މުދަލާއި ޚިދުމަތުގެ އަގުން ޓެކްސް ނެގުމުގެ ބިލު މުޅި މަޖިލީހުގެ ކޮމިޓީން ދިރާސާ ކުރުމަށްފަހު، ބަހުސަށް ހުޅުވާލުމުން ބަހުސް ގައި ބައިވެރިވާނެ މެންބަރެއް ނެތި, މަޖިލީހުގެ ކޯރަމްވެސް ހަމަ ނުވުމުން ކުރިއަށް ނުގެންދެވޭނެ ކަމަށް ވިދާޅުވެއްޖެެއެވެ. 

އަންނަ ޖެނުއަރީމަހުން ފެށިގެން ރައްޔިތުން އަތުން ނަގާ ޓެކްސް ނުވަތަ ޖީއެސްޓީ ބޮޑުކުރުމަށް ސަރުކާރުން މަޖިލީހަށް ބިލު ހުށައަޅާފައިވާއިރު މަޖިލީހުން އެ ބިލު ފާސްކޮށްފިކަމަށް ވާނަމަ ޖީއެސްޓީ 6 އިންސައިން 8 އިންސައްތައަށް އަދި ޓީޖީއެސްޓީ 12 އިން 16 ޕަސެންޓަށް އުފުލިގެންދާނެއެވެ. އެއާއެކު ތަނެތީގެ އަގުތަކަށްވެސް ބޮޑެތި ބަދަލުތަކެއް އަންނާނެއެވެ. 

އެ ނިންމުމަށް މަޖިލީހުގައި ބައެއް މެމްބަރުން ދެކޮޅު ހަދަމުން ދިޔަނަމަވެސް އެމްޑީޕީގެ ޕީޖީ ގުރޫޕުން ވަނީ ސަރުކާރުން އެދިފައިވާ ގޮތަށް ޓެކްސް ބޮޑުކުރާ ބިލު ފާސްކުރުމަށް ވިޕް ނެރެފައެވެ. އަދި އެ ވިޕާއި ޚލާފުވާ މެމްބަރުންނާއި ދޭތެރޭގައި ފިޔަވަޅު އަޅާނެކަމަށް އަންގާ އިންޒާރުދީފައި ވާއިރު، މިދިޔަ އޮކްޓޯބަރ މަހުގެ 31 ވަނަ ދުވަހު، ސަރުކާރުގެ އެ ބިލަށް މެމްބަރުން ހުށަހެޅި އިސްލާހުތައް ބޭރު ކޮށްލައި ސަރުކާރުން ފޮނުވި ގޮތަށް މުޅި މަޖިލީހުގެ ކޮމިޓީން އެ ބިލު ވަނީ ފާސް ކޮށްފައެވެ.

އެއަށްފަހު އެ ބިލަށް ބަހުސް ކުރުމަށް މިއަދު އޮތް މަޖިލީހުގެ ޖަލްސާގައި ހުޅުވާލުމުން ބަހުސްގައި އެއްވެސް މެންބަރަކު ބައިވެރިވެފައި ނުވާކަމަށް މަޖިލީހުގެ ރިޔާސަތުގައި އިންނެވި މަޖިލީހުގެ ވިލުފުށީ ދާއިރާގެ މެންބަރު ހަސަން އަފީފު ވަނީ ވިދާޅުވެފައެވެ. އަދި މީގެ އިތުރުން އެ ބިލަށް ވޯޓަށް އެހުމަށް މަޖިލީހުގައި ކޯރަމް ވެސް ހަމަ ނުވާކަމަށާ، ވުމާއެކު މިއަދުގެ ޖަލްސާގައި ވޯޓަށް އެހެންވެސް ނެތް ކަމަށް އޭނާ ވިދާޅުވިއެވެ.

ކޯރަމް ހަމަނުވެގެން މިއަދު ޓެކްސް ބިލަށް ވޯޓަށް އެހިފައި ނުވާއިރު، މި ބިލާއި ދެކޮޅަށް މިއަދު މަޖިލިސް ދޮރުމަތީ އިދިކޮޅު ކޯލިޝަނުން ވަނީ އިހްތިޖާޖު ވެސް ކޮށްފައެވެ.