އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ 42.6 ބިލިއަން ރުފިޔާގެ ބަޖެޓް ބަހުސް މަޖިލީހުގައި މާދަމާ ފެށާއިރު، މިފަހަރުވެސް ބަހުސްކުރުން ރޭގަނޑާއި ހަމައަށް ކުރިއަށްދާނެ ކަމަށް މަޖިލީހުގެ ނައިބު ރައީސް އީވާ ވިދާޅުވެއްޖެެއެވެ.
އީވާ ވިދާޅުވީ ބަޖެޓް ބަހުސް ކުރިއަށްދާނީ މާދަމާ އިން ފެށިގެން ތިން ދުވަހަށް ކަމަށާ، އަދި ބަޖެޓް ބަހުސް ކުރިއަށް ދާނީ ބަހުސް ބޭއްވުމަށް ތާވަލް ކުރެވިފައިވާ ދުވަސްތަކުގައި ހެނދުނު 9 އިން ރޭގަނޑު 10 ޖަހަންދެން ކަމަށެވެ.
"އެހެންނަމަވެސް ބުރާސްފަތި ދުވަހު ރޭގަނޑު 10 ޖަހާއިރަށްވެސް ބަހުސް ނުނިމެންޏާ އަޅުގަނޑުމެން ހަމަ ކުރިއަށް ގެންދާނީ،" އީވާ ވިދާޅުވި އެވެ.
މިއާއެކު އީވާ ވިދާޅުވީ ބަޖެޓަށް ބަހުސް ކުރުމަށް ކޮންމެ މެމްބަރަކަށް ވެސް 15 މިނިޓް ލިބޭނެ ކަމަށެވެ. އެހެންކަމުން ބަޖެޓަށް ބަހުސްކުރަން ބޭނުންވާ މެންބަރުން މާދަމާއިން ފެށިގެން ބުރާސްފަތި ދުވަހު މެންދުރު 12 ގެ ކުރިން ފުރުސަތަށް އެދުމަށްވެސް މެންބަރުންގެ އަރިހުން އިވާ އެދިވަޑައިގެންނެވިއެވެ.
އަންނަ އަހަރަށް ލަފާކޮށް މަޖިލީހަށް ހުށަހެޅި ދައުލަތުގެ ބަޖެޓުގައި އާމްދަނީގެ ގޮތުގައި 24.3 ބިލިއަން ރުފިޔާ ލިބޭނެ ކަމަށް ލަފާކޮށްފައިވާއިރު ޓެކްސް އިން އާމްދަނީގެ ގޮތުގައި ދައުލަތަށް 15.4 ބިލިއަން ރުފިޔާ ލިބޭނެ ކަމަށް ވަނީ ލަފާކޮށްފައެވެ.
އަދި ބަޖެޓްގެ އޯވަރޯލް ބެލެންސް އަކީ 9،748 މިލިއަން ރުފިޔާގެ ޑެފިސިޓެކެވެ. އަދި ޕްރައިމަރީ ބެލެންސަކީ 6،883 ބިލިއަން ރުފިޔާގެ ޑެފިސިޓެކެވެ.
Advertisement
This content is created and paid for by advertisers and does not involve Voice Journalists
