ވެރިކަން ކުރާ މައި ޕާޓީ، އެމްޑީޕީގެ ޕްރައިމަރީއާ ގުޅޭ ނިންމުންތަކެއް ނިންމުމަށް އެ ޕާޓީގެ ގައުމީ މަޖިލީހުގެ ޖަލްސާއެއް މިރޭ ބޭއްވުމަށް ހަމަޖެހިއްޖެއެވެ.

މި ބައްްްްދަލު ވުމަށް އެމްޑީޕީ ގައުމީ މަޖިލިސް މެމްބަރުންނަށް ދައުވަތު އަރުވައި އެމްޑީޕީއިން ނެރުނު އެންގުމެއްގައި ބުނީ، ބައްދަލުވުން އޮންނާނީ މިރޭ 8:30 ގައި ތާޖުއްދީން ސްކޫލްގައިކަމަށެވެ.

އަދި މި ބައްދަލުވުމުގައި އެންމެ ކުރިން އޮންނާނީ ރިޔާސަތުން ދެއްވާ މައުލޫމާތު ހިއްސާކުރުން ކަމަށާ އެއަށްފަހު ރިޔާސީ ޕްރައިމަރީއަށް ގައުމީ މަޖިލީހުން ނަގާ ފަސް މެންބަރުންގެ ކޮމިޓީ ނެގުން އޮންނާނެ ކަމަށްވެސް ބުނެފައިވެއެވެ. އެމްޑީޕީގެ އަސާސީ ގަވައިދުގައިވާ ގޮތުން، އެ ޕާޓީގެ ޕްރައިމަރީ ބާއްވައި، އިންތިޒާމްކުރުމުގެ ޒިންމާ މަތިކޮށްފައި ވަނީ މި ކޮމިޓީއަށެވެ.

• 18 ޑިސެމްބަރ 2022– ރިޔާސީ ޕްރައިމަރީ އިއުލާން ކުރުން

•18 ޑިސެމްބަރ 2022 – ރިޔާސީ ޕްރައިމަރީ ކުރިމަތިލުމަށް ފުރުޞަތު ހުޅުވާލުން

•24 ޑިސެމްބަރ 2022– ކެންޑިޑޭޓުން ވާދަ ކުރުމުގެ ފޯރމް ބަލައިގަތުމުގެ މުއްދަތު ހަމަވުން (16:00 އަށް)

• 26 ޑިސެމްބަރ 2022 – ކެންޑިޑޭޓުންގެ ފައިނަލް ލިސްޓު، ކެންޑިޑޭޓް ނަންބަރާ އެކު އިއުލާން ކުރުން

• 28 ޑިސެމްބަރ 2022 – ރިޔާސީ ޕްރައިމަރީ ވޯޓަރޒް ލިސްޓް އާންމު ކުރުމާއި، ލިސްޓަށް ޝަކުވާ ހުށަހެޅުމަށް ހުޅުވާލުން

• 31 ޑިސެމްބަރ 2022 – ވޯޓަރޒް ލިސްޓަށް ހުށަހަޅާ ޝަކުވާ ބަލައިގަތުމުގެ މުއްދަތު ހަމަވުން (16:00 އަށް)

• 03 ޖެނުއަރީ 2023 – ރިޔާސީ ޕްރައިމަރީ ފައިނަލް ވޯޓަރޒް ލިސްޓް އާންމު ކުރުން

• 10 ޖެނުއަރީ 2023- ކެންޑިޑޭޓް މަންދޫބުންނަށް ފުރުޞަތު ހުޅުވާލުން

• 15 ޖެނުއަރީ 2023– ކެންޑިޑޭޓް މަންދޫބުންނަށް ފުރުޞަތު ބަންދުވުން

• 28 ޖެނުއަރީ 2023– ރިޔާސީ ޕްރައިމަރީ ވޯޓްލާ ދުވަސް

އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، އެޕާޓީގެ ރައީސް، މުހައްމަދު ނަޝީދުވެސް އިއުލާން ކުރައްވާފައިވާއިރު, އެ ދެ ބޭފުޅުން ވެސް ވަނީ މެންބަރުންގެ ތާއީދު ހޯއްދެވުމުގެ މަސައްކަތް ފަށްޓަވައިފައެވެ.