މި އަހަރުގެ ރިޔާސީ އިންތިހާބު އަންނަ ސެޕްޓެމްބަރު ނުވަ ވަނަ ދުވަހު ބާއްވާ ގޮތައް ހަމަޖެހިއްޖެއެވެ. 

އިލެކްޝަންސް ކޮމިޝަނުން މިއަދު ބޭއްވި ނޫސްވެރިންގެ ބައްދަލުމުގައި އެ ކޮމިޝަނުގެ ރައީސް ފުއާދު ތައުފީގު ވިދާޅުވީ، ރިޔާސީ އިންތިހާބުގެ ފުރަތަމަ ބުރު އޮންނާނީ ސެޕްޓެމްބަރު 9 ގައި ކަމަށާ އަދި ދެވަނަ ބުރެއް ބާއްވަން ޖެހިއްޖެ ނަމަ، ސެޕްޓެމްބަރު 30 ވަނަ ދުވަހު ބާއްވާ ގޮތަށް ހަމަޖެހިފައިވާ ކަމަށެވެ.

މީގެ އިތުރުން ފުއާދު ވިދާޅުވީ، ކެނޑިޑޭޓުންނަށް ކެމްޕޭންކުރުމަށް ފުރުސަތު ލިބޭނީ 10 އޯގަސްޓުން ފެށިގެން 7 ސެޕްޓެންބަރާ ހަމައަށް ކަމަށާ، އިންތިޚާބު ބާއްވާ ތާރީޚުން ފެށިގެން 7 ދުވަހުގެ ތެރޭގައި އިންތިޚާބުގެ ފުރަތަމަ ދުވަހުގެ ނަތީޖާ އިއުލާނުކުރާނެ ކަމަށެވެ. 

މި އިންތިޚާބުގައި ވޯޓުލުމުގެ ޙައްޤު ލިބިފައިވާ މީހުންގެ ލަފާކުރެވޭ އަދަދަކީ 280،000 މީހުންކަމަށްވާއިރު މިއީ 2018 ވަނަ އަހަރާ އަޅާބަލާއިރު 21،000 އެއްހައި މީހުން އިތުރު އަދަދެއް ކަން ފުއާދު ފާހަގަކުރެއްވިއެވެ. 

މިއާއެކު ފުއާދު ވަނީ، މި ރިޔާސީ އިންތިހާބުގައި 50 ރިސޯޓުގައި ވޯޓު ފޮށި ބަހައްޓާނެ ކަމަށާއި، މާލޭގައި 145 ވޯޓު ފޮށި، ހުޅުމާލޭގައި 47، ވިލިމާލޭގައި 10 ފޮށި، ރާއްޖެއިން ބޭރުގަައި 12 ފޮއްޓާއި، އަތޮޅުތެރޭގައި 327 ފޮށި ބެހެއްޓޭނެ ކަމަށް ލަފާކުރެވޭ ކަމަށް ވިދާޅުވިއެވެ.

ރިޔާސީ އިންތިހާބު ބާއްވާ ތާރީޚް އިއުލާން ކޮށްފައިވާއިރު، މި އަހަރުގެ ރިޔާސީ އިންތިހާބުގައި ވާދަކުރައްވާނެ ކަމަށް އިއުލާން ކޮށްފައިވާ އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް ޔާމީން ހުރީ 11 އަހަރުގެ ޖަލު ހުކުމް ތަންފީޒް ކުރުމަށް ޖަލުގައެވެ. 

އަދި އިންތިހާބުގައި ވެރިކަން ކުރާ މައި ޕާޓީ، އެމްޑީޕީގެ ފަރާތުން ވާދަކުރާނެ ކެންޑިޑޭޓެއް ކަނޑައެޅުމަށް ބާއްވާ ރިޔާސީ ޕްރައިމަރީ މި މަހު 28 ގައި ބާއްވާއިރު، އެ އިންތިހާބުގައި ވާދަކުރައްވަނީ ރައީސް އިބްރާހިމް މުހައްމަދު ޞާލިހާއި އެމްޑީޕީގެ ރައީސް މުހައްމަދު ނަޝީދެވެ.