މަސްތުވާތަކެތީގެ ވިޔަފާރިކުރާ އިސް މީހެއް ކަމަށް ފުލުހުން ބުނާ ގދ. ހޯޑެއްދޫ، އަލޯރާ، އަރުޝަދު ޚާލިދު ހައްޔަރުކުރި އަމުރު ބާތިލުކުރަން އޭނާގެ ފަރާތުން ސުޕްރީމް ކޯޓަށް ހުށަހަޅަިއިފިއެވެ.

މިދިޔަ އަހަރުގެ ޑިސެމްބަރު 12 ވަނަ ދުވަހު ފުލުހުން އަތުލައިގަތް 119 ކިލޯގެ މަސްތުވާތަކެތި ރާއްޖެ އެތެރެ ކުރުމަށް އެންމެ އިސްކޮށް މަސައްކަތް ކުރި މީހަކީ އަރުޝަދެވެ. 

މީގެ އިތުރުން 9 ކިލޯގެ މަސްތުވާތަކެތީގެ މައްސަލައެއްވެސް އަރުޝަދުގެ މައްޗަށް ވަނީ އުފުލައިފައެވެ. މިމައްސަލާގައި ކުށުގެ ވެށިން ގިނަ ޢަދަދެއްގެ ފައިސާވެސް ފުލުހުންގެ ބެލުމުގެ ދަށަށް ގެނެވިފައިވެއެވެ.

އަރުޝަދު އެންމެ ފަހުން ހައްޔަރުކޮށްފައިވަނީ ސްރީ ލަންކާއިން ދުބާއީއަށް ދިއުމުން، ދުބާއީއަށް އެތެރެވިޔަނުދީ އަނބުރާ ފޮނުވާލުމުންނެވެ. ސްރީލަންކާ އިން ރާއްޖެ އައުމާ އެކު މިދިޔަ ހަފުތާގައި އަރުޝަދު ފުލުހުންގެ ބެލުމުގެ ދަށަށް ގެންދިޔައީ ނުވަ ކިލޯގެ ޑްރަގް މައްސަލައަކާ ގުޅިގެން އޭނާއާ ދެކޮޅަށް ދައުލަތުން އިސްތިއުނާފު ކޮށްފައިވާ މައްސަލައެއް ހައި ކޯޓުގައި އޮތުމުން އެ ކޯޓަށް ހާޒިރު ކުރުމަށެވެ.

އޭނާ ހައްޔަރުކުރީ ރާއްޖެ އައުމުންކަމަށް އޭރު މަޢުލޫމާތު ލިބިފައިވެއެވެ. އަދި ހައިކޯޓުގެ އަމުރެއް ތަންފީޒުކުރުމަށް އަރުޝަދު ބަންދުކޮށްފައިވާކަމަށް ފުލުހުންވެސް އޭރު ބުނެފައިވެއެވެ. 

އެހެން ނަމަވެސް ފުލުހުންވަނީ އެ ފަހުން މި މަހުގެ 12 ވަނަ ދުވަހުގެ ރޭ އަރުޝަދު ބަންދުން ދޫކޮށްލާފައެވެ. އަދި އެއީ ހައިކޯޓުގެ އަމުރާއި ޚިލާފަށް ފުލުހުން އަމިއްލައަށް ނިންމި ނިންމުމެއްކަމަށް ޕީޖީ އޮފީހުން ވަނީ ބުނެފައެވެ.