އެމްޓީސީސީން ބާއްވާ "ކަށަވަރު ޕްރޮމޯ"ގެ މިއަހަރުގެ ޕްރޮމޯޝަން ފަށައިފި އެވެ.

މި އަހަރުގެ ޕްރޮމޯޝަން އިފުތިތާހު ކުރުމުގެ ގޮތުން ކަށަވަރު ޝޯރޫމުގައި ބޭއްވި ރަސްމިއްޔާތެއްގައި ޗީފް އޮޕަރޭޓިން އޮފިސަރު ޝާހިދު ހުސެއިން މޫސާއާއި އެމްޓީސީސީގެ އިސްވެރިން ބައިވެރިވެ ވަޑައިގެންނެވި އެވެ.

ކަށަވަރު ޕްރޮމޯއަކީ ކަސްޓަމަރުންނަށް ޑިސްކައުންޓުތަކާއެކު އެމްޓީސީސީގެ ޕްރޮޑަކްޓުތައް ވިއްކުމެވެ.

އެގޮތުން މި ޕްރޮމޯގައި ޔަންމާ އަދި ސުޒުކީ އިންޖީނާއި އިންޖީނުގެ ސްޕެއާ ޕާޓްސް, ކާސްޓްރޯލް އަޑީތެޔޮ, ޕީޕީޖީ ކޯޓިންގްސް, ސްކޮޓް ބެޑާ ފައިބަރު ސާމާނު, މަރޮލް ސްޓީރިން ސިސްޓަމް އަދި އިންޑަސްޓްރިއަލް ގޭސް ފަދަ ޕްރޮޑަކްޓުތަކުން ޑިސްކައުންޓް ލިބޭނެ އެވެ.

ނޮވެމްބަރު އެކަކުން ފެށިގެން އަންނަ ޑިސެމްބަރު މަހުގެ ނިޔަލަށް ކުރިއަށްދާ މި އަހަރުގެ ޕްރޮމޯޝަންގައި ކުރާ ކޮންމެ 5,000 ރުފިޔާގެ ވިޔަފާރިއަކަށް ކޫޕަނެއް ލިބޭނެ އެވެ.

ކޫޕަނުން ބައިވެރިވެވޭ ލަކީޑްރޯގައި ކޮންމެ ހަފުތާއަކު ގުރުއަތުން ހޮވޭ ފަރާތަކަށް ސުޒުކީ 2.5 ހޯސްޕަވަރުގެ އިންޖީނެއް ލިބޭނެ އެވެ. އަދި ޕްރޮމޯޝަން ނިންމާލަމުން ނެގޭ ގުރުއަތުން ހޮވޭ ފަރާތަކަށް ޔަންމާ 35 ހޯސްޕަވަރުގެ އިންޖީނެއް ލިބޭނެ އެވެ. މިއީ ދެ ލައްކަ ރުފިޔާގެ އަގުހުރި އިންޖީނެކެވެ.

ކަށަވަރު ޕްރޮމޯ ޓާގެޓަކީ އޮޑިވެރިންނާއި މަސްވެރިންނާއި އިންޖީނިއަރުންނާއި ޓޫރިޒަމް އަދި ޓްރާންސްޕޯޓް ސެކްޓާގައި މަސައްކަތްކުރާ ފަރާތްތަކެވެ.

އެމްޓީސީސީން ބުނީ, މި ޕްރޮމޯޝަންގެ މުއްދަތުގައި މާލެ ބަނދަރު, ހުޅުމާލެ, ވިލިމާލެ އަދި ތިލަފުށީގައި އައުޓްޑޯ އިވެންޓުތައް ބާއްވާނެ ކަމަށެވެ. އަދި ރ. އަލިފުށި, ރ. ވާދޫ, ތ. ހިރިލަންދޫ, ދ. ކުޑަހުވަދޫގެ އިތުރުން އއ. އުކުޅަހަށް ޒިޔާރަތް ކުރާނެ ކަމަށް ބުންޏެވެ.