މިޞްރުގެ ޝަރްމުއްޝައިޚްގައި ބާއްވާ އ.ދ.ގެ 2022 ވަނަ އަހަރުގެ ކުލައިމެޓް ޗޭންޖް ކޮންފަރެންސް ( ކޮޕް 27) ގައި ރާއްޖޭގެ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ލަންކާ ތަމްސީލު ކުރެއްވި ނަމަވެސް އެމަނިކުފާނުގެ އެ ދަތުރުފުޅަށް ލަންކާއިން ޚަރަދު ނުކުރާ ކަމަށް އެގައުމުގެ ސަރުކާރުން ބުނެފި އެވެ.
ލަންކާގެ އެކްސްޓާނަލް އެފެއާސްގެ ޑިރެކްޓަރު ކުރެއްވި ޓުވީޓެއްގައި ވިދާޅުވީ ރައީސް ނަޝީދުގެ ދަތުރުފުޅަށް އެގައުމުން ހަރަދުކުރި ކަމަށް ބައެއް އޮންލައިން ރިޕޯޓުތަކުން ބުނި ނަމަވެސް، އެ ދަތުރަށް ލަންކާ ސަރުކާރުން ފަންޑު ނުކުރާ ކަމަށެވެ. އަދި ރައީސް ނަޝީދަކީ ލަންކާގެ ރައީސްގެ ތިމާވެއްޓާއި ބެހޭ އެޑްވައިޒަރެއް ކަމަށްވެސް އޭނާ ވިދާޅުވިއެވެ.
ލަންކާ ސަރުކާރުން މިފަދައިން ބުނެފައިވާއިރު، ރައީސް ނަޝީދުގެ ދަތުރުފުޅަށް ރާއްޖޭގެ ރައްޔިތުންގެ މަޖިލީހުން ވެސް ޚަރަދު ނުކުރާކަމަށް މަޖިލީހުގެ އިދާރާއިން ވަނީ ބުނެފައެވެ.
މި މަހުގެ 4 އިން 9 އަށް ރައީސް ނަޝީދު މިސްރަށް ކުރައްވާ ދަތުރުފުޅުގައި ކޮޕް27 ގައި ބައިވެރިވެވަޑައިގަތީ ޑިމޮކްރަޓިކް ސޯޝަލިސްޓް ރިޕަބްލިކް އޮފް ސްރީލަންކާގެ ޤައުމީ ވަފުދު މެމްބަރެއްގެ ގޮތުގައި ކަމަށް މަޖިިލީހުން ބުނެފައިވެއެވެ.
ކޮޕް 27ގައި ރައީސް ނަޝީދު ލަންކާ ތަމްސީލް ކުރެއްވިއިރު، މި ކޮންފަރެންސް ގައި ރާއްޖެ ތަމްސީލް ކުރައްވީ ނާއިބު ރައީސް ފައިސަލް ނަސީމެވެ. އެގޮތުން އެމަނިކުފާނާއި ސަރުކާރުގެ މަތީ ފަންތީގެ ވަފްދެއްވެސް ވަނީ މިމަހު ހަތަރުވަނަ ދުވަހު ވަނީ މިސްރަށް ފުރާވަޑައިގެންފައެވެ.
Advertisement
This content is created and paid for by advertisers and does not involve Voice Journalists
