އަންނަ އަހަރަށް ލަފާކުރާ ދައުލަތުގެ ބަޖެޓުގައި ނުކުޅެދުންތެރިކަން ހުންނަ މީހުންނަށް ދޭ އެލަވަންސް ބޮޑު ކުރަން 341 މިލިއަން ރުފިޔާ ހިމަނައިފި އެވެ.

ފިނޭންސް މިނިސްޓަރު އިބްރާހިމް އަމީރު މިއަދު، ރައްޔިތުންގެ މަޖިލީހަށް 42.6 ބިލިއަން ރުފިޔާގެ ބަޖެޓެއް ވަނީ ހުށަހަޅުއްވާފައެވެ. އޭގެ ތެރެއިން އިޖުތިމާއީ ރައްކާތެރިކަމަށް ހާއްސަކޮށްފައިވާ 3.9 ބިލިއަން ރުފިޔާގެ ބަޖެޓުގެ ތެރެއިން ނުކުޅެދުންތެރިކަން ހުންނަ މީހުންގެ އެލަވަންސް ބޮޑު ކުރަން ހިމަނާފައިވަނީ 341 މިލިއަން ރުފިޔާ އެވެ. އެ ދާއިރާގައި ހިމެނޭ އެހެނިހެން ކަންކަން:

• 1.35 ބިލިއަން ރުފިޔާ: ކަރަންޓުގެ އަގުހެޔޮކުރުމަށް

• 1 ބިލިއަން ރުފިޔާ: އާސަންދައަށް

• 200 މިލިއަން ރުފިޔާ: ބޭސްފަރުވާ ކުރުމަށް ދޭ އެހީ

ނުކުޅެދުންތެރިކަން ހުންނަ މީހުންނާއި ކުދީންނަށް ދައުލަތުން މިހާރު ދެނީ މަހަކު 2،000 ރ. ގެ އިނާޔަތެކެވެ. އެ އިނާޔަތް ބޮޑު ކުރެއްވުމަކީ ރައީސް އިބްރާހިމް މުހައްމަދު ޞާލިހު ގެ ރިޔާސީ ވައުދަކަށް ވާއިރު އެކަން ކުރައްވާނެ ކަމަށް މި އަހަރުގެ ފެބްރުއަރީ މަހުގެ ތިންވަނަ ދުވަހު ރައީސް ޞާލިހު އިއްވެވި ރިޔާސީ ބަޔާނުގައިވެސް ވަނީ ވިދާޅުވެފައެވެ.

އެގޮތުން، ރައީސް ޞާލިހް ދެއްކެވި ވާހަކަފުޅުގެ ތެރޭގައި އެދުވަހުވެސް އެމަނިކުފާނު ވަނީ، މިހާތަނަށް އައިއިރުވެސް ނުކުޅެދުންތެރިކަން ހުންނަ މީހުންނާބެހޭ ޖުމްލަ އަދަދާ ތަފްޞީލް އެނގޭ ޤައުމީ ދަފްތަރެއް ރާއްޖޭގައި އެކަލަވާލާފައި ނެތް ކަން ފާހަގަކުރައްވާފައެވެ. އަދި އެފަދަ ދަފްތަރެއް އެކުލަވާލުމުގެ މަސައްކަތް ކުރިއަށް ދާކަމުގައިވެސް ރައީސް ވިދާޅުވިއެވެ.
މިއާއެކު އެމަނިކުފާނު ވަނީ އެދަފްތަރު ނިންމައި މިއަހަރުގެ ފަހު ކުއާރޓާގައި ނުކުޅެދުންތެރިކަން ހުންނަ މީހުންނަށް ސަރުކާރުންދޭ ޢިނާޔަތް ބޮޑު ކުރުމަށް ނިންމަވާފައިވާ ކަމަށްވެސް ހާމަކުރައްވާފައެވެ.

އޭގެ ފަހުން، ސެޕްޓެމްބަރު މަހު ކުރިއަށްދިޔަ ތިންވަނަ ވިއަވަތި ކޮންފަރެންސްގައިވެސް ނުކުޅެދުންތެރިކަން ހުންނަ ފަރާތްތަކުގެ އިނާޔަތް ވަރަށް އަވަހަށް ބޮޑު ކުރެވިގެންދާނެ ކަމަށް ރައީސް ވިދާޅުވިއެވެ. އެދުވަހުވެސް ރައީސް ވިދާޅުވީ، ނުކުޅެދުންތެރިކަން ހުންނަ ފަރާތްތަކަށް ދޭ އިނާޔަތް ބޮޑުކުރުމަށް ކުރަމުންދާ މަސައްކަތްތަކުގެ ތެރެއިން މިހާރު ކުރައްވަމުން ގެންދަވާ މަސައްކަތަކީ ދަފްތަރެއް އެކުލަވައިލުމުގެ މަސައްކަތް ކަމަށާ އެ މަސައްކަތް ނިމުމާއެކު ނުކުޅެދުންތެރިކަން ހުރި ފަރާތްތަކަށް ދޭ އިނާޔަތް ބޮޑު ކުރައްވާނެ ކަމަށެވެ. 

އަދި ދޭތެރެއިން ރައީސް އޮފީހުގެ ތަރުޖަމާނު މިއުވާން މުހައްމަދު ބާއްވަވާ ނޫސްވެރިންގެ ބައްދަލުވުމުގައި އޭނާ އަންނަނީ ނުކުޅެދުންތެރިކަން ހުންނަ މީހުންގެ އިނާޔަތް ވަރަށް އަވަހަށް ބޮޑުވާނެ ކަމަށް ވިދާޅުވަމުންނެވެ. 

އެހެންނަމަވެސް، އެލަވަންސް ބޮޑު ކުރަނީ ކިހާ ވަރަކަށް ކަމެއް އަދި ކޮން އިރަކުން ފެށިގެން ކަމެއް ސަރުކާރުން އަދި މިހާތަނަށް ހާމަކޮށްފައެއް ނުވެ އެވެ.