ދިވެހި ފައިސާ ޗާޕުކުރުން ހުއްޓާލުމަށް އިންޓަނޭޝަނަލް މަނިޓަރީ ފަންޑު (އައިއެމްއެފް) އިން އެދިއްޖެއެވެ.

އައިއެމްއެފްގެ ޗާޓަރާ އެއްގޮތްވާ ގޮތުގެ މަތިން ދިވެހި ސަރުކާރާއެކު ހަދަންޖެހޭ އެގްޒެކެޓިވް ބޯޑުގެ ކޮންސަލްޓޭޝަން ނިންމައި އިއްޔެ އެ އިދާރާގެ ވެބްސައިޓުގައި ޝާއިއުކޮށްފައިވާ ބަޔާނުގައި އައިއެމްއެފް އިން ވަނީ އިންފްލޭޝަން ކޮންޓްރޯލް ކުރުމަށާއި، ފައިސާގެ އަގު ދަށްވެ ނުދީ ހިފެހެއްޓުމަށް ފައިސާ ޗާޕުކުރުން ނިމުމަކަށް ގެނައުމަށް ސަރުކާރަށް ގޮވާލާފައެވެ. އަދި ފައިސާ ޗާޕުކުރުން ހުއްޓާ ނުލައިފިނަމަ ދިވެހިރާއްޖެއަށް އިގްތިސާދީ ގޮތުން ދަތިތަކާއި ކުރިމަތިލާން ޖެހޭނެ ކަމަށް ބުނެފައިވެއެވެ.

އަދި ހަކަތައިގެ އަގުތަކާއި، ކާބޯތަކެތީގެ އަގުތައް އުފުލެމުން ދިިޔުމާއި، އަންނަ އަހަރު ބާއްވާ ރިޔާސީ އިންތިޚާބާއެކު ޚަރަދުކުރުންތައް އިތުރުވާނެތީ، އިންފްލޭޝަން ރޭޓު 4.9 އިންސައްތައަށް އަރާނެ ކަމަށް އައި.އެމް.އެފްއިން ލަފާކުރެއެވެ.

Advertisement

މިއާއެކު އައިއެމްއެފްއިން ވަނީ އިންފްލޭޝަންގެ ސަބަބުން ކަޅު ބާޒާރުގައި ޑޮލަރުގެ އަގު އުފުލުން ހުއްޓުވުމަށް މަނިޓަރީ ސިޔާސަތު ހަރުދަނާ ކުރުމަށް މަރުކަޒީ ބޭންކުން ތައްޔާރުވާން ޖެހޭނެކަން ފާހަގަކޮށްފައިވެއެވެ.

މީގެ އިތުރުން، ދިވެހި ސަރުކަރުން ފައިސާ ޗާޕްކުރުން ހުއްޓާނުލައިފިނަމަ ސްރީލަންކާގެ އިގްތިޞާދަށް އައި ކަހަލަ ބޮޑު ލޮޅުމެއް ރާއްޖެއަށް ވެސް ކުރިމަތިވެދާނެ ކަމަށް އައިއެމްއެފް އިން ބުނެފައިވެއެވެ. 

ސްރީލަންކާ އިންވެސް 2014 ވަނަ އަހަރުންފެށިގެން ފައިސާ ޗާޕް ކޮށް މާކެޓަށް ނެރެން ފެށުމާއި ގުޅިގެން، ފާއިތުވި 7 އަހަރު ދުވަހުގެ ތެރޭގައި އެގައުމުގެ އިގްތިސާދީ ހާލަތު ވަނީ ވަރަށް ބޮޑަށް ދަށަށް ގޮސްފައެވެ. 

ސަރުކާރުން އަންނަނީ 2020 ވަނަ އަހަރުން ފެށިގެން ކޮންމެ އަހަރަކުވެސް ފައިސާ ޗާޕުކުރަމުންނެވެ. އޭގެ ސަބަބުން ދިވެހި ރުފިޔާގެ އަގު ހިފަހައްޓަން ސަރުކާރުގެ ބޭރު ފައިސާގެ ރިޒާވް ވަރަށް ބޮޑަށް ބޭނުން ކުރަން ޖެހުނެވެ. ފާއިތުވި އޮކްޓޯބަރު މަހުގެ ނިޔަލަށް ރިޒާވްގައި ހުރީ 105 މިލިއަން ޑޮލަރެވެ.