ހުކުރު ދުވަހަކީ ޚާއްސަ ދުވަހަކަށް ވާއިރު، ހުކުރު ދުވަހުގެ މެންދުރު ކެއުމަށްފަހު އަނގަ ފޮނި ކޮށްލަން މީރު ފޮނި އެއްޗެއް ކެއުމަކީ އާއްމުކޮށް އެންމެންވެސް ކޮށް އުޅޭ ކަމެކެވެ. އެހެންކަމުން މިއަދު "ވޮއިސް" ގެ ބަދިގެއިން މި ގެނެސްދެނީ ޗޮކޮލެޓް ފަޖް ވަރަށް މީރުކޮށް ތައްޔާރު ކުރާނެގޮތެވެ. 

1/2 ޕެކެޓް މަންޗީ މާރީ ބިސްކޯދު ( ކުދި ކޮށްފައި)

3 މޭޒުމަތީ ސަމްސާ ކޮކޯ ޕައުޑާ

2 ކުކުޅު ބިސް

150 ގްރާމް ބަޓަރު

1 ދަޅު ގެރިކިރު

1 މޭޒުމަތީ ސަމްސާ ވެނީލާ އެސެންސް

1 ޑެއިރީ މިލްކް ސިލްކް ޗޮކޮލެޓް (ބޮޑު)

ކަޖޫނަޓް ( ބޭނުން ވަރަކަށް، ކުދި ކޮށް ކޮށާފައި)

ކަނަމަދު ކޮޅެއް (ބޭނުން ނަމަ)

1) ފުރަތަމަ ބަޓަރު ކޮޅު ދިޔާ ވަންދެއް ތެލީގައި ހޫނުކޮށްލާށެވެ.

2) ދެން ތަށްޓެއްގެ ތެރޭގައި ދެ ބިސް އެކުލަވާ ކުމަށްފަހު ބަޓަރު ކޮޅު ތެރެއަށް އަޅާލައި ރަނގަޅަށް އެއްކޮށްލާށެވެ.

3) އެއަށްފަހު ކޮކޯ ޕައުޑަރ ވެސް 1/2 ޖޯޑު ފެނުތެރޭގައި ގިރައި އެކުލަވާލުމަށްފަހު ތެއްޔަށް އަޅައި އެއްކޮށްލާށެވެ. 

4) ދެން ޑެއިރީ މިލްކް ޗޮކްލެޓާއި، ވެނީލާ އެސެންސް އަދި ގެރިކިރުވެސް އެއަށް އެޅުމަށް ފަހު އެއްކޮށްލާށެވެ.

5) ޗޮކޮލެޓް މިކްސްޗަރ އޮލަވުމުން، ކުދި ކޮށްފައި ހުރި މަންޗީ މާރީ ބިސްކޯދު މަޑު މަޑުން ތެއްޔަށް އަޅާށެވެ. އަދި އެއާ އެއްވަރަށް ކޮށާފައި ހުރި ކަޖޫނަޓް ކޮޅުވެސް އަޅަމުން އެއްކުރަމުން ގެންދާނީއެވެ.

6) ހުރިހާ އެއްޗެއް ރަނގަޅަށް އެއްވުމުން ބޭނުންވާ ޓްރޭއަކަށް އެޅުމަށް ފަހު، މައްޗަށް ކަނަމަދު ކޮޅު އަޅާލުމަށްފަހު، ޕްރިޖްގައި ފިނި ކުރަން ބަހައްޓާށެވެ.