ސްކޭމް މައްސަލަތައް އިތުރުވެފައިވާތީ ހައްލު ހޯދުމާ ގުޅޭ ގޮތުން އިކޮނޮމިކް މިނިސްޓްރީން މަޝްވަރާކޮށްފި އެވެ.

މިކަމާ ގުޅޭ ގޮތުން މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާއި ގައުމީ ބޭންކް، ބޭންކް އޮފް މޯލްޑިވްސް (ބީއެމްއެމްއެލް) ގެ އިތުރުން މޯލްޑިވްސް އިސްލާމިކް ބޭންކް (އެމްއައިބީ) އާ އެކީ އިކޮނޮމިކް މިނިސްޓްރީން ވަނީ މަޝްވަރާކޮށްފަ އެވެ.

އެކަމާއި ގުޅިގެން މިނިސްޓްރީން ބުނީ ރާއްޖޭގައި ސްކޭމް ކޯލްތަކާއި އަދި އޮޅުވާލައިގެން ފައިސާ ޓްރާންސްފާކުރުން ފަދަ ކުށްތައް އިތުރުމުންދާތީ އެ ކަންކަން ހައްލުކުރަން އިދާރީ ގޮތުންނާއި ގާނޫނީ ގޮތުން ކުރެވެން ހުރި ކަންކަމާ ގުޅޭ ގޮތުން މިއަދު މަޝްވަރާތަކެއް ކުރެވުނު ކަމަށެވެ.

ރާއްޖޭގައި މިފަދަ ސްކޭމް ކުށްތައް އިތުރުވަމުންދާތީ އެކަމަށް ސަމާލުވުމަށް ފުލުހުންވެސް ވަނީ އިލްތިމާސްކޮށްފައެވެ.