އެންމެ ފަހުގެ ވޯލްޑްކަޕް ޗެމްޕިއަން ފްރާންސުން މިފަހަރުގެ ވޯލްޑްކަޕާއި ކުރިމަތިލާއިރު މިހާރު ޓީމު އޮތް ފޯމާއި މެދު އެއްވެސް ހާސްކަމެއް ނެތް ކަމަށް ޓީމުގެ ކޯޗު ޑިޑިއޭ ޑިޝޯމްޕްސް ބުނެފިއެވެ. 

ކޯޗު މިހެން ބުނީ ވޭތުވެދިޔަ މަސްތަކުގެ ތެރޭގައި ފްރާންސަށް ނަތީޖާތަށް ދަށްުވުމާއި ގުޅިގެންނެވެ. އެގޮތުން ނޭޝަންސް ލީގު އެ ޓީމު ނިންމާލީ ލީގު އޭގެ ގްރޫޕް އެކެއްގެ ތިންވަނައިގައެވެ. އެއީ އަމިއްލަ ދަނޑުގައި ޑެންމާކް އާއި ކްރޮއޭޝިއާ އަތުން ބަލިވުމުގެ އިތުރުން އޮސްޓްރިއާ އަތުން އެއްވަރުވެގެންނެވެ. 

އެއާއެކު މިފަހަރުގެ ވޯލްޑްކަޕުގައި ފްރާންސް އަށް ތަށި ދިފާއުކުރެވިދާނެ ތޯ ގިނަ ބަޔަކު ވަނީ ސުވާލު އުފައްދާފައެވެ. އަދި ގިނަ ބައެއްގެ ފާޑުކިޔުން ވެސް އަމާޒުވެފައިވެއެވެ.

Advertisement

އެ ފާޑުކިޔުންތަކަށް ރައްދުދެމުން ޑިޝޯމްޕްސް ބުނީ އަދިވެސް ޗެމްޕިއަނުންނަކީ ފްރާންސް ކަމަށާއި އެހިސާބަށް ދެވޭނީ ރަނގަޅު މަސައްކަތްތަކެއް ކުރެވިފައި ހުރުމުން ކަމަށެވެ. އަދި ކޮންމެ ޓީމަކަށް ވެސް ހިނދުކޮޅު އަންނާނެ ކަމަށާއި ރަނގަޅަށް ކުޅޭ ދުވަސްވަރާ ގޯސް ދުވަސްތަކެއް ކޮންމެ ޓީމަށްވެސް އަންނާޏެ ކަމަށެވެ. 

ވޯލްޑްކަޕުގައި އެ ޓީމު ހިމެނޭ ގްރޫޕަކީ އުނދަގޫ ޓީމެއްކަން ގަބޫލުކުރާ ކަމަށާއި އޮސްޓްރޭލިއާ، ޑެންމާކް އަދި ޓިއުނީޝިއާ އާއެކު ގްރޫޕް ޑީ ގައި މެޗުތަކުން މޮޅުވުމަކީ ޗެލެންޖެއް ކަމަށެވެ. 

ގަތަރުގައި އަންނަ މަހު ފަށާ ވޯލްޑްކަޕުގައި ނޮވެމްބަރު މަހުގެ 22 ވަނަ ދުވަހު އެ ޓީމު ބައްދަލުކުރާނީ އޮސްޓްރޭލިއާ އާއި ދެކޮޅަށެވެ. އަދި އޭގެ ހަތަރު ދުވަސްފަހުން ޑެންމާކް އާއި ބައްދަލުކުރާިއރު ގްރޫޕްގެ ފަހު މެޗުގައި ނޮވެމްބަރ 30 ގައި ބައްދަލުކުރާނީ ޓިއުނީޝިއާ އާއި ދެކޮޅަށެވެ.