ރާއްޖޭގައި ހުޅުވާ ފުރަތަމަ، ރޮބޮޓް ވެއިޓަރުން ޚިދުމަތްދޭ ރެސްޓޯރެންޓް މި ފެށޭ އައު އަހަރުގެ ޖަނަވަރީ އެއް ވަނަ ދުވަހު ހުޅުވުމަށް ތައްޔާރުވެއްޖެއެވެ.
"އޯޝަން ބަބުލް" ގެ ނަމުގައި ވެރިރަށް މާލޭގައި ހުޅުވާ މި ރެސްޓޯރެންޓް ހުންނާނީ މަޖީދީ މަގުގެ އިރުމަތީގައި ހުންނަ ކުރީގެ އުރީދޫ ހެޑް ކުއާޓާސް ގެއެވެ.
އޯޝަން ބަބުލް ގައި ޚިދުމަތް ދެމުންދާނީ، ކުރިއަރާފައިވާ އެހެން ގައުމުތަކުގައިވެސް ރެސްޓޯރެންޓް ތަކުގައި ޚިދުމަތްދޭ ކަހަލަ ރޮބޮޓް ކަމަށް އެ ރެސްޓޯރެންޓްގެ ވެރިފަރާތް ރަފީއުއްދީން ވިދާޅުވި އެވެ.
"މި ރެސްޓޯރެންޓް ގައި ޚިދުމަތް ދޭނީ، ޓެކްނޮލޮޖީގެ ގޮތުން ކުރިއަރާފައިވާ އެހެނިހެން ގައުމުތަކުގެ ރެސްޓޯރެންޓް ތަކުގައި ބޭނުން ކުރާ ފަދަ ރޮބޮޓުން. އަދި އެ ޚިދުމަތްދޭ ރޮބޮޓުން ކަސްޓަމަރުންނާއި ބައްދަލު ކުރާނީ ހިނިތުންވުމާއި ޝުކުރާއި އެކު." ރަފީއުއްދީން ވިދާޅުވި އެވެ.
މިއީ އޯޝަން ބަބުލް ގެ ނަމުގައި ހުޅުވޭ ދެވަނަ ރެސްޓޯރެންޓެވެ. އޯޝަން ބަބުލް ގެ ފުރަތަމަ ރެސްޓޯރެންޓް ހުޅުވާފައި ވަނީ މިދިޔަ އަހަރު ހުޅުމާލޭ ގައެވެ.
މި ރެސްޓޯރެންޓުން އެކި އެކި އައު ރަހަތަކުގެ ކޮފީ ލިބެން ހުންނާނެ ކަން ފާހަގަކުރައްވައި ރަފީއުއްދީން ވިދާޅުވީ، ރެސްޓޯރެންޓްގެ މެނޫވެސް ކުރިއަށް އޮތް ދުވަސްތަކުގައި އޮންލައިން ކޮށް ބަލާލެވޭނެ ހުންނާނެކަމަށެވެ.
Advertisement
This content is created and paid for by advertisers and does not involve Voice Journalists
