ދައުލަތުގެ އާމްދަނީ އިތުރު ކުރުމަށް ޖީއެސްޓީ އާއި ޓީޖީއެސްޓީ ބޮޑު ކުރަން ސަރުކާރުން ހުށަހެޅި ބިލަށް މެމްބަރުން ހުށަހެޅި އިސްލާހުތައް ބޭރު ކޮށްލައި ސަރުކާރުން ފޮނުވި ގޮތަށް މުޅި މަޖިލީހުގެ ކޮމިޓީން އެ ބިލު ފާސް ކޮށްފި އެވެ.

މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް ސަރުކާރުން ފަރާތުން އިހަވަންދޫ ދާއިރާގެ މެމްބަރު މުހައްމަދު ޝިފާއު ހުށަހެޅީ ޖީއެސްޓީ 8  ޕަސެންޓަށް އަދި ޓީޖީއެސްޓީ 16 ޕަސެންޓަށް ބޮޑު ކުރުމަށެވެ.

އެ ބިލަށް ނައިފަރު ދާއިރާގެ މެމްބަރު އަހުމަދު ޝިޔާމް ހުށަހެޅުއްވީ ޖީއެސްޓީ އާއި ޓީޖީއެސްޓީ މިހާރު ވެސް ގާނޫނުގައި އޮތް ގޮތަށް ހަ ޕަސެންޓާއި 12 ޕަސެންޓުގައި ބެހެއްޓުމަށެވެ. ޝިޔާމް ގެ އިސްލާހަށް ވޯޓަށް ހުޅުވާލުމުން އިސްލާހު ބަލައިގަންނަން ނުފެންނަ ކަމަށް 56 މެމްބަރުން ވޯޓު ދިނުމާއި އެކު އެ އިސްލާހު ވަނީ ބޭރުކޮށްލާފައެވެ. 

ޝިޔާމްގެ އިތުރުން އެމްޑީޕީގެ ކުރީގެ ޕީޖީ ލީޑަރު އަދި މެދުހެންވޭރު ދާއިރާގެ މެންބަރު އާލީ އާޒިމް ވެސް ވެސް ޓެކްސް ބޮޑު ކުރުމަށް ސަރުކާރުން ހުށަހަޅާފައިވާ ބިލަށް ތިން އިސްލާހެއް ހުށަހަޅުއްވާފައެވެ.

އެގޮތުން ޖީއެސްޓީ %14 އަށް ބޮޑު ކުރަން އާޒިމް ހުށަހެޅުއްވި އިސްލާހަށް ވޯޓު ދެއްވީ 15 މެންބަރުންނެވެ. އަދި އެ އިސްލާހާއި ދެކޮޅަށް 46 އަދި ވަކި ކޮޅަކަށް އެއް މެންބަރަކު ވޯޓެއް ނުދެއްވައެެވެ. އެއާއެކު އެ އިސްލާހުވެސް ފާސް ނުވާކަމަށް ވަނީ ނިންމާފައެވެ. 

ޓެކްސް ބޮޑު ކުރާ ބިލަށް އާޒިމް ހުށަހެޅުއްވި އަނެއް އިސްލާހަކީ ޓީޖީއެސްޓީ މިހާރު ނަގާ %12 ރޭޓުގައި ދަމަހައްޓާށެވެ. އެ އިސްލާހު ފާސްކުރުމަށް 19 މެންބަރުން ވޯޓު ދެއްވި އިރު ދެކޮޅަށް 44 މެންބަރުން އަދި ވަކި ކޮޅަކަށް އެއް މެންބަރަކު ވޯޓެއް ނުދެއްވައެވެ.

ސަރުކާރުން ޓެކްސް ބޮޑު ކުރުމަށް ހުށަހެޅުއްވި ބިލަށް އާޒިމް ހުށަހެޅުއްވި ތިންވަނަ އިސްލާހަކީ، އަންނަ އޭޕްރީލް މަހުން ފެށިގެން ޓެކްސް ބޮޑު ކުރަން ފަސް ކުރުމެވެ. އެ އިސްލާހު ފާސްކުރުމަށް 15 މެންބަރުން ވޯޓު ދެއްވި އިރު ދެކޮޅަށް 45 އަދި އެއް މެންބަރަކު ވަކި ކޮޅަކަށް ވޯޓެއް ނުދެއްވައެވެ. އެއާއެކު އެ އިސްލާހުވެސް ވަނީ މަޖިލީހުން ބޭރުކޮށްލާފައެވެ.

މިއާއެކު މަޖިލީހުގެ ރިޔާސަތުން ވަނީ ޓެކްސް ބޮޑު ކުރާ ބިލް ސަރުކާރުން ފޮނުއްވި ގޮތަށް ވޯޓަށް ހުޅުވާލާފައެވެ. އެގޮތަށް އެ ބިލު ފާސްކުރުމަށް މަޖިލީހުގެ އާއްމު ކޮމިޓީގެ 50 މެންބަރުން ވަނީ ވޯޓު ދެއްވާފައެވެ. ބިލާ ދެކޮޅަށް 19 މެންބަރަކު ވޯޓު ދެއްވި އިރު، ވަކި ކޮޅަކަށް ވޯޓެެއް ނުދެއްވަނީ އެއް މެމްބަރެވެ. އެއީ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ) އެވެ.