ފާއިތުވި ޑިސެމްބަރު މަސް ނިމުނުއިރު ދައުލަތުގެ ރިޒާވުގައި 800 މިލިއަން ހުރި ކަމަށް ބުނާއިރު، އެ ރިޒާވަކީ ދެކޮޅުންކާ ވެނެއް ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެންބަރު އަދި ކުރީގެ އިކޮނަމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ. 

އަހަރު ނިމުނު އިރު ދައުލަތުގެ ރަސްމީ ރިޒާވްގައި ހުރި ވަރު 827 މިލިއަން ޑޮލަރަށް އަރާފައިވާ ކަމަށް ސަރުކާރުން ހާމަކުރުމާއި ގުޅިގެން އެ ވާހަކައަށް ރައްދު ދެއްވައި ސައީދު ކުރެއްވި ޓުވީޓެއްގައި ވިދާޅުވީ، ސަރުކާރާއި ސަރުކާރުގެ މީޑިއާ އިން ރިޒާވާއި ގުޅޭ ހަޤީގަތް އޮޅުވާލަނީ އެމްޑީޕީގެ ޕްރައިމަރީ ރައީސް އިބްރާހިމް މުހައްމަދު ޞާލިހަށް ކާމިޔާބު ކޮށްދިނުމަށްޓަކައި ކަމަށެވެ. 

"800 މިލިއަން ކަމައްބުނާ ތިރިޒާވަކީ 2 ކޮޅުންކާވެނެއް! ސިއްރަކީ އިންޑިއާ! ބަހުސްކޮއްލަމާ؟" ސައީދު ވިދާޅުވި އެވެ. 

މީގެ އިތުރުން ސައީދު ވިދާޅުވީ ރިޒާވުގައި 800 މިލިއަން ހުރި ކަމަށް ބުނި ނަަމަވެސް ބޭނުންކުރެވޭ ރިޒާވް ހުރީނުރައްކަލުގައި ކަމަށެވެ. 

"އިންފްލޭޓްކުރި ރިޒާވްގެ ލައިބިލިޓީ ބޮޑު، އަޅުވެތި އަދި ވަރަށް ބޮޑަށް ސިޔާސީ" ސައީދު ވިދާޅުވި އެވެ. 

ދައުލަތުގެ ރިޒާވް 800 މިލިއަނަށް އެރި އިރު ފާއިތުވެދިޔަ އަހަރުގެ ބަޖެޓާ ގުޅިގެން އާންމު ކުރި ހިސާބުތަކުގައި ސަރުކާރުން ލަފާ ކުރީ ދައުލަތުގެ ރިޒާވް އަހަރު ނިމޭ އިރު 632 މިލިއަން ޑޮލަރުގައި ހުންނާނެ ކަމަށެވެ.

ރިޒާވް އިތުރުވި އިރު މިދިޔަ މަހު އެމްއެމްއޭ އިން ވަނީ އިންޑިއާގެ ރިޒާވް ބޭންކު (އާރްބީއައި) އިން ކަރެންސީ ސްވޮޕްގެ ގޮތުގައި 100 މިލިއަން ޑޮލަރު ނަގައިފަ އެވެ.

ކަރެންސީ ސްވޮޕް ފެސިލިޓީ ރާއްޖެއިން ނަގަނީ އިންޑިޔާގެ ރިޒާވް ބޭންކަށް އެ ނަގާ އަދަދަކާ އެއްވަރަށް ދިވެހި ރުފިޔާ ބަހައްޓައިގެންނެވެ. އެގޮތުން 400 މިލިއަން ޑޮލަރު އިންޑިޔާގެ ރިޒާވް ބޭންކުން ނަގާ ނަމަ އެއާ އެއްވަރަށް ދިވެހި ރުފިޔާ އެ ބޭންކުގައި ބަހައްޓަން ޖެހޭނެ އެވެ. ކަރެންސީ ސްވޮޕުގެ ތެރެއިން ނަގާ ފައިސާ ލޯނު ނަގާ އުސޫލުން އަނބުރާ ދައްކަންޖެހެ އެވެ.