މާލޭ އެއް ނަމްބަރު ފާލަން ކައިރީ ފަޅުތެރެއަށް އެޅިފައިވާ ކަޅުތެޔޮތައް ނަގައި އެއްކޮށް ސާފުކޮށް ނިންމާލާފައިވާ ކަމަށާ އެގޮތުން 15 ފީފާގެ ތެޔޮ ނެގިފައިވާ ކަމަށް އެމްއެންޑީއެފުން ބުނެފި އެވެ.

މާލޭ ރަސްމީ ފާލަމާ ތިން ނަންބަރު ޖެޓީ އާ ދިމާ ފަޅުތެރެއަށް ކަޅު ތެޔޮ އެޅިފައި ހުރިކަމުގެ މައުލޫމާތު މިމަހު 1 ވަނަ ދުވަހު ލިބުމާ ގުޅިގެން އެތަން ސާފުކުރުމުގެ މަސައްކަތް އެމްއެންޑިއެފްއިން ވަނީ ކޮށްފައެވެ. 

އެގޮތުން ކަޅުތެޔޮތައް ނެގުމަށް ބޫމިންގ ބޭނުންކޮށްގެން، ކޮންޓެއިންކޮށް ތެޔޮތައް ނެގުމުގެ މަސައްކަތް އެމްއެންޑީއެފުން ވަނީ ކޮށްފައެވެ.

Advertisement

މިއަދު އެމްއެންޑީއެފުން ބުނީ ތިން ދުވަހުގެ މަސައްކަތުން އިއްޔެ ހުރިހާ ތެޔޮތައް ނަގައި ފަޅު ތެރެ ސާފުކޮށްފައިވާ ކަމަށެވެ. އިއްޔެ އެ ސަރަހައްދުން 300 ލީޓަރެއްހާ ތެޔޮ ނަގާފައިވެ އެވެ.

އެމްއެންޑީއެފުން ބުނީ މުޅި ސަރަހައްދަށް ހާހެއްހާ ލީޓަރުގެ ތެޔޮ ޖަމާވެފައިވާ ކަމަށެވެ. އަދި ހުރިހާ ތެޔޮތައް ނަގައި ފީފާތަކަށް އެޅުމުން 15 ފީފާގެ ތެޔޮ ހުރި ކަމަށް މައުލޫމާތުދެ އެވެ.