ރައީސް އިބްރާހިމް މުހައްމަދު ޞާލިހަށް ދެ ވަނަ ދައުރެއް ދީފިނަމަ އެކަން ވާނީ ގައުމީ ތަކުލީފަކަށް ކަމަށް ޕީއެންސީގެ ނައިބު ރައިސް އަދި ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.

ސައީދު ވިދާޅުވީ، އައްޑޫގައި ރަނގަޅަށް ހިނގަމުން ދިޔަ ޝަންގްރިލާ ބަންދު ކޯށްފައިވާތާ ފަސް އަހަރު ވެފައިވާ ކަމަށާއި އައްޑޫ މަގުހަދަން ދިނީ އެކަން ނުވެސް ދަންނަ އިންޑިޔާ ބަޔަކަށް ކަމަށެވެ.

މީގެ އިތުރުން މައި އެއަރޕޯޓްގެ ކާގޯ ޓާމިނަލް ވަރުވެސް ނިއްމާ ނުލެވުނުކަން ފާހަގަ ކުރައްވައި ސައީދު ވިދާޅުވީ ސީޒަން ފެށުނުއިރު އެތަނުގައި ދުވާ ބަހެއްހާހިސާބުވެސް ނެތް ކަމަށެވެ.

ޝަންގްރިއްލާއާއި ހެރެތެރެ ހުއްޓިފައި އޮތުމުން އައްޑޫ ރައްޔިތުން ކަންބޮޑުވުން ފާޅުކުރާތީ ކެމްޕެއިނުގައި އައްޑޫއަށް ވަޑައިގެން އެ ރިސޯޓުގައި އޮތް ސަރުކާރުގެ ހިއްސާ އައްޑޫ ރައްޔިތުން އެދޭނަމަ ދޫކޮށްލައްވާނެކަމަށް ރައީސްވަނީ ވިދާޅުވެފައެވެ. އަދި ޝަންގްރިއްލާގެ މައްސަލަ ބަލައި އިހުމާލުވީ ބަޔަކަށް ފިޔަވަޅުއަޅުއްވާނެކަމަށް ރައީސް ވިދާޅުވިއެވެ.

އައްޑޫގައި މަގުހެދުމުގެ މަސައްކަތްކުރާ ތިލަމާލެ ބުރިޖުވެސް އަޅާ ކުންފުނިކަމަށްވާ އެފްކޯންސްއިން މަސައްކަތްކުރާ ގޮތާމެދު އެ ސިޓީގެ ގިނަ ރައްޔިތުން ހިތްހަމަނުޖެހެއެވެ.

ސައީދު އެފަދައިން ވިދާޅުވެފައި ވާއިރު، ރައީސް ޞާލިހު ވަނީ ދާދި ފަހުން އައްޑުއަށް ވަޑައިގަންނަވައި، ކެމްޕޭނަށް ދޮރުން ދޮރަށް ހިންގަވާފައެވެ.

އައްޑޫ ރައްޔިތުންނާ ވާހަކަ ދައްކަވަމުން ރައީސް ވިދާޅުވީ އައްޑޫ ސިޓީގެ ތާއީދު ބޭނުންވަނީ ހަމައެކަނި އައްޑޫ ތަރައްގީކުރަން ނޫން ކަމަށާއި މުޅި ރާއްޖެ ތަރައްގީކުރުމަށް އައްޑޫ ސިޓީގެ ރައްޔިތުންގެ ތާއީދު ބޭނުންވާ ކަމަށެވެ.

ނަމަވެސް މި ސަރުކާރުގެ ދިޔަ ހަތަރު އަހަރުގެ ތެރޭގައި މީގެ ކުރިން ނާންނަ ވަރުގެ ބޮޑު ތަރައްގީއެއް އައްޑުއަށް ގެނެސްދީފައިވާ ކަމަށް ގަބޫލުކުރައްވާ ކަމަށް ރައީސް ވިދާޅުވިއެވެ.