އަވައްޓެރި ލަންކާގެ ފަތުރުވެރިކަން ކުރިއެރުވުމަށް ރާއްޖެއިން އެހީތެރިކަން ފޯރުކޮށްދިނުމަށް ލަންކާ ސަރުކާރުން އެދިއްޖެއެވެ.
ލަންކާއިން ރިޕޯޓުކޮށްފައިވާ ގޮތުގައި، ލަންކާގެ ފަތުރުވެރިކަން ކުރިއެރުވުމަށް ރާއްޖެއިން އެހީތެރިވެދިނުމަށް ލަންކާގެ ރައީސް ރަނިލް ވިކްރަމްސިންހާ ވަނީ ނައިބުރައީސް ފައިސަލް ނަސީމު އަރިހުން އެދިވަޑައިގެންފައެވެ.
ލަންކާގެ ރައީސް އޮފީހާއި ހަވާލާ ދީ އެ ނޫހުގައި ރިޕޯޓްކޮށްފައިވާ ގޮތުގައި ރަނިލް ވިކްރަމްސިންހާ ވަނީ ލަންކާގެ ދަނޑުވެރިކަމަށާއި ކްރޫޒް އަދި ހައި އެންޑް ފަތުރުވެރިކަމަށް ރާއްޖޭން އިންވެސްޓް ކޮށްދިނުމަށްވެސް އެދިވަޑައިގެންފައެވެ.
ނައިބުރައީސް ފައިސަލް ލަންކާއަށް ކުރައްވާ ދަތުރުފުޅުގައި ލައްކާގެ ރައީސްއާއި ވަނީ އިއްޔެ ބައްދަލުކުރައްވާފައެވެ.
އެފަހުން ލަންކާގެ ރައީސް އޮފީހުން ވަނީ ލަންކާގެ އިގްތިސާދު ރަނގަޅުކުރުމަށް ދިވެހިރާއްޖެއިން އިންވެސްޓުކުރުމަށް ލަންކާ ސަރުކާރުން ހުށައަޅުއްވާފައިވާކަން ބާޔަންކޮށް ބަޔާނެއް ނެރެފައެވެ.
ލަންކާގެ އިގްތިސާދު ރަނގަޅުކުރުމަށް ރާއްޖެއިން އިންވެސްޓު ކުރުމުގެ އިތުރުން، ދެ ޤައުމުގެ ގުޅުން ބަދަހިކުރުމާއެކު، މޫސުމަށް އަންނަ ބަދަލުތަކުގެ ސަބަބުން ކުރިމަތިވާ ގޮންޖެހުންތަކުން އަރައިގަތުމަށްޓަކައި ކުރަންޖެހޭ ދިރާސާތައް ކުރުމަށް ޚާއްޞަ ޔުނިވާސިޓީއެއް ޤާއިމުކުރުމާއި، ސަރަހައްދީ ފެންވަރުގައި ހިންގާ މަސްތުވާތަކެތީގެ ވިޔަފާރި ހުއްޓުވުމުގައި ދެ ޤައުމު ގުޅިގެން މަސައްކަތްކުރުމާމެދު އެ ބައްދަލުވުމުގައި ދެ ބޭފުޅުން މަޝްވަރާ ކުރެއްވިކަން ވެސް އެ ބަޔާނުގައި ފާހަގަކޮށްފައިވެއެވެ.
ލަންކާގެ ހަމަނުޖެހުމަށްފަހު، ގައުމަށް ގެނައި ސިޔާސީ ބޮޑެތި ބަދަލުތަކާއެކު، އާ ސަރުކާރުން ވަނީ އެ ގައުމުގެ އިގްތިސާދު ރަނގަޅު ކުރުމުގެ މަސައްކަތް ފަށާފައެވެ. އަދި އެ ގައުމު މިހާރު އޮތް ހާލަތުން އަރައިގަތުމަށް ދޭދޭ ގައުމުތަކުގެ އެހީތެރިކަން ފޯރުކޮށްދިނުމަށްވެސް ލަންކާއިން ދަނީ އެދެމުން ނެވެ.
Advertisement
This content is created and paid for by advertisers and does not involve Voice Journalists
