮލަރަށް ރޫމެއް ނަގައިގެން ގަތަރުގައި ތިބޭ މީހުންނަށް ވެސް ހޮޓަލުން މެޗު ބެލޭނެ ގޮތެއް ނޯންނާނެއެވެ.

ތަރުހީބު ބޮޑުވުމާއި ގުޅިގެން ގަތަރުން މިހާރު އެންމެ އާދައިގެ ރޫމެއް ލިބެނީ 200 ޑޮލަރަށްވުރެ ބޮޑުކޮށެވެ. އަދި މި ރޭޓު ކުރިޔަށްވުރެ ބޮޑުވުން އެކަށީގެންވެއެވެ. އެހެންކަމުން މުބާރާތާއި ދިމާކޮށް ގެސްޓްހައުސްތަކާއި ހޮޓާތަކަށް އިންވެސްޓުކުރި ފަރާތްތަކަށް މި ނިންމުމާއި ގުޅިގެން ބޮޑު ގެއްލުމެއް ލިބުމަކީ އެކަށީގެންވާ ކަމެކެވެ. 

މިއީ މިހާތަނަށް ވޯލްޑްކަޕް މެޗުތަކުގެ ފީޑު އެންމެ އަގުބޮޑުކޮށް ވިއްކާ ފަހަރުކަމަށްވެސް ބީން ސްޕޯޓްސްއިން ވަނީ ހާމަކޮށްފައެވެ. އަދި މި ފީ ކުޑަ ނުކުރާނެކަމަށް ވެސް އެ ކުންފުނިން ބުނެއެވެ.