ސްރީލަންކާގެ ގައުމީ ވަފުދުގެ މެންބަރެއްގެ ގޮތުގައި ކޮޕް27 ގައި ބައިވެރިވެވަޑައިގެންނެވުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިސްރަށް ވަޑައިގެންނެވުމުން ކުރީގެ ބަންޑާރަ ނާއިބު އަދި އެމްޑީޕީގެ ފުރަތަމަ ރައީސް ޑރ. މުހައްމަދު މުނައްވަރު ފާޑިކިޔުއްވުންތަކާއެކު ސުވާލުތައް އަމާޒުކުރައްވައިފިއެވެ. 

ސްރީލަންކާގެ ރައީސް ރަނިލް ވިކްރަމަސިންހް ވަނީ މޫސުމަށް އަންނަ ބަދަލުތަކާ ގުޅޭ ގޮތުން އެމަނިކުފާނަށް ލަފާ ދެއްވާ މުޝީރަކަށް، ރައީސް ނަޝީދު ހަމަޖައްސަވާފައެވެ.

ނަޝީދު ކޮޕް ސަމިޓުގައި ލަންކާ ތަމްސީލުކުރެއްވުމަށް ވަޑައިގަތުމާއި ގުޅިގެން ޑރ މުނައްވަރު ކުރެއްވި ޓްވީޓެއްގައި ވަނީ ދިވެހިރާއްޖޭގެ ރައްޔިތުންގެ މަޖިލީހުގެ ރައީސް ދިވެހި ރައްޔިތުންގެ ފައިސާއިން މުސާރަ ނަގައިގެން އެހެން ގައުމެއްގެ ވަފުދުގައި އެ ގައުމު ތަމްސީލު ކުރަން ވަޑައިގެންނެވުމުން ނަޝީދަށް ގިނަ ސުވާލުތަކެއް އަމާޒުކުރައްވާފައެވެ. 

އެގޮތުން ޑރ މުނައްވަރު ވަނީ ދިވެހި ދައުލަތުން މުސާރަ ނަގައިގެން ބޭރު ގައުމުތައް ތަމްސީލުކުރައްވާއިރު ދިވެހި ގައުމު ކޮބައިތޯ އައްސަވާފައެވެ. އަދި ދައުލަތަށް ވަފާތެރިވުމަކީ ކޮބައިތޯވެސް ޑރ މުނައްވަރު ވަނީ އައްސަވާފައެވެ. 

ކޮޕްސަމިޓުގައި ރައީސް ނަޝީދު ލަންކާ ތަމްސީލުކުރައްވާތީ ޑރ މުނައްވަރުގެ އިރުތުންވެސް ބައެއް ފަރާތްތައް ސޯޝަލް މީޑިއާގައި ނުރުހުން ފާޅުކުރައްވާފައިވެއެވެ. 

ނަޝީދުގެ ދަތުރުފުޅާއި ގުޅިގެން މަޖިލީހުގެ އިދާރާއިން އިއްޔެ ބުނީ މި ދަތުރުފުޅުގައި "ކްލައިމެޓް ޕްރޮސްޕެރިޓީ ޕްލޭންސް ފްލެގްޝިޕް އިވެންޓް: ޕޭވިންގް ދަ ވޭ ފްރޮމް ވަލްނަރެބިލިޓީ ޓު ޕްރޮސްޕެރިޓީ" ގައި ނަޝީދު ބައިވެރިވެވަޑައިގަންނަވާނެ ކަމަށެވެ. 

މިސްރަށް ކުރައްވާ ދަތުރުފުޅުގައި ސީވީއެފް އާއި ވީ20 އަދި އެހެނިހެން ގައުމުތަކުގެ އިސް އޮފިޝަލުންނާއިވެސް ކޮޕް27 ގެ ހަވާސާގައި ރައީސް ނަޝީދު ބައްދަލު ކުރައްވާނެކަމަށް މަޖިލީހުން ވަނީ ބުނެފައެވެ.