ރަށުތެރޭގައި ނިވާކަން ކުޑަ ހެދުން ލައިގެން އުޅޭ ފަތުރުވެރިން ގާތު ނިވާވާން ބުނުމުގެ ހިތްވަރު ރައްޔިތުންގެ ކިބައިގައި ހުންނަންޖެހޭ ދީނީ އިލްމުވެރިޔާ އައްޝެއިޚް ފަޟްލޫން މުހައްމަދު ވިދާޅުވެއްޖެއެވެ.
ލޯކަލް ޓޫރިޒަމް ފައްކާވެ ރަށްރަށުގައި ގެސްޓް ހައުސްތައް ހުޅުވި، ފަތުރުވެރިން ގިނަވަމުން ދިޔަ ވަރަކަށް، އިސްލާމްދީނާއި ޚިލާފް ކަންކަން ދިވެހި މުޖުތަމައުގައި ދަނީ އާއްމު ވަމުންނެވެ. ވަކިން ޚާއްޞަކޮށް، ރަށުގެ ކުޑަކުދިންނާއި، އުމުރުން ދޮށީ މީހުންނާއި ޒުވާނުން އާއްމުކޮށް އެއްވެ އުޅޭ ތަންތަނުގައި ނިވާކަންކުޑަ ހެދުން އަޅައިގެން ފަތުރުވެރިން އުޅުމާއި، ގާތްގޯޅިކޮށް އުޅުން ފަދަ ކަންކަން ދަނީ އާއްމު ވަމުންނެވެ.
އެކަމާއި ގުޅިގެން ކަންބޮޑުވުން ފާޅުކޮށް ޝެއިޚް ފަޟްލޫން ފޭސްބުކް ގައި ހިއްސާ ކުރެއްވި ޕޯސްޓެއްގައި ވިދާޅުވީ، ރަށުތެރޭގައި ނިވާކަންކުޑަ ހެދުން އަޅައިގެން އުޅޭ ފަތުރުވެރިންނަށް ނިވާވުމަށް އަމުރުކުރުމުގެ ހިތްވަރު ރައްޔިތުންގެ ހުންނަންޖެހޭ ކަމަށެވެ.
އަދި އެފަދަ ކަންކަން މަނާ ނުކޮށް ހިތްވަރުދީ، ރަށް ފަސާދަކުރާ ވިޔަފާރިވެރިން ރަށުން ބޭރުކުރުމުގެ ހިތްވަރުވެސް ރައްޔިތުންގެ ކިބައިގައި ހުންނަންޖެހޭ ކަމަށް އޭނާ ވިދާޅުވި އެވެ.
"ސަރުކާރުން ނުކުރާތީ، ކައުންސިލުން ނުކުރާތީއޭ ބުނެ މުންކަރާތްތަށް މަނާނުކޮށް ރައްޔިތުން ތިބޭކަށް ނުޖެހޭ! މުންކަރާތް މަނާކުރުމަކީ ކޮންމެ ފަރުދެއްގެވެސް ޒިންމާއެއް!" ޝެއިޚް ފަޟްލޫން ވިދާޅުވިއެވެ.
މީހުން ދިރިއުޅޭ ރަށްރަށުގައި "ބިކިނީ ބީޗް" ހަދާފައި ހުންނައިރުވެސް، އެފަދަ ނިވާކަން ކުޑަ ހެދުން އަޅައިގެން މަގު ތަކާއި، އާއްމުންނަށް ޚާއްސަ އަތިރި މަތީގައި ފަތުރުވެރިން އުޅޭ މައްސަލަ އިންތިހާއަށް ބޮޑުވެފައިވާއިރު, ގެސްޓްހައުސްތައް ހިންގާ ފަރާތްތަކުން އެކަންކަން މަނާ ނުކޮށް ހިތްވަރުދޭ ކަމީ އާއްމުންގެ ނުހަނު ކަންބޮޑުވުމެކެވެ.
އަދި އެފަދަ ކަންކަން މަނާ ކުރާ މީހުންނަކީ ހަރުކަށި ފިކުރުގެ މީހުން ކަމަށް ބުނެ، އެމީހުންނަށް ޖެއްސުން ކުރުމުގެ ކަންކަންވެސް ގެސްޓްހައުސް ތަކުގެ ވެރިންނާއި އެނޫންވެސް މީހުން ކުރަމުންދާއިރު، އޭގެ ސަބަބުން މުންކަރާތްތައް ހުއްޓުވުމަށް މަސައްކަތް ކުރާ މީހުންނަށް ވެސް ބޮޑެތި ގޮންޖެހުންތަކާއި ކުރިމަތިލާން ޖެހެއެވެ.
Advertisement
This content is created and paid for by advertisers and does not involve Voice Journalists
