އިއްޔެ ފުލުހުން ހިންގި އޮޕަރޭޝަނެއްގެ ތެރެއިން ގދ.ހޯޑެއްދޫއިން ހައްޔަރުކުރި ރަޝީދު، ފުލުހުންގެ ހައްޔަރުގައި ހުއްޓާ ނިޔާވުމާއި ގުޅިގެން ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބަލައި ނުގަނެ މަޖިލީހުން ބޭރުކޮށްލައިފިއެވެ.

ރައްޔިތުންގެ މަޖިލީހަށް މިމައްސަލަ ހުށަހެޅުއްވީ ނައިފަރު ދާއިރާގެ މެންބަރު އަދި އިދިކޮޅު ޕީޕީއެމްގެ ނައިބު ރައީސް އަހުމަދު ޝިޔާމެވެ. މައްސަލަ ހުށަހަޅުއްވަމުން ޝިޔާމް ވަނީ, ރަޝީދު ނިޔާވި މައްސަލައިގައި އަވަސް މިނިވަން ތަހުގީގެއް ހިންގުމަށާއި މި މައްސަލައާ ގުޅުން ހުރި ހުރިހާ މައުލޫމާތެއް ހާމަ ކުރެއްވުމަށް ގޮވާލާފައެވެ. އެގޮތުން، ހޯޑެއްދޫގައި އޮޕަރޭޝަން ހިންގި އިރު ހަރަކާތްތެރިވި ފުލުހުންގެ ބޮޑީކެމް ހާމަކޮށް، އެ މައްސަލާގައި ފުލުހުންގެ އިހުމާލެއްވޭތޯ ތަހުގީގުކުރުމަށް އޭނާ ވަނީ ގޮވާލާފައެވެ. 

ޝިޔާމް ހުށަހެޅުއްވި އެ މައްސަލަ ބަލައިގަންނަން 17 މެމްބަރަކު ވޯޓު ދިންއިރު އެއާއި ދެކޮޅަށް 22 މެމްބަރުން ވޯޓު ދެއްވިއެވެ. އަދި މައްސަލަ ބަލައި ނުގަންނަން ވޯޓު ދެއްވީ އެމްޑީޕީ މެމްބަރުން ކަން ފާހަގަ ކޮށްލަންޖެހެއެވެ. އެހެންކަމުން، އެ މައްސަލަ ބަލައިގަންނަން ނުފެންނަ ކަމަށް ނިންމައި މަޖިލީހުން ވަނީ ބޭރުކޮށްލާފައެވެ. 

Advertisement

އިދިކޮޅު ކޯލިޝަންގެ، ގދ. ހޯޑެއްދޫ ސްޓިއަރިންގ ކޮމިޓީގެ ރައީސްގެ މަގާމުގައިވެސް ހުންނެވި ރަޝީދު ކުއްލި ގޮތަކަށް ނިޔާވި މައްސަލައިގައި ގިނަ ބައެއްގެ ފާޑުކިޔުންތައް ފުލުހުންނަށް އަންނަނީ އަމާޒުވަމުންނެވެ.  

އެގޮތުން ރަޝީދު ނިޔާވީ ފުލުހުން އޭނާ ހައްޔަރުކޮށްގެ ގެންގޮސް ލޯންޗެއްގައި ފުލުހުންގެ ބެލުމުގެ ދަށުގައި ހުއްޓާ ކަމަށާ، އޭނާގެ ހައްޔަރުކޮށްގެން ގެންދިޔައިރުވެސް އޭނާގެ މެޔަށް ތަދުވާކަމަށް ބުނަމުންދިޔަ ކަމަށާއި އެހެންނަމަވެސް ފުލުހުން މިކަމަށް އެއްވެސް ވަރަކަށް ސަމާލުކަން ދީފައި ނުވާކަން އެފަރާތްތަކުން ބުނެއެވެ.