ޗައިނާގެ ވެރިކަމުގެ 3 ވަނަ ދައުރަށް އެ ގައުމުގެ ރައީސް ޝީ ޖިންޕިން ހޮވިވަޑައިގެންފިއެވެ. 

ޗައިނާގެ ވެރިކަން ކުރާ ކޮމިއުނިސްޓު ޕާޓީގެ ކޮންގްރެސްއަށް ފަހު އެ ޕާޓީން ވަނީ މިއަދު ކުރިއަށް އޮތް 5 އަހަރު އެ ޕާޓީގެ ޕޮލިޓި ބިއުރޯ ސްޓޭންޑިން ކޮމިޓީގެ (ޕީއެސްސީ) 7 މެމްބަރުން އިއުލާންކޮށްފައެވެ.

ޕީއެސްސީގެ ގެ 7 މެމްބަރުންނަކީ ކުރިއަށް އޮތް 5 އަހަރު ޗައިނާގެ އެންމެ މުހިންމު ނިންމުންތައް ނިންމާނެ އެ ޤައުމުގެ އެންމެ އިސްވެރިންނެވެ.

Advertisement

ޗައިނާގެ ގާނޫނު ބުނާގޮތުން އެގައުމުގެ ރައީސަކަށް ހުންނަވާނީ ކޮމިއުނިސްޓް ޕާޓީގެ ސެކްރެޓަރީ ޖެނެރަލް އަކަށް އިންތިޚާބު ކުރެވޭ ބޭފުޅެކެވެ. ކޮމިއުނިސްޓް ޕާޓީގެ ސެކްރެޓަރީ ޖެނެރަލް ކަމުގެ މަގާމަށާއި ޗައިނާގެ ބޮޑުވަޒީރުކަމުގެ މަގާމަށާއި ސިފައިންގެ އެންމެ އިސްވެރިޔާގެ މަގާމަށް ބޭފުޅުން އައްޔަން ކުރަނީ ކޮންމެ ފަސް އަހަރަކުން އެއް ފަހަރު ބާއްވާ ކޮމިއުނިސްޓް ޕާޓީގެ ކޮންގްރެސް އިންނެވެ.

މިއަދު ޗައިނާގެ ކޮމިއުނިސްޓު ޕާޓީން ވަނީ ކުރިއަށް އޮތް 5 އަހަރުވެސް ޖެނެރަލް ސެކެޓްރީގެ މަޤާމުގައި ހުންނަވާނީ ޝީ ޖިންޕިންގް ކަން އިއުލާންކޮށްފައެވެ.

1989 ވަނަ އަހަރުން ފެށިގެން ކޮމިއުނިސްޓް ޕާޓީގެ ޖެނެރަލް ސެކެޓްރީ އަކީ ޗައިނާގެ ވެސް އެންމެ އިސްވެރިޔާއެވެ.

ފާއިތުވި 10 އަހަރަށް ބަލާއިރު ޗައިނާގެ ރައީސްގެ ހައިސިއްޔަތުންނާއި ކޮމިއުނިސްޓް ޕާޓީގެ ސެކްރެޓަރީ ޖެނެރަލްގެ ހައިސިއްޔަތުން ޝީޖިންޕިން އެގައުމުގައި ވެރިކަން ކުރައްވާފައިވަނީ ކުރީގެ ރައީސުން ވެރިކަން ކުރައްވާފައިވާ ވަރަށް ވުރެ މާ ބާރުވެރިކަމުގައެވެ.

ޝީގެ ވެރިކަމުގައި ޗައިނާ ވަނީ އިގްތިސާދީ ގޮތުންނާއި ސިނާއީ ގޮތުންނާއި އިންފްރާސްޓްރަކްޗާގެ ގޮތުންނާއި އިލްމީ ރީސާޗް އާއި ޓެކްނޮލޮޖީގެ ގޮތުން އާދަޔާ ޚިލާފަށް ކުރިޔަށް ގޮސްފައެވެ. ޝީގެ ޒައާމަތުގައި ޗައިނާގެ އަސްކަރީ ބާރާއި ޗައިނާގެ ސޮފްޓް ބާރާއި ހައިބަތާއި ނުފޫޒުވެސް ދުނިޔޭގައިވަނީ އާދަޔާ ޚިލާފަށް ބޮޑުވެފައެވެ.

އަދި ދުނިޔޭގެ އިގްތިސާދީ ދެވަނަ ބާރުގެ މަގާމުވެސް ޗައިނާވަނީ ހޯދާފައެވެ. އަދި ކައިރި މުސްތަގުބަލެއްގައި ދުނިޔޭގެ އެއްވަނަ އިގްތިސާދުގެ މަގާމުވެސް ޗައިނާ ހޯދާނެކަމަށްވަނީ ބެލެވިފައެވެ.

އޭގެ އިތުރުން ޝީގެ ޒައާމަތުގައި ޗައިނާ ވަނީ ދުނިޔޭގެ 80 އަށްވުރެ ގިނަ ގައުމާ އެއްގަމާއި ކަނޑުގެ މަގުން ގުޅާލުމަށްޓަކައި ބެލްޓް އެންޑް ރޯޑު އިނިޝިއޭޓިވް އެއް އިއުލާނުކޮށް އޭގެދަށުން މި 80 ގައުމުގެ މަދަނީ އިންފްރާސްޓްރަކްޗާ ބިނާކުރުމަށް އެއް ޓްރިލިޔަން ޑޮލަރުގެ ބިޔަ މަޝްރޫއުތަކެއް ތަންފީޒު ކުރަން ފަށާފައެވެ.