މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)އިން އެކްރެޑިޓް ނުކުރާ ކޯހެއް އެވިޑް ކޮލެޖުން އިޝްތިހާރު ކުރަމުން ދާކަމަށް ބުނެ އެކަމާއި ސަމާލުވުމަށް އެމްކިއުއޭއިން ޢާއްމުކޮށް އިއުލާން ކުރުމާއި ގުޅިގެން އެ ކޯހުގެ މައުލޫމާތުތައް އެވިޑް ކޮލެޖުން ބަދަލުކޮށް ކަން ހިގައިދިޔަގޮތް ހާމަކޮށްފިއެވެ. 

އެމްކިއުއޭ އިން ކުރި އިއުލާނެއްގައި، އެވިޑް ކޮލެޖުގެ އިންސްޓަގްރާމް ޕޭޖުގައި އިޝްތިހާރު ކޮށްފައިވާ ދެ ކޯހެއް، އެ އިޝްތިހާރުކޮށްފައިވާ ގޮތަށް އެމްކިއުއޭއިން ހުއްދަ ދީފައި ނުވާނެ ކަމަށް ވަނީ ބުނެފައެވެ.
އެގޮތުން ފުރަތަމަ ކޯހަކީ ހަތަރުމަސް ދުވަހުގެ ތެރޭގައި ލެވެލް 5 ގެ ސެޓްފިކެޓް ލިބޭ ކަމަށް އިޝްތިހާރުކޮށްފައިވާ "އޭސީސީއޭ އެޕްލައިޑް ނޮލެޖް" ކޯހެވެ. އަދި ދެވަނަ ކޯހަކީ އެއް އަހަރު ދުވަހުގެ މުއްދަތަށް ހިންގަން ނިންމާފައިވާ ލެވެލް 8 ގެ "އޭސީސީއޭ ސްޓްރެޓެޖިކް ޕްރޮފެޝަނަލް" ކޯހެވެ. މިދެކޯސް އެކްރެޑިޓް ކޮށްދީފައި ނުވާނެ ކަމަށް އެމްކިއުއޭއގެ ނޫސް ބަޔާނުގައި ބުނެފައިވެއެވެ.

އެމްކިޔުއޭގެ އެ އިއުލާނާއި ގުޅިގެން އެވިޑް ކޮލެޖުން ނެރުނު ނޫސް ބަޔާނެއްގައި ބުނީ، އިޝްތިހާރު ކުރުމުގައި އެވިޑް ކޮލެޖުގެ ކޯހެއްގެ މައުލޫމާތު ލިޔުމުގައި ނުބައިކޮށް ލިޔެވިފައިވާ ކަމަށާއި، އެ ކުށް ލިޔެވުނު ކޯސްތަކުގެ މައުލޫމާތު އިސްލާހުކުރުމަށް ފަހު އާންމުކޮށްފައިވާކަމަށެވެ.

Advertisement

އެގޮތުން އޭސީސީއޭ އެޕްލައިޑް ނޮލެޖަކީ، އެއް އަހަރު ދުވަހުގެ މުއްދަތަކަށް، ހިންގާ ލެވެލް ފަހެއްގެ ކޯހެކެވެ. އޭސީސީއޭ ސްޓްރެޓިޖިކް ޕްރޮފެޝަނަލް ޕްރޮގްރާމަކީ ތިން އަހަރު ދުވަހުގެ ލެވެލް ހަތެއްގެ ޕްރޮގްރާމެއް ކަމަށާ، މި ދެ ޕްރޮގްރާމަކީ ވެސް އެމްކިއުއޭއިން އެކްރެޑިޓްކޮށް، ހިންގަން ހުއްދަ ދީފައިވާ ކޯސްތަކެއް ކަމަށެވެ. 

ނަމަވެސް އެ ކޯސް އިޝްތިހާރުކުރުމުގައި ލިޔެވިފައިވާ ކުށް އެ ކޮލެޖުގެ ސަމާލުކަމަށް އެމްކިއުއޭއިން ގެނައީ، އެ ކޯހާ ގޫޅޭގޮތުން ބަޔާނެއް ނެރެ، ކުށް އިސްލާހުކުރުމަށް ވެސް އެއްވެސް ފުރުސަތެއް ނުދީކަމަށް އެވިޑު ކޮލެޖުން ބުންޏެވެ.

އަދި އެ ގޮތަށް އެމްކިއުއޭއިން އަމަލުކުރެއްވުމުގެ ސަބަބުން، އިޝްތިހާރު ވަގުތުން އިސްލާހުކުރުމަށް އޮތް، ފުރުސަތު އެ ކޮލެޖަށް ގެއްލި ދިޔަ ކަމަށާ، ނުނިޔަތެއްގައި، އިޝްތިހާރު ކުރި ކަމުގައި ދޭހަވާފަދަ ގޮތަކަށް އެމްކިޔުއޭ އިން ނޫސް ބަޔާން ނެރެފައިވާތީ އެ ކޮލެޖުން ހިތާމަކުރާ ކަމަށްވެސް އެ ކޮލެޖުން ނެރުނު ނޫސް ބަޔާނުގައި ބުންޏެވެ.

މީގެ އިތުރުން، އެއީ ފަށަން ތައްޔާރުވަމުން އަންނަ ކޯހެއް ކަމަށާއި އެ ކޯސް އަދި ނުހިންގާ ކަމަށް ވެސް އެވިޑުން ބުންޏެވެ.