ސަރުކާރުން ޚަރަދުކުރާ މިންވަރު މިދާ ގޮތަށް އިތުރު ވަމުންދާނަމަ އަންނަ 2023 ވަނަ އަހަރު 50 ބިލިއަން ޚަރަދުވާނެ ކަމަށް ނޮޅިވަރަމް ދާއިރާގެ މެންބަރު މެންބަރު މުހައްމަދު ނަޝީދު ވިދާޅުވެއްޖެއެވެ.
މިހާރު ކުރިއަށް ރައްޔިތުންގެ މަޖިލީހުގެ ތިންވަނަ ދައުރުގެ 35 ވަނަ ޖަލްސާގައި ވާހަކަ ދައްކަވަމުން މޮސްޓާ ވަނީ 2020 ވަނަ އަހަރުން ފެށިގެން ދައުލަތުން އަންދާޒާ ކުރި ބަޖެޓާއި، އެ އަހަރުގައި ޚަރަދުވި މިންވަރުގެ ތަފްސީލް ހާމަކޮށްދެއްވާފައެވެ.
"ކޮންމެ އަހަރަކު ފާސްކުރާ ބަޖެޓު އެތައް މިލިއަނަކުން ޑެފިސިޓް ވެގެން މިދަނީ. ދާއިރު މިއީ ކޮން ކަންތައްތަކެއް ކޮށްގެންތޯ؟ 2020 ވަނަ އަހަރަށް ދައުލަތުން ލާފަކޮށްފައި ފޮނުވީ 37 ބިލިއަން. ޚަރަދުވި ކަމަށް މި އިންނަނީ 30 ބިލިއަން. ކޮވިޑާއި ގުޅިގެން. 2021 ވަނަ އަހަރަށް 34 ބިލިއަން ދައުލަތުން ލަފާކޮށްފައި ފޮނުވި. ޚަރަދުވި ކަމަށް މި އިންނަނީ 37 ބިލިއަން. 2022 ވަނަ އަހަރަށް 36 ބިލިއަން، 42 ބިލިއަން ޚަރަދުވި ކަމަށް. މި އަހަރު އަޅުގަނޑުމެންނަށް މީނީ 42 ބިލިއަން. އަޅުގަނޑުމެން މި ލަފާ ކުރަނީ މިގޮތަށް ދާކަމަށް ވެއްޖެއްޔާ 2023 ވަނަ އަހަރު 50 ބިލިއަނުގެ ބަޖެޓެއް ޚަރަދުވާނެކަމަށް."
މެންބަރު މުހައްމަދު ނަޝީދު
މޮސްޓާ އިތުރަށް ވިދާޅުވީ، ނޮޅިވަރަމް ސުކޫލުގައި މަލްޓި ޕާޕަސް ހޯލު ހެދުމުގެ މަސައްކަތަށް ދެ މިލިއަން އަންނަ އަހަރުގެ ބަޖެޓުގައިވެސް ޖަހާފައިވާ ކަމަށާ، އަދި މިދިޔަ އަހަރު އެ ހޯލުގެ ޕްރީ ޓެންޑަރިންގ ގެ މަސައްކަތަށް ނުވަ ލައްކަ ބަޖެޓް ކޮށްފައިވާ ކަމަށެވެ. އެހެންނަމަވެސް، އެކަމުގެ އެއްވެސް އަމަލީ މަސައްކަތެއް އަދިވެސް ނުކުރެވޭ ކަމަށް އޭނާ ވިދާޅުވިއެވެ. އަދި ނޮޅިވަރަމް ސުކޫލަށް އިތުރު 12 ކްލާސްރޫމް ބޭނުންވާއިރު އެކަން ބަޖެޓުގައި ނުހިމަނައި އަންނަ އަހަރުގެ ބަޖެޓުގައި ހިމަނާފައިވާ 5 ކްލާސްރޫމަކީ މިހާރުވެސް ނިމިފައިވާ ކްލާސްރޫމް ތަކެއް ކަންވެސް އޭނާ ފާހަގަކުރެއްވިއެވެ.
މީގެ އިތުރުން މޮސްޓާ ވިދާޅުވީ، ސަރުކާރުން ބަޖެޓް ފާސްކޮށްފައިވަނީ އެއްވެސް ވަރަކަށް ރައްޔިތުންނާއި މަޝްވަރާ ނުކޮށް ކަމަށާ، ބަޖެޓުގެ ކަންކަމުގައި، މަސައްކަތްތައް ކުރިއަށްދަނީ މަޖިލީހުން ހޮވާ ލެވިފައިވާ "ސީނިއާ މެންބަރުން" ތަކެއް ލައިގެން ކަމަށެވެ. އަދި އެ މެންބަރުން ބަޖެޓު ކުރަމުންދަނީ އެ ބޭފުޅުން ހިމެނޭ ދާއިރާއަށް ކަމަށްވެސް އޭނާ ވިދާޅުވިއެވެ.
.
Advertisement
This content is created and paid for by advertisers and does not involve Voice Journalists
