1443 ވަނަ އަހަރުގެ ހައްޖު ދަތުރުގައި މައްކާ ހޮޓަލުގައި ތިބި 23 ދުވަހަށް ހައްޖު ކޯޕަރޭޝަނުން 39 މިލިއަން ޚަރަދުކޮށްފައިވާކަމަށް އިސްލާމިކް މިނިސްޓްރީއިން ހާމަކޮށްފިއެވެ. 

އިސްލާމިކް މިނިސްޓްރީއިން މިފަދައިން ހާމަކޮށްފައިވަނީ 1443 ވަނަ އަހަރު ހއްޖު ކޯޕަރޭޝަނުން މައްކާ އަދި މަދީނާއަށް ކުރި ދަތުރުތަކަށް ކުރި ޚަރަދުގެ ތަފްސީލު ހޯދުމަށް މަޖިލީހުގެ މާފަންނު ދެކުނު ދާއިރާގެ މެމްބަރު އިބްރާހިމް ރަޝީދު (ބޮންޑާ) ކުރި ސުވާލަށް ލިޔުމުން ޖަވާބު ހުށައަޅުއްވަމުންނެވެ. 

ބޮންޑާ ވަނީ 1443 ވަނަ އަހަރުގެ ހައްޖު ދަތުރުގައި ހައްޖު ކޯޕަރޭޝަނުން މައްކާ އަދި މަދީނާގެ ހޮޓާތަކަށް ކުރި ޚަރަދުގެ ތަފްސީލު ކޮންމެ ހޮޓަލެއްގައި ހޭދަވި ދުވަހާއެކު ބަޔާންކޮށްދިނުމަށް އިސްލާމިން މިނިސްޓަރުގެ އަރިހުން އެދިފައެވެ. އަދި މުޠއައްވިފަށް ދެއްކި ފައިސާގެ އަދަދާއި ހައްޖަށް ދިއުމަށް އާންމުން ދެއްކި ފައިސާގެ އިތުރުން މި ދަތުރަށް ދައުލަތުގެ ބަޖެޓުން ޚަރަދުކޮށްފައިވާނަމަ އެކަމުގެ ތަފްސީލުތައް ހާމަކޮށްދެއްވުމަށްވެސް ބޮންޑާ ވަނީ އެދިފައެވެ. 

Advertisement

ބޮންޑާގެ އެ ސުވާލުތަކަށް ލިޔުމުން ޖަވާބުދެއްވަމުން އިސްލާމިކް މިނިސްޓަރު ޑރ އަލީ ޒާހިރު ވިދާޅުވީ 1443 ވަނަ އަހަރުގެ މައްކާ ދަތުރުގައި މާއްކާ ހޮޓަލުގައި ހޭދަކޮށްފައިވާ 23 ދުވަހަށް މޯލްޑިވސް ހައްޖު ކޯޕަރޭޝަންގެ ފަރާތުން މައްކާ ހޮޓަލަށް ތިރީސް ނުވަ މިލިއަން ހަލައްކަ ނުވަދިހަ ދެހާސް ހަތް ސަތޭކަ އައްޑިހަ ފަސްރުފިޔާ ތިރީސް ނުވަ ލާރި ހޭދަކޮށްފައިވާކަމަށެވެ. 

އެ އަހަރުގެ ހައްޖު ދަތުރުގައި މަދީނާ ހޮޓަލުގައި ހޭދަކޮށްފައިވާ 2 ދުވަހަށް ހައްޖު ކޯޕަރޭޝަނުން އެއްމިލިއަން އައްލައްކަ ހަތްހާސް ހަސަތޭކަ ނުވަދިހަ ދެރުފިޔާ ފަސްލާރި ޚަރަދުކޮށްފައިވާކަމަށް އިސްލާމިކް މިނިސްޓަރު ވަނީ ހާމަކުރައްވާފައެވެ. 

އެދަތުރުގައި މުޠައްވިފަށް ކޮށްފައިވާ ޚަރަދުގެ ޖުމްއަކީ ދިހަމިލިއަން ހަލައްކަ  ސާޅީސްހަތަރުހާސް ތިންސަތޭކަ ތިރީސްދެރުފިޔާ ނުވަދިހަނުވަލާރި ކަންވެސް މިނިސްޓަރު ވަނީ ބަޔާންކުރައްވާފައެވެ. 

މިނިސްޓަރު ވިދާޅުވީ އެ ދަތުރުގައި އަމިއްލަގޮތުން ފައިސާ ދައްކައިގެން އެއްވެސް ފަރާތެއް ހައްޖުކޯޕަރޭޝަންގެ ފަރާތުން ގެންގޮސްފައި ނުވާނެކަމަށެވެ. އަދި އެ އަހަރުގެ ދަތުރަށް ދައުލަތުގެ ބަޖެޓުން އެއްވެސް ހޭދައެއް ކޮށްފައި ނުވާކަންވެސް މިނިސްޓަރު ވަނީ ފާހަގަކުރައްވާފައެވެ.