ކީރިތި ޤުރުއާނުގައިވާ މަތިވެރި ޢަޤީދާއާއި ޢިލްމު އަހަރަމެންގެ ޅަދަރީންގެ ހިތްތަކުގައި ބިންވަޅުނުނެގިއްޖެ އެއްދުވަހުން އަނެއް ދުވަހަށް، ޤައުމު ދާނީ ނިކަމެތިވެ ދަށު ދަރަޖައަށް ވެއްޓެމުން  ކަމަށް މިއަދުގެ ހުކުރުޚުތުބާގައި ބުނެފިއެވެ. 

"އިސްލާމީ އަހްލާގީ ޖީލެއް ބިނާކުރުމުގައި ކީރިތި ގުރުއާނުގެ ދައުރު" މި މައުޟޫއަށް ހާއްސަކޮށްގެން މިއަދު ދިން ހުތުބާގައި ބުނީ ޢިލްމާއި އަޚުލާޤުގެ މަތީގައި އާ ޖީލެއް ބިނާކުރަން ބޭނުންނަމަ، އަހަރެމެންވެސް ކުރަންވީ ކަމަކީ، ކީރިތި ޤުރުއާނުގައިވާ މަތިވެރި ޢަޤީދާއާއި، އެ ޤުރުއާނުގައިވާ މަތިވެރި ޢިލްމު، އަހަރެމެންގެ ޅަދަރީންގެ ހިތްތަކުގައި ބިންވަޅުނަގައި ދީގެން ކަމަށެވެ. 

އެކަން ކޮށްނުދެވިއްޖެނަމަ އެއްދުވަހުން އަނެއް ދުވަހަށް، ޤައުމު ދާނީ ނިކަމެތިވެ ދަށު ދަރަޖައަށް ވެއްޓެމުން ކަމަށްވެސް ޚުތުބާގައި ބުނެފައިވެއެވެ.

Advertisement

"ކީރިތި ނަބިއްޔާ ހަދީޘެއްގެ މާނަގައިވެއެވެ. “ހަމަ ކަށަވަރުން، މިފޮތުގެ ސަބަބުން ﷲ ތަޢާލާ، ޤައުމުތަކެއް މަތިވެރި ކުރައްވައެވެ. އަދި އަނެއްބަޔަކު ނިކަމެތި ކުރައްވައެވެ." ޚުތުބާގައި ބުނެފައިވެއެވެ. 

އެހެންކަމުން އިސްލާމީ އަހްލާގުގެ މަތީގައި ރަނގަޅު ޖީލެއް ބިނާކުރެވޭނީ އަހަރުމެންގެ ދަރިންގެ އުނގެނުމާއި ތަރުބިއްޔަތުގައި ހުރިހާ ދިމާއަކުންވެސް ގުރުއާނުގެ މަންހަޖު ހިމަގައިގެން ކަން ފާހަގަކޮށް ހުތުބާގައި ވަނީ ގުރުއާނުގެ އާޔަތްތަކުގެ މާނަ ބޭރުފުށުން ކިޔަވައިދިނުމުގެ ބަދަލުގައި އެ އާޔަތްތަކުގައިވާ އިލްމީ ހަގީގަތަކާ ހަމައަށް، ކިޔަވާ ކުދިންގެ ވިސްނުން ވާސިލުކޮށްދިނުމުގެ މުހިންމުކަން ހާމަކޮށްދީފައެވެ. 

އަދި މާތް ރަސްކަލާނގެ މައުރިފާކޮށްދެއްވި ނުގުޑާފަދަ ތައުހީދުގެ ބިންގަލެއްގެ މަތީގައި ޖީލެއް ތަރުބިއްޔަތު ކުރެވިއްޖެނަމަ އިސްލާމީ އުއްމަތް އޭގެ އަސްލު މަގާމަށް ރުޖޫއަވެގެން އަންނާނެކަމީ ޝައްކެއް ވަސްވާހެއް އޮތްކަމެއް ނޫން ކަމަށްވެސް ހުތުބާގައި ބުނެފައިވެ އެވެ.