ތޮއްޖެހިފައިވާ މާލެ ސިޓީ ގެ ގިނަ އަދަދެއްގެ އާއްމުންނާއި ކުޑަކުދިންވެސް ހިތްހަމަ ޖައްސާލަން ގޮސް އުޅޭ ރަސްފަންނުގައި ފަތުރުވެރިން ބިކިނީގައި އުޅޭ މަންޒަރުތަކެއް އާންމު ވުމާއި ގުޅިގެން ގިނަ ބައެއް ނުރުހުން ފާޅުކޮށްފި އެވެ.
ރަސްފަންނުގައި ފަތުރުވެރިން ބިކިނީގައި ތިބޭ މަންޒަރު ފެންނަ ވީޑިިއޯ މިހާރު މީސް މީޑިއާގައި ދައުރުވަމުންދާއިރު، ފަތުރުވެރިން އެތަނުގައި އެފަދައިން ތިބޭ ތަން ފެނުމުން ފުލުހުން ގޮސް އެއީ މަނާކަމެއް ކަން އެ އަންހެން މީހާގެ ކައިރީގައި ބުނާ ތަން ވެސް އެ ވީޑިއޯ އިން ފެނެއެވެ.
މި ވީޑިއޯ އާއި ގުޅިގެން ގިނަ އަދަދެއްގެ އާއްމުން އަންނަނީ ކަންބޮޑުވުން ފާޅުކުރަމުންނެވެ. އެގޮތުން ސައްތައިން ސައްތަ މުސްލިމު ގައުމެއްގައި އަދި ހާއްސަކޮށް ވެރިރަށް މާލޭގައި އެގޮތަށް އުޅެވިގެން ނުވާނެ ކަމަށާ، ގިނަ އަދަދެއްގެ ކުޑަ ކުދިންވެސް ގޮސް އުޅޭ ސަރަހައްދެއްގައި އެފަދައިން ތިބުމުކީ ކުދިންނަށް ވެސް ނޭދެވޭ އަސަރު ކުރާނެ ކަމެއް ކަމަށް އާއްމުން ބުނެފައި ވެއެވެ.
ރާއްޖޭގައި މީހުން ދިރިއުޅޭ ރަށްތަކުގައި އާންމު ބީޗްތަކަށް ފަތުރުވެރިން ބިކިނީ ލައިގެން މޫދަށް އެރި އުޅުމަކީ ގާނޫނީ ގޮތުން މަނާ ކަމެކެވެ.
ނަމަވެސް އެހެން ދުވަސް ކޮޅުކޮޅުން އާންމުކޮށް މީހުން ދިރިއުޅޭ ރަށްރަށުގެ ބީޗުގައި ވެސް ފަތުރުވެރިން ބިކިނީ ލައިގެން މޫދަށް އެރޭ މައްސަލަތައް ފެންމަތިވެއެވެ. ބައެއް ފަހަރު ފުލުހުން އެފަދަ ފަތުރުވެރިންނަށް ނަސޭހަތް ދިނުމުން އެ މީހުން އެކަމާ ނުރުހުން ފާޅުކޮށް، ބޮޑު މައްސަލަތަކެއް ވެސް ކުރިމަތިކުރެއެވެ.
Advertisement
This content is created and paid for by advertisers and does not involve Voice Journalists
