ބައިނަލް އަގުވާމީ ޔޯގާ ދުވަސް ފާހަގަކުރުމަށް ގަލޮޅު ދަނޑުގައި ކުރިއަށް ގެންދިޔަ ހަރަކާތް ހުއްޓުވުމުގައި ބައިވެރިވެ ހަމަނުޖެހުން ހިންގުމަށް ރޭވި ކަމުގެ ތުހުމަތުކޮށް އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއަރ އަދި މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލްގެ މައްޗަށް އުފުލާފައިވާ ދައުވާތަކާއި ގުޅޭ ޝަރީއަތް ލައިވްކޮށްދިނުމަށް އެދިވަޑައިގެންފިއެވެ. 

ޔޯގާ މައްސަލައާއި ގުޅުވާ ދައުލަތުން ވަނީ މުހައްމަދު އިސްމާއިލްގެ މައްޗަށް ޓެރަރިޒަމްގެ އަމަލެއް ހިންގުމުގައި ބައިވެރިވި ކަމުގެ ދައުވާގެ އިތުރުން އަދުލު އިންސާފު ގާއިމްކުރުމަށް ހުރަސްއެޅިކަމުގެ ދައުވާ އުފުލާފައެވެ. އަދި މި ދައުވާތަކާއެކު އޭނާގެ މައްޗަށް 35 އަހަރު ދުވަހުގެ ޖަލު ހުކުމެއް ކޮށްދިނުމަށްވެސް އެދިފައިވެއެވެ. 

ދައުލަތުން ވަނީ މި މައްސަލައިގައި މުހައްމަދު އިސްމާއިލްއާއި ދެކޮޅަށް 55 ސީޑީ އާއި، އޭފޯ ކަރުދާސް ރީމެއްގެ ލިޔެކިޔުން ކޯޓަށް ހުށައަޅާފައެވެ. 

އެ މައްސަައިގެ ލިޔެކިޔުންތައް ހަވާލުކުރުމަށް މުހައްމަދު އިސްމާއިލް ކޯޓަށް ހާޒިރުކޮށްފައިވާއިރު، ކޯޓުން ނިކުމެ ވަޑައިގެން މީޑިއާއަށް ދެއްވި އިންޓަރވިއުއެއްގައި މުހައްމަދު އިސްމާއިލްގެ ގާނޫނީ ވަކީލު އާދަމް އާސިފް ވިދާޅުވީ، ދައުލަތުން މަސައްކަތް ކުރަނީ މުހައްމަދު އިސްމާއިލް ފްރޭމްކުރުމަށްކަމަށެވެ. އަދި އެ ގޮތަށް އެކަން ކުރާ ސަބެބެއްކަމަށް އާސިފް ސިފަކުރެއްވީ، މުހައްމަދު އިސްމާއިލްއަކީ އިދިކޮޅުގެ މަގުމަތީ ހަރަކާތްތަކުގައި އެންމެ އިސްކޮށް އުޅޭ ފަރާތްކަމުގައި ވާތީ، މުހައްމަދު އިސްމާއިލް ހައްޔަރުކޮށް، އެ ހަރަކާތްތަކަށް ބުރޫ އަރުވާލުންކަމަށެވެ. 

އެކަން ފާހަގަކުރައްވާ އާސިފް ވިދާޅުވީ، މި މައްސަލައަކީ ލައިވްކުރަން ޖެހޭ ޝަރީއަތެއްކަމަށެވެ. ރައްޔިތުންނަށް ސަރުކާރުގެ ހީލަތްތެރިކަން ފެނިގެންދާނީ ލައިވްކޮށް މި ޝަރީއަތް ދައްކައިގެންކަމަށް އާސިފް ވިދާޅުވިއެވެ. 

ލޯޔަރު އާސިފް އިތުރަށް ވިދާޅުވީ، މުހައްމަދު އިސްމާއިލްގެ މައްޗަށް ޓެރަރިޒަމްގެ ދައުވާތައް އުފުލާފައިވާއިރު، ޔޯގާ ހަރަކާތް ހުއްޓުވުމަށް ބަޔަކު ކުރި މަސައްކަތުގެ ތެރެއިން ހަމަނުޖެހުން އުފެދިފައިވާއިރު، އެތަނުގައި މުހައްމަދު އިސްމާއިލް ނުވެސް ނެތްކަމަށެވެ. 

ދައުލަތުން މަސައްކަތްކުރަނީ ނުކުރާ ކުށަކަށް އަބަދުދިނުމަށްކަމަށް އާސިފް ތަކުރާރުކޮށް ވިދާޅުވިއެވެ. 

ޔޯގާ މައްސަލައާއި ގުޅިގެން މުހައްމަދު އިސްމާއިލްގެ މައްޗަށް ބޮޑެތި ދައުވާތަކެއް އުފުލާފައިވަނީ، އެ މައްސަލައާއި ގުޅިގެން މުހައްމަދު އިސްމާއިލް ހައްޔަރުކޮށް ވާނުވާ ބަންދެއްގައި 45 ދުވަހު ބެހެއްޓުމަށްފަހުގައެވެ. އަދި އޭނާ ބަންދުން ދޫކޮށްލާފައިވަނީ އެފަދައިން ބަންދުގައި މީހަކު ބެހެއްޓޭނެ އެންމެ ދިގު މުއްދަތު ހަމަވިއިރުވެސް، ދައުވާ ކުރާނެ އެއްވެސް ހެއްކެއް ކޯޓަށް ހުށައެޅިފައި ނުވުމުންކަން ފާހަގަކޮށްލެވެއެވެ.