މޮރިޝަސް އަށް ގޮސް ރައީސް ޞާލިހު ގެނައީ ކޮން އެއްޗެއްތޯ ރައްޔިތުން އެބަ އަހާ: ޝިޔާމް

ނައިފަރު ދާއިރާގެ މެންބަރު އަހުމަދު ޝިޔާމް

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އެންމެ ފަހުން މޮރިޝަސް އަށް ވަޑައިގެން، އެ ގައުމުގެ ލީޑަރޝިޕާއި ބައްދަލު ކުރައްވައި، ރާއްޖެ ވަޑައިގެންނެވި އިރު، ގެންނެވީ ކޮންއެއްޗެއްތޯ ރައްޔިތުން ސުވާލު ކުރާ ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވެއްޖެއެވެ. 

ޗާގޯސް މައްސަލައާއި ގުޅޭގޮތުން މަޖިލީހަށް ހުށައެޅި ކުއްލި މައްސަލައަށް ވާހަކަދައްކަވަމުން ޝިޔާމް ވިދާޅުވީ މި މައްސަލަ އަކީ ސިޔާސީ މައްސަލައެއް ނޫންކަމަށެވެ. އެހެނެއްްކަމަކު އެ މައްސަލަ އަކީ ގައުމީ މައްސަލައެއް ކަމަށާ، އެއީ ރާއްޖޭގެ އަންނަން އޮތް ޖީލުތައްވެސް އެކަމުގެ ހިތި ތަޖުރިބާ ކުރަންޖެހޭނެ މައްސަލައެއް ކަމަށެވެ. އަދި އެއީ އަގުން އަނބުރާ ދައްކައި ޚަލާސް ކުރެވޭނެ ކަމެއް ނޫން ކަމަށްވެސް ޝިޔާމް ވިދާޅުވިއެވެ.  

މިއާއެކު ޝިޔާމް ވިދާޅުވީ މޮރިޝަސް މައްސަލާގައި ދިވެހިރާއްޖެއަށް ގެއްލުންވާ ފަދަ ބޮޑު ނިންމެވުމަށް، އެކަމުގެ ސަބަބު ހާމަ ނުކުރައްވައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ނިންމެވީ ކީއްވެގެންތޯ ބަލައި ތަހުގީގު ކުރަން ޖެހޭ ކަމަށެވެ. އެހެނީ އެ ނިންމެވުމަކީ ގާނޫނު އަސާސީ އާއި ދިވެހިރާއްޖޭގައި ހެދިފައި ހުރި ހުރިހާ ގާނޫނަކާއި ވެސް ޚިލާފް ނިންމެވުމެއްކަމަަށް އޭނާ ވިދާޅުވިއެވެ. ވުމާއެކު އެފަދަ ނިންމެވުމެއް ރައީސް ނިންމެވި ކަމަށްޓަކައި އެމަނިކުފާނު މަގާމުން އަޒުލު ކުރަންޖެހޭ ކަމަށްވެސް ޝިޔާމް ވިދާޅުވިއެވެ. 

މީގެ އިތުރުން ޝިޔާމް ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރުން ބޭރުގެ ފަރާތްތަކާއިއެކު ހަދަމުންދާ އެގްރިމެންޓް ރައްޔިތުންނަށް ހާމަކުރުމަށް އިދިކޮޅު ކޯލިޝަނުން ގޮވާލަމުންދަނީވެސް އެފަދަ ސަބަބުތަކާއި ހުރެކަމަށެވެ. 

"ހައިޑްރޯ ގްރަފީގެ އެގްރީމެންޓްހެ ވާހަކަ ކިހާ އަޑު ހަރުކޮށްތޯ އަޅުގަނޑުމެން ދެއްކީ. ކާކުތޯ އެ އެގްރީމަންޓް ހިފަހައްޓައިގެން ހުރީ. ރައީސުލްޖުމްހޫރިއްޔާ. ރައީސުލްޖުމްހޫރިއްޔާ މިއަދު ހައިޑްރޯ ގްރަފީ އެގްރީމެންޓް ހިފަހައްޓައިގެން ހުރެފައި، މިވަރުގެ ބޮޑެތި ޑީލްތައް މި ނިންމާލާއިރު މީގެ ހަގީގަތް ރައްޔިތުންނަށް އެބަ އެނގެންޖެހޭ. ކީއްވެގެންތޯ އޮގަސްޓް މަހު އެ އޮތީ މޮރިޝަސް އަށް ގޮއްސަ ރައީސުލްޖުމްހޫރިއްޔާ. މޮރިޝަސް އަށް ގޮއްސަ އެތަނުގެ ލީޑަރޝިޕާ ބައްދަލު ކޮށްފަ ކޮން އެއްޗެއްތޯ ގެނައީ ރައްޔިތުން އެބައަހާ އަޅުގަނޑުމެން ކައިރީގައި. އެ ދަތުރުގައި ރައީސުލްޖުމްހޫރިއްޔާ ގެނައީ ކޮންއެއްޗެއްތޯ.؟ ކޮންއެއްޗެއް ލިބިގެންތޯ ގައުމަށް މިހާ ގައްދާރު ނިންމެވުމެއް ރައީސް ނިންމެވީ؟" 

މެންބަރު އަހުމަދު ޝިޔާމް 

ޗާގޯސް މައްސަލާގައި ރާއްޖޭގެ ފަރާތުން ވަކާލާތުކުރައްވަނީ އެޓާނީ ޖެނެރަލް އިބްރާހީމް ރިފްއަތު އަދި ޑެޕިއުޓީ އެޓާނީ ޖެނެރަލް ހަދީޖާ ޝަބީންއެވެ. ހޮނިހިރު ދުވަހު ބޭއްވި މި މައްސަލައިގެ އިބްތިދާއީ އަޑުއެހުމުގައި ރިފްއަތު ވިދާޅުވީ މޮރިޝަސް އިން އދ އަށް ހުށަހަޅާފައިވާ މައްސަލާގައި އެގައުމާއި އެއްކޮޅަށް ވޯޓު ދެއްވާނެ ކަމަށެވެ.
ސަރުކާރުން ބުނީ ސްޓޭންޑް ބަދަލުކުރީ، ޓްރައިބިއުނަލްގައި ކުރިއަށްދާ މައްސަލަ އާއި ރާއްޖޭގެ ކޮންޓިނެންޓަލް އިން ކަނޑައަޅައިދޭން މޮރިޝަސް އިން އިއުތިރާޒުކުރާ މައްސަލައަށް އަވަސް ހައްލެއް ގެނައުމަށް ކަމަށެވެ. 

Advertisement

ކޮމެންޓް