ވެރިކަން ކުރާ ކޯލިޝަންގެ މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރިޔާސީ ޕްރައިމެރީއާ ދިމާކޮށް އެމްޑީޕީގެ ދަފްތަރު ސާފުކުރުމުގެ ތެރެއިން ރައީސް އިބްރާހިމް މުހައްމަދު ޞާލިހްގެ އަނބިކަބަލުންވެސް ޕާޓީން ވަކިވިމީހުންގެ ތެރޭގައި ހިމެނޭކަން ހާމަކުރައްވައިފިއެވެ.
ރައީސް ޞާލިހް މިފަދައިން ހާމަކުރައްވާފައިވަނީ އެމްޑީޕީގެ އެންމެ އިސްލީޑަރުގެ ހައިސިއްޔަތުން މިހާރު މެދުރާއްޖެތެރޭގެ ރައްތަކަށް ކުރައްވަމުން ގެންދަވާ ދަތުރުފުޅުގައި ރ. އިންނަމާދޫގެ އެމްޑީޕީގެ މެންބަރުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.
އިންނަމާދޫގެ އެމްޑީޕީ މެންބަރުގެ ފަރާތުން ވެސް ދަފްތަރަށް ގެނައި ބަދަލާގުޅިގެން ވަނީ ކަންބޮޑުވުން ފާޅުކޮށްފައެވެ.
ރައީސް ޞާލިހް ރ. އިންނަމާދޫ ރައްޔިތުންނާއި ބައްދަލުކުރެއްވުން---ފޮޓޯ: ވޮއިސް
އެމައްސަލާގައި ރައީސް ޞާލިހް ވަނީ ދަފްތަރުގެ މައްސަލާގައި އެމަނިކުފާނުގެ އާއިލީ ގިނަ ބޭފުޅުންތަކެއްވެސް އެމްޑީޕީން ވަކިވެފައިވާކަން ހާމަކުރައްވާފައެވެ. އަދި ދަފްތަރަށް އައި ބަދަލަކީ މިދިޔަ މޭ މަހު ބޭއްވި ކޮންގްރެސްގައި ފާސްކޮށްގެން ކުރަމުންދާ ކަމެއް ކަމަށެވެ.
އަޅުގަނޑުގެ އެންމެ ބޮޑު ދައްތަ, އެންމެ ހަގު ކޮއްކޮ އަދި އަންހެނުން ވެސް އޮތީ ވަކިވެފައި. ޖެހުނީ އަލުން ފޯމު ލާން
ރައީސް އިބްރަހިމް މުހައްމަދު ޞާލިހް
ރައީސް ޞާލިހްގެ އާއިލީ ގިނަ ބޭފުޅުންތަކެއް ޕާޓީގެ ދަފްތަރުން ވަކިވެފައިވާއިރު، ރައީސް ނަޝީދުގެ ފެކްޝަނުންވެސް ވަނީ އެކަމުގެ ކަންބޮޑުވުން ފާޅުކޮށްފައެވެ. އެގޮތުން ރައީސް ނަޝީދުގެ އަނބިކަބަލުން ލައިލާ ވަކިކުރައްވާފައިވާކަމަށް ވިދަޅުވެފައެވެ.
ރައީސް ޞާލިހް ރ. އިންނަމާދޫ ރައްޔިތުންނާއި ބައްދަލުކުރެއްވުން---ފޮޓޯ: ވޮއިސް
ރައީސް ޞާލިހް އިތުރަށް ވިދާޅުވިގޮތުގައި އެމަނިކުފާނުގެ ދާއިރާ (ހިންނަވަރު ދާއިރާ) އިން އެކަނިވެސް 250 ވޯޓު ވަނީ ދަފްތަރަށް ގެނައި ބަދަލާއެކު ގެއްލިފައިކަމަށެވެ. އަދި މިބަދަލަކީ ޕްރައިމެރީއާއި ގުޅިގެން އައި ބަދަލެއްނޫންކަމަށްވެސް ރައީސް ޞާލިހް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
