މާލެ ސަރަހައްދުގައި މިވަގުތު ވެސް 8،782 ފްލެޓު އަޅަމުންދާ ކަމަށާ، އެތަނުން ބައެއް ފުލެޓްތަކަށް މި އަހަރުވެސް މީހުންނަށް ވަދެވޭ ވަރު ވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް ވިދާޅުވެއްޖެއެވެ.

ރޭ އޮތް ރައީސް ޞާލިހުގެ ރިޔާސީ ޕްރައިމަރީގެ ކެމްޕެއިން ޖަލްސާގައި ވާހަކަ ދައްކަވަމުން އެމަނިކުފާނު ވިދާޅުވީ މާލޭގެ ރައްޔިތުންނަށް ދިމާވެފައިވާ އެންމެ ބޮޑު ގޮންޖެހުމަކީ ބޯހިޔާވަހިކަން ނުލިބުމުގެ މައްސަލަ ކަމަށެވެ.

އެ މައްސަލަ ހައްލުކުރުމަށް މި ސަރުކާރުން މިހާރުވެސް މާލެ ސަރަހައްދުގައި 8،782 ފްލެޓުގެ އަމަލީ މަސައްކަތް ހިނގަމުންދާ ކަމަށް ވިދާޅުވި އެވެ. އަދި އޭގެ އިތުރުން، މާލޭގެ ރައްޔިތުންނަށް 5،000 ގޯތި ދިނުމަށްޓަކައި ވެވަޑައިގަތް ވައުދު ވެސް ފުއްދަވާނެ ކަމުގެ ޔަގީން ކަން އެމަނިކުފާނު ދެއްވިއެވެ. އަދި އެކަން އެމަނިކުފާނު ކުރަށްވާނީ "ކުރެންދޫ ރައްޔިތުންނަށް ކަނޑުން އެއްހާސް ގޯތި ދިން ގޮތަކަށް ނޫން" ކަމަށް ރައީސް ސޯލިހް ވިދާޅުވިއެވެ.

"ކަޑަ ޖަހައި، ބިން ވަކިކޮށް، ރޯނު ދަމައި މާލޭގެ ރައްޔިތުންނަށް މި ފަސް އަހަރުގެ ތެރޭގައި ދޭނަން" ރައީސް ވިދާޅުވިއެވެ.

ރައީސް ޞާލިހު މިފަދައިން ވިދާޅުވެފައި މިވަނީ، ކުރެންދޫ ރައްޔިތުންނަށް އެއްހާސް ގޯތި ކަނޑުން ދެވިދާނެ ގޮތެއް އެބައޮތް ކަމަށް ވިދާޅުވެ ރައީސް ނަޝީދު ކުރިން ދެއްކެވި ވާހަކަފުޅާއި ގުޅިގެންނެވެ. 

މިއާއެކު، ރައީސް ވިދާޅުވީ ބޯހިޔާވަހިކަމުގެ 16،401 ފްލެޓާއި ގޯތި ދިނުމުގެ މަސައްކަތް ޕްލޭނިން މިނިސްޓަރު މުހައްމަދު އަސްލަމް އިސްކޮށް ހުންނަވައިގެން މިހާރު ވެސް ކުރިއަށް ގެންދާ ކަމަށެވެ. މިއީ ރާއްޖޭގެ ތާރީހުގައި ފަސް އަހަރުގެ ސަރުކާރަކުން ކޮށްފައިވާ ކަމެއް ނޫން ކަމަށް ވެސް އެމަނިކުފާނު ވިދާޅުވިއެވެ.

މީގެ އިތުރުން، މިހާތަނަށް އެއްވެސް ސަރުކާރުން ފެށި ހައުސިން މަޝްރޫއެއް ނިންމައި، އެ ފްލެޓުތަކަށް މީހުންނަށް ވަދެވިފައި ނެތް ކަން ފާހަގަ ކުރައްވައި ރައީސް ވަނީ، މި ސަރުކާރުގެ ފަސް އަހަރު ނިމޭ އިރު ސަރުކާރުން ހަދާ ފްލެޓުތަކުގެ ތެރެއިން ބަޔަކަށް މާލޭގެ ރައްޔިތުންނަށް ދިރިއުޅެވޭ ވަރު ކޮށްދެއްވާނެ ކަމަށެވެ.