ނ. މަގޫދޫ ކައުންސިލްގެ އަންހެން މެންބަރު އިންތިޚާބު ކުރުމަށް ބާއްވާ ބައި- އިލެކްޝަނާއި، ލ. ކަލައިދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަންގެ ވޯޓުލުން މިއަދު ހެނދުނު ފެށިއްޖެއެވެ.
އިލެކްޝަންސް ކޮމިޝަނުން ވިދާޅުވީ، މި 2 ދެ ބައި-އިލެކްޝަންގެ ވޯޓުލުން މިއަދު ހެނދުނު 8 ޖެހިއިރު ފަށާފައިވާކަމަށެވެ. އަދި ވޯޓުލުން މިއަދު ހަވީރު 4 ޖެހުމާއި ހަމައަށް ކުރިއަށްދާނެކަމަށެވެ.
މި 2 ބައި- އިލެކްޝަންގައި ވޯޓުލުމަށްޓަކާ ޖުމްލަ 3 ފޮށްޓެއް އިލެކްޝަންސް ކޮމިޝަނުން ވަނީ ބަހައްޓާފައެވެ. އެއީ މަގޫދޫ ސްކޫލުގައި ބަހައްޓާފައިވާ ފޮށްޓަކާއި، ކަލައިދޫ ސްކޫލުގައި ބަހައްޓާފައިވާ ފޮށީގެ އިތުރުން، މާލޭގައި ދިރިއުޅޭ މި 2 ރަށުގެ ރައްޔިތުން ވޯޓުލުމަށްޓަކާ އިމާދުއްދީން ސްކޫލުގައި ބަހައްޓާފައިވާ ވޯޓު ފޮށްޓެކެވެ.
އަންހެނުންގެ ކޮމެޓީތަކުގެ އިންތިޚާބުތައް ގާތްގާތުގައި ބޭއްވުމަކީ ބޮޑު ޚަރަދެއް ހިނގާކަމަކަށްވާތީ، ޤާނޫނަށް ދާދިފަހުން ވަނީ އިސްލާހު ގެނެސްފައެވެ.
ލާމަރުކަޒީ ޤާނޫނަށް މިދިޔަ ހަފްތަގައި ގެނައި އިސްލާހުގައި އަންހެނުންގެ ކޮމެޓީތަކުގެ އިންތިޚާބުތައް އަހަރަކު އެއްފަރު ބޭއްވުމަށް ވަނީ ފާސްކޮށްފައެވެ.
Advertisement
This content is created and paid for by advertisers and does not involve Voice Journalists
